Romo 10 - La Bible en Otetela (Bible K'Ekila) 1991

Etunamelu kʼAsi Isariyele Eko Dikambu Diawo Hita

¹ Anyasu, lulangu lʼutema ami la dombelo diami le Unyashungu lu dikambu dia Isariyele eli dia vo nshimbamela.

² Dimi leko omenyi awo lu dikambu ne nti: Vo weko la saki le Unyashungu, keli to kema kʼuma lu yimba.

³ Ne dia vo kunimbitela ololo wa Unyashungu, keli vo wakalangi nshikike ololo awo hita. Vo kundjakitshakitsha la tshina diʼololo wa Unyashungu,

⁴ ne dia Kristu keli ekumelu kʼelembe lu ololo le untu tshe lawetawo.

⁵ Mose akafundi ati: Untu latutihaka akambu wʼololo weli lʼelembe ayuyala la lumu uma lu akambu wʼololo ako.

⁶ Keli ololo wʼuma lu mbetawo mbata okone ati: Tuyambulaki lʼutema wati: Akona ayumbela lʼulungu? (nkadimula ati: Dia ntuhuluya Kristu uya la kete)

⁷ kana ati: Akona ayuhulo lu ohongo? (nkadimula ati: Dia ntutundja Kristu umalʼudimu).

⁸ Keli kata ololo ako na? Vati: Diui dieko lasuki la ye, dieko lasuki lʼunyo aye ndu lʼutema aye, (nkadimula ati: Diui diako dia mbetawo, mbatutusambishaka).

⁹ Diui diako ati: Naka we ayushula lʼunyo aye wati: Jesu keli Khumadiondjo, ndu naka we ayetawo lʼutema aye wati: Unyashungu akawulula uma lu nyoi, ku we ayushimbamela.

¹⁰ Ne dia untu letawo lʼutema andi, atuyindjamaka; la one lashula lʼunyo andi, atushimbamelaka.

¹¹ Afundelu mvutaka ati: Untu tshe layuwetawo, hutshama sonyi,

¹² ne dia kema utshikitanu lʼasa usi Juda la usi Ngirika, ne dia Khumadiondjo kako kame, keli Khumadiondjo kʼantu tshe. Ndi atukimoka engonyi andi le wane tshe watuwetaka.

¹³ Untu tshe latetaka lukumbu la Khumadiondjo, ayushimbamela.

¹⁴ Keli, ukundi ayuweya mbeta one lahawatetawo? Ukundi eyawo mbetawo, lamʼahawatuki lukumu landi? Ukundi eyawo mbuka, lamʼahawo la usambisha?

¹⁵ Ukundi eyawo nsambisha, lamʼahawatatumama? Uku akafundama ati: Ndi amena weli ekulu a wane wasambisha lukumu lʼololo li!

¹⁶ Keli vo tshe kumpukama lukumu lʼololo. Isaya akati ati: Khumadiondjo, akona ambetawo diui diakatawutela?

¹⁷ Okone mbetawo katuyakaka lu diukelu, la diukelu uma lu diui dia Kristu.

¹⁸ Keli lambumbula nti: Vo kumbuka? Mete, vo wakuki; ne dia: Wetshelu awo wakadiangana lu kete tshe, La aui awo pulu ndu lu kuma yʼandja.

¹⁹ Keli dimi lambumbula ntu nti: Isariyele kumbeya uka? Mose akati ntundu ati: Dimi layunyutsha kandjema le wudja waha wudja; Layunyutsha kele le wudja wʼakanga a dinginya.

²⁰ Ku Isaya kanga dihunga dia mamba kata ati: Dimi lakatanema le wane waki kunyangami, Lakene le wane waki kumumbulami.

²¹ Keli lu dikambu dia Isariyele mbakandati ati: Dina latusimbulaka anya ami yanyi tshe utsha le antu weli la ehedia la tamu.