Nehemiya 6 - La Bible en Otetela (Bible K'Ekila) 1991

Tuseki tʼAtunyi

¹ Dimi latadji kuki lʼasuku mbakuki Sanabalata, Tobiya, Ngesheme, usi Arabiya la atunyi asu akina lukumu vati: Dimi lambuhika eheli ka lukumbu kene ndu nduku ushu wambutshikala.

² Ku Sanabalata la Ngesheme wakatumela diui vati: Yaka, tuyusangani lu ngelu ya lʼukidi wa Ono. Keli vo wakasanguya dia ntshelami kolo.

³ Dimi lakatumela akendji dia mbakaluya diui nti: Dimi leko la ulimu efula wa ntsha, haleyi ndja; ulimu atukukimwama lamʼayumutshika dia ndja uya le nyu.

⁴ Vo wakatunjela diui tena nei wuhu ako, ku dimi lakakaluya diui wuhu ako.

⁵ Sanabalata akatumela diui ne etena ka tanu le ukambi andi, lakayakimedi mukanda hwe lu lunya.

⁶ Lu mukanda ako akafundami ati: Lundju lambukukanela lʼatei a wedja, ku Ngesheme ambuta ati: We la si Juda nyeko lu nkana dia ntomboko. Uma lu dikambu diako, mbakayahiki eheli ka lukumbu. We utsha ndjala khumʼekanga kawo, mbatawo.

⁷ We akakitsha ndu amvutshi amotshi dia vo nkudja khumʼekanga ka Juda la Jerusalema. Ku kakiane akambu ane wayeyama le khumʼekanga. Okone yaka, tuyubwani kame.

⁸ Dimi lakatumela Sanabalata diui nti: Aui aso wataye leku kema mete, weme kambatunga.

⁹ Antu aso tshe wakalangaka ntata asulu, wakataka vati: Vo wayuheko, kʼulimu hawutshama ntu. Unyashungu li, unkikitsha kakiane.

¹⁰ Dimi lakatshu laka Shemaya, onʼa Delaya, onʼa Mehetabele, lakayadihi. Ku ndi akati ati: Tutshu kame lu luudu la Unyashungu, lʼatei wʼetemwelo, tutudihi kuki yʼetemwelo, ne dia vo lu ndjayi dia ndjukudiaka; lʼutshu mbayuwuya dia ndjukudiaka.

¹¹ Dimi lakukal tya diui nti: Untu uku dimi, ku ndawo. Na wuhu wʼantu weli uku dimi, wukiki mboto lu etemwelo, ku ntshikala la lumu? Dimi haloto loko.

¹² Dimi lakalimbitela nti: Aha Unyashungu kutumi. Keli ndi ambuta akambu wahatayi okone lu dikambu diami, ne dia Sanabalata la Tobiya wakawusha falanga.

¹³ Lu nungula falanga wuhu one, vo wakalungamela vati: Dimi layuka woma, ndu layuyela tukanyi tandi, ku layutsha kolo. Vo wakakani yimba dia nanya lukumu lami, dia vo monyolami.

¹⁴ Unyashungu ami li, uho Tobiya la Sanabalata la elimu awo. Uho ndu Noadiya, umvutshi a umuntu, la amvutshi akina watuyangaka mbatami asulu.

¹⁵ Eheli ka lukumbu kakashili lu lushi la dikumi lʼatanu la ngondo ka Elulu, lu nshi akumi atanu la hyendi.

¹⁶ Lamʼakuki atunyi asu tshe lukumu lako, wedja tshe waki lʼutshimba asu wakatuki woma. Vo wakasuwo, ne dia vo wakalimbitela vati: Ulimu one ambushila uma lu wulu wa Unyashungu asu.

¹⁷ Lu nshi sho, antu a waki amotshi wʼasi Juda wakatumenelaka la Tobiya mikanda tena tshe.

¹⁸ Antu a waki wa Juda efula wakalakana la ndi, ne dia ndi aki ukilu wa Shekaniya, onʼa Ara. Onʼandi Jehohanana akatshuki Meshulama, onʼa Berekiya.

¹⁹ Vo wakateketaka dia etsha andi wʼololo la ntundu kami, wakawutelaka aui ami. Tobiya akatumaka mikanda dia mbatami asulu.