Romo 13 - La Bible en Otetela (Bible K'Ekila) 1991

Nyukitanyia Aui wʼEmbuledi

¹ Untu tshe alembele embuledi andi. Nduku diulelu diaha uma le Unyashungu, ne dia waulelu tshe weli uma le Unyashungu.

² Okone untu tshe lahendwela umbuledi, ambuhedia olembe wa Unyashungu. Wane watuyalaka la uhedia, watuyayangelaka unungu.

³ Embuledi hawutsha wane watutshaka ololo woma, paka wane watutshaka kolo. We halangi mbuka umbuledi woma? Utshaki ololo, ku ndi ayukandulaka,

⁴ ne dia ndi eko ukambi wa Unyashungu, dia nduwanya ololo aye. Keli naka we mungaka, ukaki woma, ne dia ndi hembe yombo ya ta wembemba. Ndi eko ukambi a Unyashungu, dia nsuya untu latutshaka kolo.

⁵ Okone dieli la nyu dia ndjala la ukitanyia, aha paka uma lu woma wʼasui utu, keli ndu ne dia khumʼutema.

⁶ Ndu lu dikambu diako mbatunyufutaka elambu. Embuledi weko tundjihu ta Unyashungu, mbatuwutshaka elimu eso.

⁷ Nyusha antu tshe diango diahumbawo nungula: ulambu le one lahumba nungula elambu, okongo le one lahumba nungula okongo, woma le one lahumba mbukama woma, la kenemo le one lahumba nemiama.

Ngandji Eli Ekukelu kʼElembe

⁸ Tanyuyalaki la dibasa le intu, paka dibasa dia mbukana ngandji. Ne dia untu latukaka unyandi ngandji, ambukukia elembe.

⁹ Ne dia elembe ene: Tunanaki, Tudiakaki, Tuvaki, Tokomiyaki, ndu usikʼolembe tshe, wambusanganyema lu diui ne ati: Ulangi unyaye uku ayalangaye.

¹⁰ Ngandji hatshela unyandi kolo. Okone ngandji eli ekukelu kʼelembe.

Panda Aya Suki

¹¹ Ladiku dia dikambu ne, nyu mbeyaka ushidi akona weko. Etena ka nyu memo uma lu djo, kambukuka kakiane. Ne dia kakiane, panda kambuleka ndjala suki la su, uleki etena kakatetawo.

¹² Udjima utsha nkumbo, unya utsha mputo. Okone tukululi etsha wa udjima, tolote eloto wa ta wa yanyi.

¹³ Tokendekende ololo, uku atokendakendaka antu la yanyi, keli aha lʼongenongeno wʼakambu wa kolo, aha lʼediwelu ka wanu, aha la munanyi la akambu wa sonyi, ndu aha la lundju la kandjema.

¹⁴ Nyolote Khumadiondjo Jesu Kristu. Tanyutshikelaki saki ya kolo dihuli lu alimba anyu.