Ngalatiya 6 - La Bible en Otetela (Bible K'Ekila) 1991

Asika Kristu Wakimanyanyiya, Wadimanyanyiya

¹ Anyasu, naka untu ambutakana lu dikambu dia kolo, nyu akanga a Nyuma nyukaluya lʼetema wa memakana. Uyalami weme, ndu we utukuhimbama.

² Nyembaneli wetshu anyu, dia nyu nshidiya elembe wa Kristu.

³ Naka untu ambuyakanela ati: Untu a wuki kemi, lamʼendi untu kʼuntu, ndi ambuyadimbiya.

⁴ Keli untu lʼuntu ediki ulimu andi, ku ndi ayuyala la dikambu dia ndjatumbula ndame, aha lu dikambu dia antu akina.

⁵ Ne dia untu lʼuntu ayemba wutshu andi ndame.

⁶ One letshama diui, akimanyia one la wetshu lu akambu wʼololo tshe.

Tanyuyadimbiyaki, Untu luntu Ayuna Kene Kakandune

⁷ Tuyadimbiyaki, Unyashungu hasokama; untu tshe ayuna diango diakandune.

⁸ Ne dia one latuneka lu dimba diandi, ayuna ehondelo uma lu dimba. Keli one latuneka lu Nyuma, ayuna lumu la pundju uma le Nyuma.

⁹ Tatuhekoki dia ntsha ditshelu diʼololo, ne dia tayuna lu eleku ka muna, naka hatuheko.

¹⁰ Okone lamʼekisu la etena kʼololo, tutshelaki antu tshe ololo, ndjekaleka le embetawudi.

Mbahema Uhekeli Kema Dikambu “Paka Etungamelu kʼUyuyu”

¹¹ Nyendi waima wʼaleta wamumunyufundela la lunya lami.

¹² Waku walanga menama ololo lu dimba, wambunyutshutshiya dia nyu mbahema ehekeli, ne dia vo watukusuyama lu dimba dikambu dia utamba a mpeketanya a Kristu.

¹³ Ne dia ndu ambahemi wʼehekeli vame hawukitanyia elembe, keli vo nangaka nyahemia ehekeli, dia vo ndjatumbula lu alimba anyu.

¹⁴ Keli dikambu dia ndjatumbula, dieko etali uma le mi, paka lu utamba a mpeketanya wa Khumesu Jesu Kristu, wakandjakela akambu wa la kete, la dimi lakadiakema uma lu akambu wa la kete,

¹⁵ ne dia mbahema uhekeli, kuyanga hahemi uhekeli, kema dikambu, paka etungamelu kʼuyuyu.

¹⁶ Waku wayokendakenda uku olembe one, ki kayali la wo, ndu ketshi le Isariyele wa Unyashungu!

¹⁷ Umaka kakiane untu tampenyahenyaki, ne dia di ni lambemba tulimbitelu ta Jesu lu dimba diami.

Diui diʼEtshokwelo

¹⁸ Anyasu, ngandji ka mamba ka Khumesu Jesu Kristu kayali lʼetema anyu Ayali osoku!