Romo 16 - La Bible en Otetela (Bible K'Ekila) 1991

Paulu Ambuwaewula Dia Febi

¹ Dimi lambuluwula kadiyesu Febi, ukambi wa lʼekelizia ka la Kenekiya, le nyu,

² nti: Nyulunguli lʼatei anyu lu lukumbu la Khumadiondjo, uku atuwulungula ekilami. Kanyukimanyiaki lu akambu tshe wayunduhumbaka uma le nyu. Ne dia ndi aki ukimanyidi wʼantu efula, akankimanyia ndu dime.

Paulu Ambatumela Moyo

³ Nyumbishiya Piriska la Akula, anyami ekambi lu Kristu Jesu, moyo.

⁴ Vo wakasundja nyumu yawo dia nshimbela lumu lami. Okone aha dime utu, keli dimi la ekelizia tshe wʼasi wedja tambuwauka lusaka.

⁵ Nyumbishiya ndu asi Ekelizia watusanganaka lu luudu lawo moyo. Moyo ndu le ulangimi ami Epayineto. Ndi kaki ulua ami a ntundu lu Asiya.

⁶ Nyumbishiya Mariya, lakakambaka ulimu wulu lu dikambu dianyu, moyo.

⁷ Nyumbishiya Andaroniko, la Juniya, wane wuto la mi la anyami asi lukanu, moyo. Vo weko akanga a lukumu lʼatei wʼatumami, ndu wakayala asika Kristu ntundu kami.

⁸ Nyumbishiya Apiliyato, ulangimi ami le Khumadiondjo, moyo.

⁹ Nyumbishiya Urubano, unyasu ukambi lu Kristu, la ulangimi ami Staku, moyo.

¹⁰ Nyumbishiya Apele, laketawoma lu Kristu, moyo. Moyo ndu le wa khumbu ka Aristobulo.

¹¹ Nyumbishiya luto la mi Herodiyana, moyo. Moyo ndu le wa lu khumbu ka Narakiso weli le Khumadiondjo.

¹² Nyumbishiya Turufina la Turufosa, watukambaka ulimu lu dikambu dia Khumadiondjo, moyo. Moyo ndu le Perisi, ulangimi lakakambi ulimu efula lu dikambu dia Khumadiondjo.

¹³ Nyumbishiya Rufo, onemiami lu dikambu dia Khumadiondjo, ndi la nyangu, ako leli nyomi, moyo.

¹⁴ Nyumbishiya Asukirito, Filengona, Hereme, Patoroba, Herema, la anengesu weli lʼatei awo, moyo.

¹⁵ Nyumbishiya Filolongo la Juliya, Nereo la kadiyendi, la Olipa la ekilami tshe weli kame la wo, moyo.

¹⁶ Nyushani moyo wʼekila lʼanya. Ekelizia tshe wa Kristu wambunyutumela moyo.

Paula Ambuwaewula Dia Mbatana la Akambu wʼUhedia

¹⁷ Analingu, dimi lambunyosengasenga nti: Nyewo waku watutungaka diatanyelu la etakanya wutshikitanyi la akambu wakanyetsha amvutshi. Nyangani uma le wo.

¹⁸ Antu wa wuhu oso, hawutukambelaka Khumesu Kristu ulimu, keli vo watukambelaka saki yawo hita. Vo watukesaka etema a waku waha la tumba la aui wa mpe, la wa diandu.

¹⁹ Lukumu lʼukitanyia anyu lambudiangana le antu tshe. Okone dimi ndjalaka la ongenongeno too lu dikambu dianyu. Keli dimi nangaka nyu ndjala akanga a yimba lu akambu wʼololo, la akanga a dinginya lu akambu wa kolo.

²⁰ Kemʼedja, Unyashungu a ki ayuminula Satana la tshina diʼekulu anyu. Ngandji ka mamba ka Khumesu Jesu Kristu kayali la nyu!

Engenyi wa Paulu Wambatumela Moyo

²¹ Timote, unyami ukambi, ambunyutumela moyo, ndu Lukiyo, Jasona, la Sosipate wane wuto la mi.

²² Dimi Teretiyo, ufundji a mukanda one, lambunyutumela moyo lu lukumbu la Khumadiondjo.

²³ Ngayo, kanga luudu luhangimi lone, atusanganaka asi ekelizia tshe, ambunyutumela moyo. Erasto, ulami a diango diʼusumba, ambunyutumela moyo, ndu Kwarato, onengesu. —

²⁴ Ngandji kamamba ka Khumesu Jesu Kristu kayali la nyu, nyu tshe! Ayali osoku!

Aui wa Ndjihelu wa Ntumbula Unyashungu

²⁵ Unyashungu mbeyaka nyushikike uma lu lukumu lʼololo lami, uma lu esambishelu ka Jesu Kristu, ndu uma lʼenyelo kʼakambu wakashama deku efula.

²⁶ Akambu ako wakashama, wambeyama kakiane le wedja tshe dia vo ndjala la ukitanyia a mbetawo uma lʼafundelu wʼamvutshi ndu uma lu didjangu dia Unyashungu a pundju.

²⁷ Okone lutumbu layali le Unyashungu kanga yimba, uma le Jesu Kristu pundju pundju! Ayali osoku!