Romo 15 - La Bible en Otetela (Bible K'Ekila) 1991

Tukimanyanyiani

¹ Shu wane weli la wulu, dieli la su dia memba wutshu a wane weli weodu, aha dia shu ndjangenyangenya shu shame.

² Untu lʼuntu lʼatei asu angenyangenya unyandi lu akambu weli ololo, weya mbudia.

³ Ne dia Kristu kundjangenyangenya ndame. Keli uku akafundama ati: Tengo yakawakotengaka, we Unyashungu, yakayala lʼote ami.

⁴ Akambu tshe wakawafundi ntundu wakafundama dia ntulakanya dia shu ndjala la elungamelu uma lu etetemalu la uma lu ekikitshelu ka lu afundelu.

⁵ Unyashungu wʼetetemalu ndu wʼekikitshelu anyukimanyia dia nyu mbukana lʼutema otoi lu yediko ya Kristu Jesu,

⁶ dia nyu tshe ntumbula Unyashungu, Shi Khumesu Jesu Kristu, lʼutema otoi.

⁷ Okone nyulungwami uku akanyulungula Kristu dia ntumbula Unyashungu.

⁸ Dimi lambuta nti: Kristu akayala ukambi wʼambahemi wʼuhekeli dia mbaenya mete ka Unyashungu la dia nkikitsha alaka wakalaki Unyashungu watshesu,

⁹ dia asi wedja ntumbula Unyashungu dikambu dia ketshi kandi. Uku akafundama ati: Okone dimi layukandula lʼatei wʼasi wedja, Layimbelaka lukumbu laye esambu.

¹⁰ La ntu ati: Nyu asi wedja, nyongenengene kame la wudja andi.

¹¹ Ndu ntu ati: Nyu asi wedja tshe, nyanduli Khumadiondjo; Ee, nyu antu tshe, nyuwanduli!

¹² Ndu Isaya akati ati: Dimonga diayutumba uma le Jese. Ndi ayunela dia mbulela asi wedja. Asi wedja wayulungamela.

¹³ Unyashungu wʼelungamelu anyuludia too lʼongenongeno la ki lu mbetawo, la dia nyu ndula too lʼelungamelu lu wulu wa Nyuma kʼOlolo.

Paulu Ambuwatela Dia Ulimu Andi la Lokendo Landi

¹⁴ Nyu analingu, dimi lambetawo nti: Nyu nyambulula too lʼakambu wʼololo. Nyambuludiama la bewu tshe, nyu nkukaka ndakana nyame.

¹⁵ Keli lu akambu me amotshi, dimi lambunyufundela la dihunga uku untu lanyuhula ntu. Uma lu ngandji ka mamba kakambuki Unyashungu,

¹⁶ dimi lambuyala usambisha wa Jesu Kristu le asi wedja. Lʼesambishelu kako ka lukumu lʼololo la Unyashungu kambuyala ulambu wʼasi wedja nungwama la nkidiama le Nyuma kʼOlolo.

¹⁷ Dimi latuyandulaka lu lukumbu la Kristu Jesu, ne dia ulimu ami lu dikambu dia Unyashungu.

¹⁸ Dimi halangi nteketa la nyu akambu akina, paka akambu wakatshi Kristu uma le mi dia mbetawuya asi wedja, dia vo ndjala la ukitanyia lu aui ndu lʼetsha.

¹⁹ Uma lu wulu wa tulimbitelu la akambu wa mamba, uma lu wulu wa Nyuma kʼOlolo ka Unyashungu, mbakamadianganya lukumu lʼololo la Kristu uma la Jerusalema, pulu ndu lʼutshimba wa Iluriko.

²⁰ Okone dimi lakasanguya dia nsambisha lukumu lʼololo lone, tshikima lu ahuli wakiwo kunyimula lukumbu la Kristu. Akayala osoku, diaha dimi mpika ladiku dia etshina kakahiki untu ukina.

²¹ Keli uku akafundama ati: Wane wakiwo kumvutela, wayena; La wane waki kumbuka, wayumana fundu.

²² Oso eli akambu wakanshimbi tena efula dia dimi ndja le nyu.

²³ Keli kakiane dimi nduku la dikambu dianshimba lu beke ne ntu. Dimi laki la saki deku efula ka ndja le nyu.

²⁴ Dimi la elungamelu ka nyena lamʼayumeta utsha lʼEspanye, ndu ka nyu ntshindelami lamʼayumunduya saki ka ntshikala lʼatei anyu.

²⁵ Kakiane dimi lutatshu utsha la Jerusalema dia ntukimanyia ekilami.

²⁶ Ne dia asi Makedoniya la asi Akaya wakalangi nkahanya diango le akanga a weula wa lʼatei wʼekilami wa la Jerusalema.

²⁷ Mete, osoku mbakawalangi lʼetema awo. Vo weli akanga a dibasa le wo. Naka asi wedja wambulungula etshoko wʼetema kame la wo, dieli la wo dia mbakimanyia lu ehumba awo wa dimba.

²⁸ Lamʼayumushidiya ulimu wa mbasha eshasha eso, dimi layutakumi le nyu lamʼayumeta utsha lʼEspanye.

²⁹ Dimi mbeyaka nti: Lamʼayumuya le nyu, dimi layuya luludiami too la otshoko wa Kristu.

Paulu Ambasengasenga Dia Vo Mbolombela Unyashungu

³⁰ Analingu, dimi lambunyosengasenga uma le Khumesu Jesu Kristu la uma lu ngandji ka Nyuma nti: Nyuyali kame la mi lu dombelo! Nyonombele Unyashungu,

³¹ dia dimi mpanda uma le akanga wʼuhedia wa la Judiya, ndu dia ekilami ngenangena lʼulimu ami wa la Jerusalema.

³² Nyonombele dia dimi nkuma lʼatei anyu lʼongenongeno, naka oso eko lulangu la Unyashungu, ndu dia dimi ntukuyumuya lʼatei anyu.

³³ Unyashungu a ki, ayali kame la nyu tshe. Ayali osoku!