Ruta 4 - La Bible en Otetela (Bible K'Ekila) 1991

Boaza Ambutshuka Ruta

¹ Boaza akatshu lʼeotwelo ka ngelu, lene akawalaka akambu, akatudjase leko. Enyi ku usi khumbu kandi lakandataka lu dikambu dia ukito ateti. Ndi akaweti ati: Usikami, uhuya! Uyudjase lane. Ku ndi akayi, akayudjase.

² Ku Boaza aketi dihangamendi dikumi dia lʼusumba, akawatela ati: Nyudjase lane. Ku vo wakadjase.

³ Ku ndi akatela untu, usi khumbu kandi, ati: Naomi, one lakakalula uma lu kete ya Moaba, nangaka nsundja etenyi ka kete kaki Elimeleke.

⁴ Okone dimi lakalangi nkumia dikambu ne le ye, dia nkutela nti: Utshunguli etenyi ka kete kene la ntundu kʼantu ane wudjashi lane ndu la ntundu ka dihangamendi dia wudja asu. Naka we nangaka nkitshungula, ukitshunguli. Keli nak: we halangi nkitshungula, umvuteli keli mbeye. Nduku untu ukina lukuki nkitshungula paka we, keli uma le ye ku dimi. Ku ndi akûkaluya diui ati: Dimi layukitshungula.

⁵ Ku Boaza akawutela ntu ati: Lushi layuyutshungula etenyi ka kete uma lʼanya wa Naomi, dieli la ye dia nkitana ndu la Ruta, usi Moaba, wadi aki onengesu, dia mbulwela luhanga landi.

⁶ Ku usi khumbu kandi ako akûkaluya diui ati: Dimi halangi nkitshungula dime, dimi ntukulanya etenyi kami kʼukito. Dime lambukusha wulu wa we nkitshungula lu dihuli diami. Dimi halangi nkitshungula.

⁷ Lu nshi yʼedjedja, dia nshikike dikambu dia ntshungula kana mengonya, asi Isariyele waki la etshelu kene. Diaki la untu omotshi nkulula lusabata landi, la lusha unyandi. Dikambu so mbaki omenyi lu Isariyele.

⁸ Ku usi khumbu kandi ako akawutela ati: Uyatshungwelito weme. Ku ndi akakulula lusabata.

⁹ Okone Boaza akatela dihangamendi la antu tshe ati: Nyu nyambuyala emenyi lu dikambu ne elo. Dimi lambusumba kene tshe kaki Elimeleke, la kaki Kiliyona, la kaki Malona, uma lʼanya wa Naomi.

¹⁰ Ndu layukitana la Ruta, usi Moaba, wadi aki Malona, dia mbulula luhanga landi, ne dia lukumbu la one lakavu latukushisho lʼatei wʼanangu, ndu dihuli diandi diatukutshikala hwe. Nyu nyambuyala emenyi lu dikambu ne elo.

¹¹ Ku dihangamendi la antu tshe waki laawo, waketawo vati: Shu tambuyala emenyi lu dikambu ne. Latuyalaka ete umuntu one, lamboto lu luudu laye, uku Ratshele la Lea, amantu ahendi wakatungi khumbu ka Isariyele Kongone lu Efarata, kuyali kanga lukumu lu Betelehema.

¹² Ana wayukusha Latuyalaka uma le usekaseka a umuntu one, kawete khumbu kaye uku khumbu ka Pereze, ona lakutela Tamara Juda.

¹³ Boaza akose Ruta wadi, akeyana la ndi. Ku Latuyalaka akasha Ruta diwutshi. Ndi akuti ona pami.

¹⁴ Ku amantu wakatela Naomi vati: Latuyalaka laki kunkutshika aha la ukito, atumbwami! Lukumbu la ona ako layuyala wuki lu Isariyele.

¹⁵ Ona ako kayulula lumu laye, ndu kayuyukete lu nshi yaye yʼusumbi, ne dia olokai aye latukukaka ngandji, luleki ana apami esambeli le ye, kuwutshi.

¹⁶ Naomi akose ona, akawembe, akolomia.

¹⁷ Amantu, asukanyi andi, wakati vati: Naomi ambuta ona pami! Ku wakawole lukumbu vati: Obede. Obede ako kakuti Jese, shi Davidi.

¹⁸ Tukanula ta Pereze tone: Pereze akuti Hezerona,

¹⁹ Hezerona akuti Rama, Rama akuti Aminadaba;

²⁰ Aminadaba akuti Nashona, Nashona akuti Salamona;

²¹ Salamona akuti Boaz; Boaza akuti Obede;

²² Obede akuti Jese, ku Jese akuti Davidi.