Romo 8 - La Bible en Otetela (Bible K'Ekila) 1991

Kristu Jesu Ambututshungula; Kakiane Kema Dianyelu

¹ Kakiane nduku dianyelu dieko le wane weli le Kristu Jesu,

² ne dia elembe wa Nyuma ka lumu le Kristu Jesu wakantshungula uma lʼelembe wʼakambu wa kolo ndu wa nyoi.

³ Unyashungu akatshi akambu waki elembe kumbeya ntsha ne dia dimba diakawaete weodu. Ndi akatumi Onʼandi hita lu dimba diufanyi la dimba dia kolo, dia ndjala ulambu wʼekesanelu. Ndi akamia kolo lu dimba

⁴ dia nshidiya diui diakati elembe lu etema asu. Okone shu hatutokendakendaka lu akambu wa dimba, keli tatokendakendaka lu akambu wa Nyuma.

⁵ Waku watuyelaka akambu wa dimba, watukanaka akambu wa dimba. Keli waku watuyelaka Nyuma, watukanaka akambu wa Nyuma,

⁶ ne dia tukanyi ta dimba teli nyoi, keli tukanyi ta Nyuma teli lumu la ki.

⁷ Tukanyi ta dimba teli utunyi wa Unyashungu, ne dia to hatetawo ndjala la tshina diʼelembe wa Unyashungu. Ndu to hateyi ntsha osoku.

⁸ Wane watuyelaka akambu wa dimba, haweyi ngenyangenya Unyashungu.

⁹ Keli nyu nyaha lu akambu wa dimba, nyeko lu akambu wa Nyuma, naka Nyuma ka Unyashungu atudjaseka lʼetema anyu. Naka untu kema la Nyuma ka Kristu, keti ndi kema la ndi.

¹⁰ Naka Kristu eko lʼetema anyu, kuyanga alimba anyu wakavu ne dia kolo, etema anyu weko la lumu ne dia ololo.

¹¹ Naka Nyuma ka one lakulula Jesu uma lu nyoi eko lʼetema anyu, keti one lakulula Kristu Jesu uma lu nyoi ayusha ndu alimba anyu wukuvo lumu uma le Nyuma kandi keli lʼetema anyu.

Nyuma ka Nyuhiluya Ana

¹² Anyasu, shu hatukulami dibasa le dimba, dia shu ndjela akambu wa dimba —

¹³ Naka nyu nyatuyelaka akambu wa dimba, keti nyu nyayuvo. Keli naka nyu nyayudiaka etsha wa dimba la wulu wa Nyuma, nyu nyayuyala lu lumu.

¹⁴ Ne dia wane tshe watolombwamaka le Nyuma ka Unyashungu mbeli ana wa Unyashungu.

¹⁵ Nyu kunungula nyuma ka lohombo ka nyukaluya lu woma. Keli nyu nyakalungula nyuma ka nyete ana wa luta. Uma lu dikambu so, mbatutetaka Unyashungu shati: Aba! Shesu!

¹⁶ Nyuma ambuyaete omenyi kame la nyuma yasu ati: Ana wa Unyashungu mbesu.

¹⁷ Naka shu tambuyala ana, keti ndu ekito mbesu. Shu teko ekito wa Unyashungu, ndu ekito kame la Kristu; naka shu tatusuwaka kame la ndi, keti tayutumbwama kame la ndi.

Daka DiʼEtshungwelu

¹⁸ Dimi lambukana nti: Asui wa lʼetena kene hawedima la lutumbu layenama le su lʼokongo diku.

¹⁹ Ne dia ditungatunga tshe diatulungamelaka la pusa ka wulu dia mena enelo kʼana wa Unyashungu.

²⁰ Ditungatunga diakalembiama lu akambu wʼanyanya, aha ne dia lulangu ladio, keli ne dia lulangu la one lakadilembia, lakadisha elungamelu ati:

²¹ Ditungatunga diayutshungwama uma lu lohombo la ehondelo, dia mboto lu ndjadjasela ka lutumbu la ana a Unyashungu.

²² Shu mbeyaka shati: Ditungatunga tshe diatukhumaka akhumu, ndu diatutataka nyono lu diutelu edja ndu kakiane.

²³ Aha dio ntu, keli ndu shu wane weli la elonga wa Nyuma, tatukhumaka akhumu ndu shu lamʼesu lu nkunga dia ndjala uku ana wa luta, etshungwelu kʼalimba asu;

²⁴ ne dia uma lu elungamelu kako, kakatashimbamela. Keli elungamelu kenama lu ashu, kema elungamelu. Untu akona atulungamelaka kene kenandi?

²⁵ Keli naka shu tatulungamelaka kene kahatenyi, ku shu tatukikungelaka lʼeteti.

²⁶ Osoku mbatutukimanyiaka Nyuma lu weodu asu, ne dia shu hatuteyaka kene kukukisu nomba lu alombelo asu. Keli Nyuma ndame atutoteketelaka la emumu waheyama mvuta.

²⁷ One latushishimaka etema mbeyaka tukanyi ta Nyuma ne dia Nyuma atonteketelaka Ekilami uku lulangu la Unyashungu.

²⁸ Shu mbeyaka shati: Unyashungu atukambaka ololo kame la wane watuwukaka ngandji, wane wakandeti uku esangweyu kandi.

²⁹ Ndi akasonola wane wakandeyi ntundu, dia vo ndjala uku utundu wa Onʼandi dia Onʼandi ndjala yatakundu lʼatei wʼanangu efula.

³⁰ Ndi aketi wane wakandasonola ntundu. Ndi akayindja wane wakandeti. Ku ndi akatumbula wane wakandayindja.

“Akona Ayeya Ntanganya Uma lu Ngandji ka Kristu?”

³¹ Kayututa lu akambu ane? Naka Unyashungu eko la su wedi ayeya ntahamela na?

³² One laki kumpandja Onʼandi hita, keli akukimo dikambu diasu, ukundi ahandutusha ndu diango tshe kame la ndi?

³³ Akona ayosongwela esonami wa Unyashungu? Tuku Unyashungu ndame katuyindjaka antu.

³⁴ Ku akona ayuwamia? Kristu Jesu akavu, ku akulo uma lu nyoi. Ndi eko lu lunya la pami la Unyashungu, atutoteketelaka.

³⁵ Akona ayeya ntanganya uma lu ngandji ka Kristu na? Undi, fono, shoko, asui, ndjala, utakataka, akambu wa lʼasa eku la nyoi, kana yombo ya ta?

³⁶ Uku akafundama ati: Lu dikambu diaye katutudiakemaka yanyi tshe, Ndu katutalemaka uku ekoko wa ndjakema.

³⁷ Kema, lu akambu aso tshe, kesu andeki wʼutamanya ne dia one lakatulangi.

³⁸ Dimi lambetawo nti: Aha nyoi, kuyanga lumu, kuyanga andjelo, kuyanga waulelu, kuyanga akambu wa kakiane, kuyanga akambu wayayi, kuyanga wulu,

³⁹ kuyanga utali, kuyanga ohongo, kuyanga engo kekina kakatungama kayeya ntanganya uma lu ngandji ka Unyashungu keli le Kristu Jesu Khumesu.