Nehemiya 8 - La Bible en Otetela (Bible K'Ekila) 1991

¹ Ku asi wudja tshe wakasangana kame la kanyi otoi lu dihuli dia hwe la ntundu ka Suku diʼAshi. Vo wakatela ufundji Ezera dia ndi mbela buku diʼelembe wa Mose wakadjangela Latuyalaka Isariyele.

² Ku olombedi Ezera akela buku diʼelembe la ntundu kʼului, waki ndu apami ndu amantu, lu lushi la ntundu la ngondo kʼesambeli, dia vo tshe mbeuka la mbelimbitela.

³ Ndi akali lu buku diʼelembe umaka pindju edja ndu unya lʼatei ote lu seke dia hwe la ntundu ka Suku diʼAshi la ntundu kʼapami lʼamantu, ka wane wakeyi mbuka. Wudja tshe wakahukama aui wʼuma lu buku diʼelembe.

⁴ Ufundji Ezera akahema ladiku dia loyenga lʼetamba, lakawatshi lu dikambu diako. Matitiya, Shema, Anaya, Uriya, Hilikiya, la Maseya wakemala lasuki la ndi lu lunya landi la pami, ku Pedaya, Misheale, Malakidja, Hashuma, Hasha-Badana, Zekariya la Meshulana lu lunya landi la lomoso.

⁵ Ezera akafula buku lu ashu wʼantu tshe, ne dia ndi aki lu dihuli dia ladiku. Lamʼakandifula, antu tshe wakemala.

⁶ Ezera akatumbula Latuyalaka, Unyashungu a wuki, ku antu tshe wakakitshiya wemi anya vati: Ayali osoku! Ayali osoku! Wakatemola Latuyalaka, wokole dundji utsha lu kete.

⁷ Jeshua, Bani, Sherebiya, Jamina, Akuba, Shabetai, Hodiya, Maseya, Kelita, Azariya, Jozabada, Hanana, Pelaya, la asi Lewi wakalimbitshiyaka antu elembe. Ku untu lʼuntu akatshikala lu dihuli diandi.

⁸ Vo wakali elembe wa Unyashungu uma lu buku lu ashika, okone antu tshe wakalimbitela aui tshe wakawalaka.

⁹ Nehemiya, laki umbuledi, olombedi la ufundji Ezera, la asi Lewi waketshaka antu; wakatela antu tshe vati: Lushi lʼelo, leli ekila le Latuyalaka, Unyashungu, tanyulelaki, tanyokediaki asoi, ne dia etena keso antu tshe wakaleli lamʼakawuki aui wʼuma lʼelembe.

¹⁰ Ndi akawatela ati: Nyutshu, nyutuli unatshi weli la wata, nyutono dinono dia pe. Nyutumeli wane waki konongosola nduku engo etenyi, ne dia lushi lʼelo leli ekila le Khumesu. Tanyunyangaki ne dia ongenongeno wa Latuyalaka eli wulu anyu.

¹¹ Okone asi Lewi wakalembohaya antu vati: Nyutshikali ki ne dia lushi lʼelo leli ekila, tanyunyangaki.

¹² Ku antu tshe wakatshu dia ntole la ntono ndu la ntutumela antu tenyi, la dia ngenangena lʼongenongeno a wuki, ne dia vo wakalimbitela aui wakawawatela ndu wakawalimbitshiya.

¹³ Lu lushi la hendi, ete wa khumbu wa wudja tshe, elombedi la asi Lewi wakasangana lasuki la ufundji Ezera dia nunga elimbitshiyelu kʼaui uma lʼelembe.

¹⁴ Ku vo wakatani lu efundelu, lu elembe wakadji Latuyalaka le Mose ati: Asi Isariyele mpumbaka mbidjase lu tusamvusamvu lu nshi ya lushi la wuki la lu ngondo kʼesambeli,

¹⁵ ndu nyanganya lukumu lone lu esumba awo tshe ndu la Jerusalema, vati: Nyutshu lʼukungu dia ntuyanga avundja wʼeweli, wʼelekaleka, wa wimba, ndu wa wehu ekina wʼetamba, la wanga wʼatuku, dia ntsha tusamvusamvu uku akafundama.

¹⁶ Okone antu wakatshu la ntuyanga avundja, wakayuyatshela tusamvusamvu, untu lʼuntu ladiku dia luudu landi, lu aseke awo, lu kumbu yʼaseke wa luudu la Unyashungu, lu dikote dia la Suku diʼAshi ndu lu dikote dia la Suku dia Efarayima.

¹⁷ Ului tshe a wane wakakalula uma lu lohombo wakatshi tusamvusamvu wakadjase lu tusamvusamvu tako. Uma lu nshi ya Jeshua, onʼa Nuna, edja ndu lushi lʼelo asi Isariyele kuntsha nduku dikambu dia wuhu oso. Ku akayala ongenongeno a wuki.

¹⁸ Ndi akalaka elembe wa Unyashungu la lushi la lushi uma lu buku, umaka lushi la ntundu edja ndu lushi lʼekumelu. Vo wakalemia lushi la wuki yediko ya nshi esambeli, ku lushi lʼenanei lakayala lusanganya la lukumu, uku didjangu.