Ngalatiya 1 - La Bible en Otetela (Bible K'Ekila) 1991

Ambatumela Moyo

¹ Paulu, utumami — aha uma le antu, kuyanga uma le untu, paka uma le Jesu Kristu, la Unyashungu Shesu, lakawulula uma lu nyoi —

² ndu anyasu tshe kame la mi, Le ekelizia wa la Ngalatiya:

³ Ngandji ka mamba kayali la nyu, ndu ki kʼuma le Unyashungu Shesu, ndu uma le Khumesu Jesu Kristu,

⁴ lakayakimo dia kolo yasu, ne dia ntutshungula uma lʼetena kene ka kolo, uku lulangu la Unyashungu Shesu.

⁵ Ndi atumbwami pundju, pundju! Ayali osoku!

Ambamba Dia Anganelu kʼAsi Ngalatiya

⁶ Dimi lambamba ne dia nyu nyambangana esadi okone uma le one lakanyeti lu ngandji ka mamba ka Kristu, nyambetawo lukumu lʼololo lutshikitanyi —

⁷ laha lukumu lʼololo lukina. Keli antu amotshi weko, wanyohenyahenya, walanga mingisula lukumu lʼololo la Kristu.

⁸ Keli kuyanga shu, kana ondjelo uma lʼulungu, ayunyusambisha lukumu lʼololo lukina, lutshikitanyi la lone lakamanyusambisha, ndi adjami mananu!

⁹ Uku akatati ntundu, wuhu ako mbanyutelami ndu kakiane ntu nti: Naka untu ayunyusambisha lukumu lʼololo lukina, laha uku lone lakanyalungula uma le mi, ndi adjami mananu!

¹⁰ Undi ololo wʼantu mbayangami, kana wa Unyashungu? Antu mbayangami ngenyangenya uka? Utunduyala dimi latongenyangenyaka antu, tshiki dimi kema ukambi a Kristu.

Lukumu lʼOlolo Lasambishami, Leli Uma le Unyashungu Aha Uma la Jerusalema

¹¹ Anyasu, dimi lambunyewuya dia lukumu lʼololo lakamanyusambisha nti: Lo kundja uma le untu;

¹² ne dia dimi kulosa uma le untu, kana letshama uma le untu, keli lo lakayi uma lʼenyelo ka Jesu Kristu.

¹³ Ne dia nyu nyakuki lukumu la lumu lami lʼedjedja lʼotemwelo wʼasi Juda, uku akamatamanya nsuya ekelizia wa Unyashungu, ndu uku akamahandjula.

¹⁴ Dimi lakaleki anyasu efula wa lu lolonga lami lu dikambu dia otemwelo wʼasi Juda; lakatamanya mangasana lu ditshelu dia watshemi.

¹⁵ Keli lamʼakalangi Unyashungu, one lakansonola uma lʼutema a nyomi, lakambeti lu ngandji kandi ka mamba,

¹⁶ dia ndi mbishwelami Onʼandi, dia dimi mbusambisha le asi wedja, dimi kumumbwana la antu,

¹⁷ kuyanga ntsho la Jerusalema le wane waki atumami la ntundu kami. Keli dimi lakatshu lʼArabiya; dimi lakakalula ntu la Damaseke.

¹⁸ Lamʼaketi deku satu, dimi lakatshu la Jerusalema dia ntenda Kefasi; lakadjase la ndi nshi dikumi la tshanu.

¹⁹ Keli dimi komena atumami akina, tshikima Jakoba, onangu Khumadiondjo. (

²⁰ Dia akambu aso mbanyufundelami. Nyulungi, la ntundu ka Unyashungu, dimi halati kashi!)

²¹ Lʼokongo diku, dimi lakayi lu beke dia Suriya la dia Kilikiya.

²² Lʼetena keso, ku lateyana la ekelizia wa Kristu wa la Judiya.

²³ Keli vo wakuki lukumu lutu vati: One lakatusuyaka ntundu, kasambisha dikambu dia mbetawo kakandahandjulaka ntundu.

²⁴ Vo wakatumbula Unyashungu dikambu diami.