Ruta 3 - La Bible en Otetela (Bible K'Ekila) 1991

Ruta la Boaza hi Dihuli diʼEsuswelu

¹ Naomi, ukilu wa Ruta, akawutela ati: Onʼami, dimi nangaka nkuyangela dihuli dia ki dia we menaka olo.

² Ulungi, Boaza uku lakiye kame la ekambi andi, aha usikasu kendi? Ulungi, ndi utsha nfufula epunga lʼutshu one lu dihuli diʼesuswelu.

³ Oke, ushinuli, olote ahondo aye, kutshu utsha lu dihuli diʼesuswelu. Teneki le ndi edja ndu lamʼayundushidiya nde la no.

⁴ Ku lamʼayundoto dia ntetama, kendi dihuli diayundutetama ololo. Lʼokongo diku, koto loko, kutuwufule ulangitshi uma lʼekulu, ku we mbetama. Ku ndame ayukutela kene kayuyutsha.

⁵ Ku ndi akûkaluya diui ati: Dimi layutsha tshe uku ambuyumvutela.

⁶ Ruta akatshu utsha lu dihuli diʼesuswelu, akatshi akambu tshe wakawutela ukilu andi.

⁷ Boaza akali, akano, aki la ongenongeno. Ndi akatshu, akatetama la kuma kʼului wʼepunga. Ruta akatshu kyoke kyoke, akatuwufula ulangitshi uma lʼekulu, ku ndi aketama.

⁸ Lʼasa ndeki, Boaza akakashimo uma lu djo, akuki woma. Ndi akakutama, uki ku umuntu one lʼekulu andi.

⁹ Ndi akawumbula ati: We na? Ndi akûkaluya diui ati: Dimi Ruta, ukambi aye a umuntu. Kakiane unami, dimi ukambi aye, ne dia we eli omotshi lʼatei a wane wukuki nkitana la mi.

¹⁰ Ndi akûkaluya diui ati: Onʼami, Latuyalaka akotshokole! Wuhu wambuyutsha elo, ambuleka wuhu wakayatshi ntundu ololo, ne dia we hayangi elongo wʼapami a wulu, kana akanga wʼengonyi.

¹¹ Kakiane onʼami, tukaki woma. Dimi layukutshela akambu tshe wutshiye, ne dia wudja asu tshe mbeyaka vati: Umuntu lʼololo keye.

¹² Mete, dimi leli otoi omotshi lʼatei a wane wukuki nkitana la ye, keli usi khumbu kasu omotshi eko lundeki dia nkitana la ye.

¹³ Etami lane elo. Lui, naka ndi ayulanga nkitana la ye, kawo ndi kakose. Keli naka ndi hulanga nkitana la ye, Latuyalaka keli omenyi! dimi layukosa. Etami lane edja ndu pindju.

¹⁴ Ndi akatshikala etami lu ekulu andi edja ndu pindju. Ndi aketo la djikidiki. Boaza akati ati: Antu watukeya vati: Umuntu omotshi akotwe lu luudu lʼesuswelu.

¹⁵ Ndi akawutela ati: Ela dihondo diaye dimotshi, udikimeli. Ndi akadikimela, ku Boaza akawudjela tediko tusamalu tʼepunga, akawembiawo. Ku ndi akakalula utsha lʼusumba.

¹⁶ Ruta akakumi le ukilu andi. Ku ndi akawumbula ati: Onʼami, we ambuya? Ku ndi akusanyia akambu tshe wakutshela Boaza.

¹⁷ Ndi akawutela ati: Ndi akambisha tediko tusamalu tʼepunga ene, ati: Tukalulaki anya atu le ukilu aye.

¹⁸ Ku Naomi akawutela ati: Onʼami, utukudjase edja ndu we ambeya okone ayukumela dikambu ne. Pami kene hutshikala ki elo, tshikima ndi ambushidiya dikambu ne.