Romo 9 - La Bible en Otetela (Bible K'Ekila) 1991

Lunyangu la Paulu ne Dia Asi Isariyele

¹ Dimi lambuta mete lu Kristu, halati kashi. Khumʼutema kami keko omenyi ami lu Nyuma kʼOlolo, ati:

² Dimi la lokonyo la wuki, ndu lunyangu lahashili lʼutema ami,

³ ne dia dime lutuyalombelaka mananu, ndu lutukakitwana la Kristu lu dikambu diʼasikami wakuto la mi wudja otoi.

⁴ Vo mbeli asi Isariyele, wane weli ana wa luta, wa lutumbu, wa tuseki, wa eshelu kʼelembe, wʼotemwelo, ndu wʼalaka.

⁵ Tshetshe yawo la wauhu awo wakatongo lu wudja awo. Kristu eko kanula yawo lu dimba. Unyashungu leli ladiku dia tshe, atumbwami pundju! Ayali osoku!

Unyashungu Ambosonola Antu Andi

⁶ Dikambu so hadiututela ati: Diui dia Unyashungu diambuyala uyalayala. Ne dia aha wane tshe weli tukanula ta Isariyele, mbeli asika Isariyele.

⁷ Ndu aha wane tshe weli tukanula tʼAbarahama, mbeli anʼandi, ne dia vo wakatongo uma le ndi. Wakafundi vati: Uma le Isariyele, kayotongo tukanula taye.

⁸ Dikambu so ntenyaka ati: Aha waku wakuto lu dimba mbeli ana wa Unyashungu, keli ana wa daka mbatalemaka uku anʼandi.

⁹ Diui dia daka diakati ati: Dimi layukalula lu etena kene, ku Sara ayuyala la ona pami.

¹⁰ Osoku mbaki ndu le Rebeka lakatshu diemi la tshesu Isaka ndame —

¹¹ ne dia kuyanga ana watuto ndu watatshi ololo kana kolo, ne dia esangweyu kʼesonwelo ka Unyashungu nshikikala, aha uma lu leta landi,

¹² wakatela Rebeka vati: Umba ayukambela shaku ulimu.

¹³ Ku dio diakayala uku akafundama ati: Dimi lakalangi Jakoba, keli lakahetsha Esau.

Akambu wʼOlolo wʼElembe la wa Mbetawo Wambutshikitana

¹⁴ Ku ukundi ayututa na? Akambu wa kolo weko le Unyashungu? Aha osoku.

¹⁵ Ndi akatela Mose ati: Dimi layuka one lukami ketshi ketshi, ndu layuka ote vuvu le one lukami ote vuvu.

¹⁶ Okone dikambu ne hadiekama lulangu lʼuntu kuyanga dia elimu andi, keli dio mbekamaka ketshi ka Unyashungu.

¹⁷ Afundelu wakatela Farayo vati: Dimi lakakunyia paka lu dikambu ne dia dimi menya antu wulu ami uma le ye, dia lukumu lami nyangana lu kete tshe.

¹⁸ Okone ndi mbukaka one lalangandi ketshi. Ndi atukikitshaka one lalangandi.

¹⁹ We ayumumbula wati: Dikambu kuna diasondjasondjandi antu la dikambu? Akona eya nshimba lulangu landi?

²⁰ Keli we untu, akona eye, dia we nkaluya Unyashungu diui? Engo kakatungama mbeyaka mumbula one lakakitungi ati: Okoko wana wakayantungi okone?

²¹ Undi, ukingi a puki kema la wulu wa ntsha kene kalangandi la diwumba, dia nkinga puki ka nemo, ndu puki ku puki uma lʼukama otoi wa diwumba?

²² Kayututa na, naka Unyashungu, latulangaka ntenya kele kandi ndu tulimbitshiya wulu andi, akayala la memakana ka mamba le ditungatunga dia kele kandi diakatungama ne dia nanyema?

²³ Kayututa na, naka ndi mbetawoka ntenya ongonyi wa lutumbu landi lu ditungatunga dia ketshi, diakandatalongosodi ne dia lutumbu?

²⁴ Osoku mbakandateti, aha paka uma lʼatei wʼasi Juda, keli ndu uma lʼatei wʼasi wedja.

²⁵ Uku akandati lu Hoseya ati: Wane waki kundjala wudja ami, Dimi layuwaeta nti: Wudja ami, La one laki kundjala ulangimi, Dimi layuweta nti: Ulangimi ami.

²⁶ La lu dihuli diakawatelaka antu vati: Nyu kema wudja ami, Kayuwuwaeta vati: Ana w Unyashungu a lumu.

²⁷ Ndu Isaya akati diui dia wulu lu dikambu dia Isariyele ati: Kuyanga asi Isariyele wayuyala efula uku lokongo la lʼumamu wʼashi a waki, paka etenyi ketu kayushimbamela.

²⁸ Ne dia Khumadiondio ayushidiya kene tshe kakandasanguya ntsha la kete esadi.

²⁹ Uku akati Isaya ntundu ati: Utunduyala Khumadiondjo Kanga lulimbilimbi Kuntutshikela tukanula, Tshiki shu takayala uku Sodoma, Tshiki takafani la Ngomora.

³⁰ Ya ukundi ayututa? Shati: Asi wedja waki kundjela akambu wʼololo ntundu, wakayukundja akambu wʼololo, ako watuyakaka uma lu mbetawo.

³¹ Keli asi Isariyele wakayelaka ololo wʼuma lʼelembe, kunkuma lu yediko ya elembe ako.

³² Dikambu kuna? Ne dia vo kumbayela uma lu mbetawo, keli uma lʼetsha. Vo wakatakana lu dive dia ntakanya,

³³ uku akafundama ati: Enda, lambukitsha dive dia ntakanya lu Siona, Dive dia wuki dia djewoki. Ku one lawetawo, hutshama sonyi.