Ngalatiya 3 - La Bible en Otetela (Bible K'Ekila) 1991

Nkalula lu Akambu wʼElembe Eko Dikambu diʼEnginya

¹ Asi Ngalatiya akanga a dinginya li! Nyu wane wakawakenenadiya Jesu Kristu hwe lu ashu, uku akandadiakema lʼutamba mpeketanya, akona akanyoloke?

² Dikambu ne tu mbalangami nyumbula nti: Nyu nyakalungula Nyuma uma lʼetsha wʼelembe, kana uma lʼeukelu ka mbetawo?

³ Teti, dinginya ne dienyu? Nyu nyakatatela le Nyuma, nyambuluwanyema lʼalimba?

⁴ Usuwasuwa mbakanyasuwi lu akambu efula okone? — Naka mete osoku, keti usuwasuwa.

⁵ Okone one latunyushaka Nyuma, ndu latutshaka akambu wa mamba lʼatei anyu, ndi atutshaka osoku uma lʼetsha wʼelembe, kana uma lʼeukelu ka mbetawo?

“Wane Weli la Mbetawo, Tukanula tʼAbarahama Mbewo”

⁶ Uku aketawo Abarahama Unyashungu, ku dikambu diako diakalema le ndi uku ololo.

⁷ Okone nyevi nyati: Wane weli la mbetawo, tukanula tʼAbarahama mbewo.

⁸ Afundelu akeyi ntundu ati: Unyashungu ayuyindja asi wedja uma lu mbetawo; akasambisha Abarahama lukumu lʼololo la ntundu ati; Wedja tshe wayotshokwama lu dikambu diaye.

⁹ Okone akanga a mbetawo wambotshokwama kame la Abarahama, kanga mbetawo.

“Untu Ololo Ayuyala la Lumu Uma lu Mbetawo”

¹⁰ Ne dia mananu keko le wane watutshaka elembe etu, ne dia ambufundama ati: Mananu keko le untu tshe lahatetemala lu akambu tshe wufundami lu buku diʼelembe, dia mbatsha.

¹¹ Dikambu ne diambenama mete ati: Nduku untu ambuyindjama lu elembe lu ashu wa Unyashungu, ne dia untu ololo ayuyala la lumu uma lu mbetawo.

¹² Elembe kundjala uma lu mbetawo. Keli One latuwatshaka ayuyala la lumu uma lʼelembe ako.

¹³ Kristu lakatutshungula uma lu mananu kʼelembe, akayala mananu lu dihuli diasu. Ne dia ambufundama ati; Untu tshe lahanema lʼutamba a mpeketanya, andjami mananu!

¹⁴ Okone otshoko wʼAbarahama ayuyala le asi wedja uma lu dikambu dia Kristu Jesu, dia shu nungula daka dia Nyuma uma lu mbetawo.

Elembe Weko Dikendji Dia Lukumu lʼOlolo

¹⁵ Anyasu, dimi lamboteketa uku atoteketaka antu. Kuyanga dikambu so dieko paka sheki yʼantu, okone akawayeme, nduku untu layuyete anyanya, kana mbahe diui dikina ladiku.

¹⁶ Alaka wakalakema le Abarahama ndu le tukanula tandi. Ndi kumvuta ati: Le tukanula efula; keli paka le untu otoi, Kristu, ati: Le kanula yaye kayuyala alaka ane.

¹⁷ Osoku mbatami nti: Elembe wakayi deku kama nyei la akumi asatu dia lʼokongo, hawudiaki sheki yakashikike Unyashungu ntundu, wuhu wa mbete daka anyanya.

¹⁸ Ne dia naka ukito weko uma lu elembe, keti vo kema uma lu daka; keli Unyashungu akasha Abarahama ukito uku uma lu daka.

¹⁹ Dikambu kuna dieli elembe? Vo wakadjama ne dia kolo, edja ndu lamʼakayi kanula yakawalaki: daka diako diakadjama uma le andjelo le oteketedi.

²⁰ Oteketedi, kema oteketedi wa untu otoi, keli Unyashungu keli otoi.

²¹ Undi, elembe wambutshikitana la alaka wa Unyashungu? Aha osoku! Utunduyala elembe wakadjama, wakeyi mbisha antu lumu, tshiki akambu wʼololo wakayala ne dia elembe.

²² Keli afundelu akasanganya akambu tshe la tshina diʼakambu wa kolo, ne dia mbisha wane wetawo daka dia mbetawo Jesu Kristu.

Ulimu wa Elembe

²³ Keli la ntundu mbetawo atayala, shu takatshungama la tshina diʼelembe, takadihamela mbetawo kakenama lʼokongo.

²⁴ Okone elembe wakayala umbetsha asu utsha le Kristu, ne dia shu nyindjama uma lu mbetawo kasu.

²⁵ Keli ne dia mbetawo kakayi, ku shu kema la tshina dia umbetsha ntu.

²⁶ Nyu tshe nyeko ana wa Unyashungu lu mbetawo le Kristu Jesu.

²⁷ Nyu tshe, wane wakabatizama le Kristu, nyakalote Kristu.

²⁸ Aha usi Juda kuyanga usi Ngirika, aha fumbi kuyanga luyadjasedi, aha pami kuyanga umuntu; ne dia nyu tshe nyeko untu otoi le Kristu Jesu.

²⁹ Naka asika Kristu mbenyu, keti nyu nyeko tukanula ta Abarahama, ekito wa daka.