Tito 2 - La Bible en Otetela (Bible K'Ekila) 1991

Akambu wʼOlolo Wahumba Antu Ntsha

¹ Keli etsha antu akambu wusunganyi la dietshelu dia mete,

² dia dikumanyi ndjakimela, ndjala la kenemo, la ki, la wulu lu mbetawo, ndu ngandji, ndu lu kolamelu.

³ Ndu dikumanyi dia amantu wayali la kenemo lu akambu awo, tawuyalaki atendanyi, kuyanga fumbi ya wanu. Vo wayali embetsha wa akambu wʼololo,

⁴ dia vo mbekiya esekaseka wʼamantu dia nanga waumewo, la anʼawo;

⁵ ndu dia ndjala la etema wa ki, la tukanyi ta pudipudi, ndu dia ntsha ulimu la wakawo. Vo wayali la memakana, wayali la ukitanyia le waumewo, ne dia diui dia Unyashungu tadiotengamaki.

⁶ Okokomiya ndu elongo wʼapami dia vo ndjala la etema wa ki.

⁷ Lu akambu tshe, uyali djimbitelu ya etsha wʼololo. Tuyalaki la lukesu lu wetshelu aye, uyali la kenemo.

⁸ Utaki aui wʼololo, wahaweyi ntana munga, ne dia utunyi utshami sonyi, ndi tayalaki la dikambu dia ntosongwela.

⁹ Okokomiya fumbi dia vo ndjala lʼokongo wa akhumewo, la dia mbangenyangenya lu akambu tshe; tawuyalaki la uhindudi;

¹⁰ tawuvaki, keli wenyaki kolamelu yʼololo tshe. Okone wayuluwanya dietshelu dia Unyashungu, Ushimbedi asu lu akambu awo tshe.

Dikambu Diakayakimo Ushimbedi Asu

¹¹ Ne dia ngandji ka mamba ka Unyashungu kambene, kambela panda le antu tshe,

¹² kambutetsha lama ntuna akambu wa dionyo la saki yʼakambu wa la kete, dia shu ndjala la nyumu ya ki, yʼuluwanyi ndu yʼololo la kete nye.

¹³ Tulungameli elungamelu kasu kʼotshoko la enelo ka lutumbu la Unyashungu asu a wuki ndu la Ushimbedi Jesu Kristu,

¹⁴ lakayakimo dikambu diasu, dia ndi ntutshungula uma lu kolo tshe, la dia mbedia antu wayali wandi hita, ndu dia saki kʼelimu wʼololo.

¹⁵ Utelaki antu akambu ane: akokomiyaki, ahunwelaki la wulu tshe. Untu takonyolaki.