Romo 1 - La Bible en Otetela (Bible K'Ekila) 1991

Paulu Ambuwaemula

¹ Dimi Paulu, ukambi wa Jesu Kristu, laketama dia ndjala utumami, wukidiami dia mvuta lukumu lʼololo la Unyashungu.

² Lukumu lako mbakalaki Unyashungu ntundu lu aui wʼamvutshi andi wa lu afundelu wʼekila,

³ lu dikambu dia Onʼandi, lakutama uku untu le kanula ya Davidi,

⁴ lako laketama Onʼa Unyashungu lu wulu wedimi la Nyuma kʼakambu wʼekila, lu eulwelu kandi kʼuma lu nyoi. Ndʼako keli Jesu Khumadiondjo.

⁵ Uma le ndi kakatukama ngandji ka mamba ndu kakatalungula ulimu wʼutumami wa mbete antu wa wedja tshe akanga wʼukitanyia wa lu mbetawo ka lu lukumbu landi.

⁶ Ndu nyu weli lʼatei awo, nyaketama dia ndjala asika Jesu Kristu.

⁷ Ngandji ka mamba la ki uma le Shesu Unyashungu ndu kʼuma le Khumadiondjo Jesu Kristu, wayali le nyu, nyu tshe weli la Romo, nyu elangimi wa Unyashungu, waketama dia ndjala ekilami!

Paulu Ambangenangenela

⁸ Ntundu, dimi lambuka Unyashungu ami lusaka uma le Jesu Kristu lu dikambu dianyu tshe, ne dia lukumu la mbetawo kanyu lambudiangana lu andja wʼutundu,

⁹ Unyashungu lakambelami ulimu la lumu lami lu lukumu lʼololo la Onʼandi eli omenyi ami ati: Dimi latunyudimulaka lu dombelo diami nshi tshe.

¹⁰ Dimi nombaka nti: Kana layuhumo lukulu lʼolo lu lulangu la Unyashungu dia dimi ndja le nyu.

¹¹ Dimi latukumbulaka nyena dia dimi nyusha ushasha omotshi wa nyuma dia nyu nshikikala.

¹² Ndu dia shu ndjukikitshanya leku dimi la nyu lu mbetawo kasu.

¹³ Anyasu, dimi halangi nyushe. Dimi lakasanguya tena efula dia ndja le nyu, (keli akambu wakanshimbe) dia dimi ndjala la elua emotshi ndu lʼatei anyu, uku lʼatei wʼasi wedja ekina.

¹⁴ Dimi leko la dibasa le asi Ngirika ndu le asendji, le akanga a yimba, ndu le akanga a dinginya.

¹⁵ Okone dimi la pusa efula dia ndjunyusambisha lukumu lʼololo ndu nyu weli lu Romo.

Lukumu lʼOlolo

¹⁶ Dimi haluki lukumu lʼololo sonyi, ne dia lo mbeli wulu wa Unyashungu utsha lu panda le untu tshe letawo, ntundu le usi Juda, ku le usi Ngirika.

¹⁷ Ne dia lu lukumu lako mbatenamaka ololo a Unyashungu uma lu mbetawo la mbetawo. Uku akafundama ati: Untu ololo ayuyala la lumu uma lu mbetawo kandi.

Asi Wedja Wambuhumba Akambu wʼOlolo

¹⁸ Kele ka Unyashungu kambenama uma lʼulungu uya lʼuhedia tshe la kolo yʼantu watushimbaka akambu wa mete la kolo yawo.

¹⁹ Ne dia akambu wa Unyashungu wukukiwo mbeya wambene le wo ne dia Unyashungu akawaenyawo.

²⁰ Akambu wa Unyashungu ndu wulu andi wa pundju la efanelu kandi la Unyashungu waki komenamaka umaka etungelu kʼandja wambenama hwe kakiane. Antu wambumana akambu ako fundu uma lu diango diakandatungi wuhu wahawakuki ndjayindja,

²¹ ne dia vo wakeyi Unyashungu, keli vo kumbutumbula uku Unyashungu, kumbuka lusaka. Vo wakanganela lu tukanyi tawo. Etema awo wa dinginya wakayala tshududu.

²² Vo wakayasemaka vati: Akanga a yimba mbesu, keli wakayala dinginya.

²³ Vo wakingula lutumbu la Unyashungu lahalana la efanelu kʼuntu layuvo, ndu ka fudu, ndu ka nyama ya sanga nyei, ndu ka diango diayakutula.

²⁴ Okone Unyashungu akakimo lu saki ya kolo yakakumbulaka etema awo, ku alimba wakayala waha la kenemo lʼatei awo,

²⁵ ne dia vo wakingula mete ka Unyashungu la kashi, ndu wakatemoloka la wakakambelaka utungami lu dihuli dia Utungi latutumbwamaka pundju. Ayali osoku!

²⁶ Dia dikambu diako mbakakimo Unyashungu lu songu ya sonyi, ne dia wadiewo wakakadimula etshelu ka mbeyana la waumewo wakeyana la anyawo amantu.

²⁷ Ndu apami wakakimo etshelu ka mbeyana la wadiewo wakaluli la saki ka mbeyanaka lʼanyawo: pami la pami watsha akambu wahakuki ntsha. Vo wambulungula difutu diedimi la kolo kakawatshi.

²⁸ Uku akawaseke nimbitela Unyashungu, mbakandakimo lu yimba yʼufutanu dia vo ntsha akambu wahasungana.

²⁹ Vo wambulula la wehu tshe wʼakambu wa kolo: usihi, okomiya, la djawudi. Vo wambulula too la kandjema, la diakanelu, la tamu, la lukesu, ndu la ukunda. Vo wambuyala akanga a sedisedi,

³⁰ amamanyishi, atunyi wa Unyashungu, amonyodi, akanga a lahi, akanga wʼunginu, atungi wʼakambu wa kolo, akanga wʼuhedia le ambutshi awo,

³¹ ahukusanyi, waha la kolamelu, waha la ngandji, ndu waha la ketshi.

³² Kuyanga vo mbeyaka didjangu dia Unyashungu ati: Wane watutshaka akambu wa wuhu one nkukaka mvo, ku vame watuwatshaka, ndu watetawoka dia akina mbatsha.