Romo 4 - La Bible en Otetela (Bible K'Ekila) 1991

Davidi la Abarahama Mbeli Tulimbitelu ta Dikambu Ne

¹ Kayututa na dia tshesu Abarahama?

² Naka Abarahama akayindjama uma lu etsha andi, keti ndi la dikambu dia ndjatumbula. Keli aha le Unyashungu.

³ Ukundi wata afundelu? Vati: Abarahama aketawo Unyashungu, la wakamalela mbetawo kako uku ololo andi.

⁴ Difutu le untu latutshaka ulimu hadialema uku ushasha a ngandji ka mamba, ku diambolema uku dibasa.

⁵ Keli le untu lahatutshaka ulimu, ku ndi mhetawoka one latuyindjaka akanga wʼuhedia, mbetawo kandi kambalema uku ololo andi.

⁶ Ndu Davidi akatshokola untu lakadiya Unyashungu ololo waha uma lʼetsha andi, ati:

⁷ Wane weli la kolo yawo yambudimanyiama, La uhedia awo wukumbami, weko la otshoko.

⁸ Untu lahadiya Khumadiondjo kolo yandi, eko la otshoko.

⁹ Undi, otshoko one watuyalaka paka le wane wakahema uhekeli, kana ndu le waku waki kumbahema uhekeli? Ne dia shu mvutaka shati: Mbetawo kʼAbarahama kakalema le ndi uku ololo andi.

¹⁰ Ukundi akawawalela mbetawo kandi? Undi, wakawalelato la ntundu kana lʼokongo wʼahemelu kandi kʼuhekeli? Aha lamʼakindi umbahemi wʼuhekeli, keli lamʼakindi atahema uhekeli.

¹¹ Ndi akahema uhekeli dia ahemelu kako ndjala uku djimbitelu ya mbetawo kakayala la ndi ntundu ndi atahema uhekeli. Dikambu diako diakawete lotshetshe lʼakanga a mbetawo tshe kuyanga vo hawahema uhekeli, ndu dia ololo mbalema le wo.

¹² Dikambu diako diakawete lotshetshe lʼambahemi wʼehekeli le wane wambahema uhekeli watokendakendaka lu wanya wa mbetawo kako ka tshesu Abarahama, ntundu ndi atahema uhekeli.

¹³ Vo kundaka Abarahama la tukanula tandi ukito wa la kete, uma lʼelembe, keli uma lʼololo wa mbetawo.

¹⁴ Naka waku watuyelaka elembe mbeli ekito, ku mbetawo kambuyala uyalayala ndu daka diako diambuyala anyanya.

¹⁵ Elembe watutungaka kele, keli lene aha elembe, ediakelu kʼelembe kemako.

¹⁶ Dia dikambu so, daka diatuyalaka uma lu mbetawo dia dio mbekama lu ngandji ka mamba, la dia dio nshiki kala — le tukanula tʼAbarahama tshe. Aha paka le waku watuyelaka elembe, keli ndu le waku weli la mbetawo uku Abarahama, ne dia ndi keli lotshetshe lasu shu tshe.

¹⁷ Uku akafundama ati: Dimi lambukete lotshetshe la wedja efula. — Ndi keli lotshetshe lasu lu ashu wa Unyashungu ako latushaka wavo lumu, ndu latutungaka diango diahatayala, dia dio ndjala.

¹⁸ Ndi akatetemala nungamela, kuyanga etena kʼelungamelu kambeta, dia ndi ndjala lotshetshe la wedja efula, uku diui diakanduki ati: Wuhu uku mbayuyala tukanula taye?

¹⁹ Ndi konemba lu mbetawo kandi. Ndi kumbidja tukanyi lu dimba diandi diʼusumbi a lukusumbi, — ne dia ndi aki uku deku lukama — ndu dia Sara aki ekumta.

²⁰ Ndi kunkandakanda lʼuhedia, keli ndi akendaka daka dia Unyashungu, akakikitala lu mbetawo, akatumbula Unyashungu.

²¹ Ndi aketawo lʼutema tshe ati: Unyashungu mbeyaka nshidiya dikambu diakandalaki.

²² Uma lu dikambu so, mbakawawalela mbetawo kandi uku ololo andi.

²³ Keli aha lu dikambu diandi ndame, kufundami ati: Mbetawo kʼuntu kambalema uku ololo andi.

²⁴ Keli ndu shu, wavutalela mbetawo kasu uku ololo asu, le su shu wane watetawoka Unyashungu lakulula Jesu Khumesu uma lu nyoi.

²⁵ Jesu ako akakimwama lu nyoi ne dia kolo yasu, ndu akulo dia shu nyindjama.