Tito 1 - La Bible en Otetela (Bible K'Ekila) 1991

Ambutumela Moyo

¹ Paulu, ukambi a Unyashungu, utumami a Jesu Kristu, uku mbetawo ka esonami wa Unyashungu, la dia eyelu kʼakambu wa mete wedimi la ololo tshe,

² lu elungamelu ka lumu la pundju, le Unyashungu, laheyi mvuta kashi, uku akandalaki lu deku diaketi;

³ keli lu tena diandi, mbakandatenya diui diandi, diakawambisha dia mvutela antu uku weli olembe wa Unyashungu, Ushimbedi asu.

⁴ Le Tito, uku onʼami la mete lu mbetawo kasu: Ngandji ka mamba la ki kʼuma le Unyashungu Shesu la uma le Kristu Jesu Ushimbedi asu, wayali la ye!

Lama Nsonola Dikumanyi; Wetshelu le Amendji wʼEkelizia

⁵ Dia dikambu ne, mbakamakutshiki la Kerete, dia we nongosola akambu wakatshikala, la dia nsonola dikumanyi lʼusumba la usumba, uku akamakutela,

⁶ naka untu aha la unungu, leli la wadi otoi utu, ndu leli la anʼandi embetawudi, waha asongwamedi wa lundju la uhedia.

⁷ Dieli la umendji wʼekelizia dia ndjala aha la unungu, uku ulami a diango dia Unyashungu. Ndi hahumbi ndjala kanga lukanyi, umbuki a kele esadi, umbidjoki a wanu, okomwanyi, kana kanga saki kʼukundji.

⁸ Keli ndi atshelaki angendangenda ololo, ayali unangi wʼakambu wʼololo, ayali lʼutema a ki, atsheli antu tshe ololo, ayali uku untu lʼekila, ayakimeli.

⁹ Ndi akimeli diui dia kolamelu dieli uku wetshelu, ne dia ndi mbeya ndaka antu dietshelu diʼololo, la dia nembohaya akanga a tamu.

¹⁰ Ne dia akanga wʼuhedia efula weko, weli akanga wʼeyokayoka la akesanyi, ambahemi wʼehekeli wuleki

¹¹ Dieli la wo dia ndjiha enyo awo. Vo watulanyaka khumbu la khumbu, watetshaka antu akambu weli kema ololo dia mbaetsha, ne dia pusa kʼukundji.

¹² Umvutshi awo omotshi akati ati: Asi Kerete weko akanga a kashi nshi tshe, weko uku nyama ya kolo, weko akanga a dishi wa nende.

¹³ Diui ne dieli mete. Dia dikambu ne, ahunwelaki wulu, dia vo ndjala la wulu lu mbetawo.

¹⁴ Tawetawoki ekondo wʼasi Juda, la elembe wʼantu wakanganela uma lu akambu wa mete.

¹⁵ Akambu tshe weli pudipudi le akanga wʼetema wa pudipudi. Keli le antu wa kolo la waha la mbetawo, nduku dikambu dieli pudipudi lu ashu awo. Keli tukanyi tawo la khumʼetema yawo yambulanaka.

¹⁶ Vo watutaka vati: Shu mbeyaka Unyashungu, keli vo watuwangunaka lu etsha awo. Vo watuyalaka wononyi, ndu akanga wʼuhedia, hawututshaka nduku dikambu diʼololo.