Ngalatiya 5 - La Bible en Otetela (Bible K'Ekila) 1991

Nyushikikali lu Ndjadjasela ka Kristu, Tanyukalulaki lu Fumbi Ntu

¹ Kristu akatutshungula dia shu ndjala la ndjadjasela. Okone nyushikikali, tanyudinganaki ntu lu lokoho la fumbi.

² Enda, dimi Paulu lambunyutela nti: Naka nyambahema ehekeli, ku Kristu ayuyala anyanya le nyu.

³ Ntu, lambokokomiya untu tshe lahema uhekeli nti: Dieli la ndi dia ntsha elembe tshe.

⁴ Nyu nyambangana uma le Kristu, nyu wane wayanga nyindjama lu elembe; nyu nyambohongoso uma lu ngandji ka mamba.

⁵ Ne dia Nyuma, mbakungelasu elungamelu kʼakambu wʼololo lu mbetawo.

⁶ Ne dia Kristu Jesu, ndu mbahema uhekeli ndu hahema, kema dikambu, keli mbetawo kambutshama la ngandji.

⁷ Nyu nyakasakaka luwangu ololo. Keli akona akanyushimbi nkitanyia akambu wa mete?

⁸ Osengosengo one kundja uma le one latunyetaka.

⁹ Edya tshitshe atudiaka utundu wʼukama.

¹⁰ Dimi leko la elungamelu le nyu le Khumadiondjo nti: Nyu hanyuyala la tukanyi tukina, keli untu tshe latunyohenyahenyaka, ayuyaembela elumbwelu kandi.

¹¹ Anyasu, naka dimi lambunyusambisha dia mbahema uhekeli, ya ukundi ahenyahenyamami? Lu dikambu diako, ku utamba a ntakanya a mpeketanya ambunyema.

¹² Dimi nangaka nti: Waku wanyunganyia, waleki ahemelu kʼuhekeli.

¹³ Anyasu, nyu nyaketama dia ndjala lu ndjadjasela, dikambu otoi, ndjadjasela kanyu tayalaki dia akambu wa dimba, keli nyukambaneli la ngandji.

¹⁴ Ne dia elembe tshe wambusanganyema lu diui diame ne, ati: Ulangi unyaye uku ayalangaye.

¹⁵ Keli naka nyayulumatana, nyayolena, kanyewo, nyatukushilana.

Akambu wa Nyuma la Akambu wa Dimba Wambutshikitana: Nyolombwanaki le Nyuma

¹⁶ Dimi lambunyutela nti: Nyuyelaki Nyuma, mbahanyutsha uku saki ka dimba.

¹⁷ Ne dia dimba dieko la saki kutshikitanyi la Nyuma, ndu Nyuma eko la saki kutshikitanyi la dimba. Vo ahendi wambutshikitana, ne dia nyutukutsha akambu walanganyu ntsha.

¹⁸ Keli naka nyambolombwama le Nyuma, nyu kema la tshina diʼelembe.

¹⁹ Etsha wa dimba watenamaka vo ene: munanyi, akambu wa sonyi, saki akambu wa kolo,

²⁰ otemwelo wa dikishi, doka, lutunu, utshanu, kandjema, kele, diatanelu, lundju, tamu,

²¹ okomiya, edjwelu ka wanu, engenongeno wa kolo, la akambu wa wuhu uku. Akambu aso mbanyewulami, uku akamanyewula ntundu nti: Wane watutshaka akambu aso, hawukiti diulelu dia Unyashungu.

²² Keli elua wa Nyuma weli ngandji, ongenongeno, ki, ndjakimela, ketshi, ololo, kolamelu,

²³ memakana, ndjaenda. Kema olembe lu akambu wa wuhu oso.

²⁴ Wane weli wa Kristu Jesu, wambudiaka dimba ndu saki kadio lu utamba a mpeketanya.

²⁵ Naka shu teko la lumu uma le Nyuma, tokendakendaki la Nyuma.

²⁶ Tatutakulaki, tatutshanyaki kele, tatukanaki kandjema.