Nehemiya 9 - La Bible en Otetela (Bible K'Ekila) 1991

Ezera Ambushula Kolo ya Isariyele

¹ Lu lushi lʼakumi ahendi lʼanei la ngondo kako, asi Isariyele wakasangana, wakakili ma, wakalote akutu, wakatela kete lʼete.

² Asi Isariyele wakatana lʼangendangenda tshe, wakemala, wakashula kolo yawo ndu ehedia a washewo.

³ Vo wakemala lu ahuli awo, wakali uma lu buku diʼelembe wa Latuyalaka, Unyashungu awo, etenyi ka nei ka lushi. Ku lʼetenyi ka nei kekina vo wakashula kolo yawo, wakatemola Latuyalaka, Unyashungu awo.

⁴ Jeshua, Bani, Kadimiyele, Shebaniya, Buni, Sherebiya, Bani la Kenani wakadela ladiku dia loyenga lʼasi Lewi, wakalelela Latuyalaka, Unyashungu awo, lʼekuku a wulu.

⁵ Ku asi Lewi, Jeshua, Kadimiyele, Bani, Hashabineya, Sherebiya Hodiya, Shebaniya la Petahiya wakati vati: Nyemali, nyutumbulaki Latuyalaka, Unyashungu anyu, pundju pundju. Lukumbu laye la lutumbu luleki otshoko tshe la diandu tshe, latumbwami.

⁶ We weme keli Latuyalaka, we kakatungi ulungu, ulungu weli ladiku diʼulungu, ndu diango diawo tshe, kete la kene tshe keli loko, ashi a waki la diango tshe dieli loko. We atulamaka diango ne tshe, la ului a wane weli lʼulungu watukotemolaka.

⁷ We keli Latuyalaka, Unyashungu, lakasonola Abarama, lakutundja uma la Ura ka la Kaladiya. Ndu we kakawole lukumbu la Abarahama.

⁸ We akutani lʼutema wa kolamelu la ntundu kaye, we akadji la ndi sheki, dia mbisha tukanula tandi kete yʼasi Kanana, asi Hiti, asi Amora, asi Perizi, asi Jebuse ndu asi Ngiringashe. We ambushidiya diui diaye, ne dia we keli ololo.

⁹ We akenyi asui a washesu lʼEdjibitu, ndu we akuki tukuku tawo tʼalelu lʼumamu wʼUduwa a Tilili.

¹⁰ We akatshela Farayo, ekambi andi tshe la antu tshe wa lu kete yandi tulimbitelu la akambu wa mamba, ne dia we akeyi wuhu wakawatshelaka washesu la ngala, ku we akenya lutumbu laye uku ambulenama elo.

¹¹ We akatanya uduwa la ntundu kawo, ku vo waketi lu lokongo lʼufumbu lʼatei wʼuduwa. Keli we akaditsha waku wakayayelaka lʼohongo uku ave la tshina diʼashi.

¹² We akatalombolaka la yanyi la ekoho ka dingi, ku lʼutshu la ekoho ka dja, kakatasenyaka lu mbuka kakawatatshokaka.

¹³ We akahulo ladiku diʼUkungu a Sinai, akateketa la wo uma lʼulungu, akawasha adjangu wʼusimbwi, elembe wa mete, aui la welu wʼololo.

¹⁴ We akalimbitshiya lushi laye la mumuya lʼekila, we akawadjela welu, adjangu la elembe uma le ukambi aye Mose.

¹⁵ We akawashaka ma uma lʼulungu lamʼakawukaka ndjala, we akatundjiya ashi uma lu dive lamʼakawuki pusa. We akawatela dia vo ntsho la ntukita kete yakayatshibi dia mbasha.

¹⁶ Keli vo la washesu wakayakimo lu utaku, wakayala la ete wulu, kununga elembe aye.

¹⁷ Vo wakatuni nkitanyia, wakuhela akambu aye wa mamba wakayatshi lʼatei awo, wakayala la ete wulu. Ndu lʼatei wʼuhedia awo, vo wakasonola olombodi dia vo nkalula utsha lu lohombo lawo. We keli Unyashungu, kanga ngandji la ketshi, lahuki kele esadi, luludi too la ngandji ka mamba, we kumbaseka, we aketawo mbadimanyia.

¹⁸ Lamʼakawayatshela yana ya ngombe ya lolelola, vo wakati vati: One eli Unyashungu anyu, lakanyutundja uma lʼEdjibitu! Ku vo wakakudji tofwefwe.

¹⁹ Keli ne dia ketshi kaye ka wuki, we kumbaseka lʼusui wa shenga. Ndu ekoho ka dingi kakatalombolaka la yanyi lu mbuka kawo kumumo uma le wo, kuyanga ekoho ka dja kakatasenyaka lʼutshu lu mbuka kawo.

²⁰ We akatumela Nyuma kaye kʼOlolo dia ndjuwaetshaka; we kumbadima mana yaye dia vo nde akawa shaka ashi wa munduya pusa.

²¹ Lʼatei wa deku akumi anei, we akakanelaka lʼusui wa shenga. Vo Kumpumba nduku engo; ahondo awo kundjala emusu; ekulu awo kumvuda.

²² We akawasha waulelu la wedja, akakahanya beke dia kete. Ku vo wakakiti kete ya Sihona, khumʼekanga ka Heshibona, la kete ya Onga, khumʼekanga ka Bashana.

²³ We akafudia tukanula tawo uku toto ta lʼulungu; we akakumia lu kete yakayatela washewo dia vo ndjikita.

²⁴ Ku tukanula tawo wakakumi lu kete yako, wakavikiti. We akakitshakitsha akanga a kete, asi Kanana, la ntundu kawo. We akakimo khumi ya dikanga la wedja wa lu kete yako lu anya awo, dia vo mbatshela uku lulangu lawo.

²⁵ Vo wakayala ewandji wʼesumba a wulu, la wa kete yʼeteto. Vo wakakiti mvudu yuludi too la wehu tshe wa diango, eshima wa lutshima, dikambo dia vinyo, eweli la etamba wʼelua efula. Okone vo wakalekaka, wakalutaka, wakanuni, wakangenangena lʼololo aye wa mamba.

²⁶ Keli vo wakayala la uhedia, wakakuhindwela. Vo wakakadja elembe aye lʼokongo, wakadiaki amvutshi aye wakatshutshiyaka dia vo nkalula le ye, wakakudjaka tofwefwe.

²⁷ Okone we akakimo lʼanya wʼatunyi awo wakahenyahenyaka. Lamʼakiwo lu pa, vo wakakulelela, ku we akuki uma lʼulungu. Uma lu ketshi kaye ka wuki, mbakayatumela atshungudi wakatshungula uma lʼanya wʼatunyi awo.

²⁸ Keli lamʼakawakundja mumuya, vo wakatshi ntu la ntundu kaye. Okone we akatshiki lu anya wʼatunyi awo dia vo mbaulela. Ku lamʼakawakalulaka le ye, ndu lamʼakawakulelelaka, we akukaka uma lʼulungu. Uma lu ketshi kaye ka mamba, mbakayatshungulaka tena efula.

²⁹ We akatshutshiya dia vo nkalula lu elembe aye, keli vo wakayakimo lʼutaku, kununga elembe aye. Vo wakahediaka adjangu aye, wako watulumbiaka wane watatshaka, wakanyonye aheka, wakayala la ete wulu, kunkitanyia.

³⁰ We akakikela deku efula, we akawaewula uma le Nyuma kaye ndu uma le amvutshi aye, keli vo kumpuke atui. Okone we akakimo lʼanya wʼasi wedja.

³¹ Keli lu ketshi kaye ka mamba, mbakiye kumbashila ushiki ndu mbakiye kumbaseka, ne dia we keli Unyashungu, kanga ngandji ka mamba la ketshi.

³² Kakiane Unyashungu li, we keli Unyashungu a wuki, a wulu ndu wukama woma! We atulamaka sheki, atukaka antu ngandji ka mamba. Tenaki asui watutenaka, shu la khumi ya dikanga yasu, ewandji asu, elombedi asu, amvutshi asu, washesu la wudja aye tshe uma lu nshi ya khumi ya dikanga yʼAsuriya edja ndu elo, dikambu dia tshitshe.

³³ We katuyingaka lu akambu ane tshe watuyakaka le su; we atutshaka la kolamelu, keli shu mbatutshaka kolo.

³⁴ Khumi ya dikanga yasu, ewandji asu, elombedi asu, kuyanga washesu, kunamaka elembe aye, kunungaka adjangu aye la aui wakayataka dia mbaewula.

³⁵ Lamʼakiwo ewandji lʼatei wʼakambu wʼololo el lla wakayatshelaka lu kete ya wuki ndu yʼeteto yakayawasha, vo kunkukambela ulimu, ndu kunkadimo uma lʼelimu awo wa kolo.

³⁶ Ku elo shu teko fumbi. Shu teko fumbi lu kete yakayasha washesu dia nde elua la diango diʼololo uma loko.

³⁷ Yo yal afudiyaka khumi ya dikanga, yakayakitsha ladiku diasu ne dia kolo yasu, diango. Ndu vo watulelaka alimba asu la dungalunga diasu uku alangawo. Shu teko lu pa ka wulu.

Antu Wambudja Sheki dia Nama Elembe

³⁸ Uma lu akambu aso tshe mbakatadji sheki, mbakatayifundi. Ku ewandji asu, asi Lewi asu, la elombedi asu wakaki pita loko.