Nehemiya 1 - La Bible en Otetela (Bible K'Ekila) 1991

Dombelo dia Nehemiya Dikambu dia Jerusalema

¹ Aui wa Nehemiya, onʼa Hakaliya ane. Lamʼakimi lʼusumba a wuki wa Susa, lu ngondo ka Kislevi, lu eleku kʼakumi ahendi,

² Hanani, onalingu omotshi, akayi ndi la antu amotshi uma la Juda. Dimi lakawambula dikambu diʼasi Juda ane wambutshikala uma lʼatei wʼatshikadi wakatumbi uma lu fumbi, ndu dikambu dia Jerusalema.

³ Ku vo wakankaluya diui vati: Wane wambutshikala uma lʼatei wʼatshikadi wakatumbi uma lu fumbi, wudjashi lu leke luku, weko lʼatei wʼasui la sonyi. Eheli ka lukumbu la Jerusalema kakalana, kuki yayo yakalungula.

⁴ Lamʼakamuki aui aso, lakadjase, lakaleli, lakayala la lunyangu nshi motshi. Dimi lakatetemala nkila ma la nombaka la ntundu ka Unyashungu a lʼulungu.

⁵ Lakataka nti: Latuyalaka, Unyashungu a lʼulungu li, we Unyashungu a wuki ndu a woma, latulamaka sheki ndu latukaka wane watukulangaka ndu watukitanyiaka elembe aye ngandji ka mamba, lambukosengasenga nti:

⁶ Atui aye wahukami, ashu aye wendi! Uki dombelo diami, dimi ukamt aye, diakolombami etena kene la yanyi ndu lʼutshu lu dikambu diʼekambi aye asi Isariyele, lamʼashulami kolo yʼasi Isariyele, yakatakutshela. Mete, dimi la khumbu ka papa takatshi kolo.

⁷ Shu takakutshela kolo efula, shu kunkitanyia elembe, aui la adjangu wakayatela ukambi aye Mose.

⁸ Lambukosengasenga nti: Uho diui diakayatela ukambi aye Mose wati: Naka nyu nyayutsha kolo, dimi layunyuhandjula lʼatei a wedja.

⁹ Keli naka nyu nyayukalula le mi, naka nyayulama elembe ami dia mbetsha, kuyanga nyu nyakatshanyema pulu ndu lu kuma kʼulungu, dimi layutunyosa uma leko, layunyukaluya uya lu dihuli diakamasonola dia nshikike lukumbu lami.

¹⁰ Ekambi aye la wudja aye mbewo, wakayashimbela la wulu aye wa mamba ndu la lunya laye la wulu.

¹¹ Khumemi li, lambukosengasenga nti: Uhuke tui lu dombelo diami, dimi ukambi aye, ndu lu dombelo diʼekambi aye watulangaka mbuka lukumbu laye woma. Umbuki ngandji kaye ka mamba, umpumuya dimi ukambi aye lukulu lʼolo, la ntundu ka untu one. Dimi laki umangudi a wanu wa khumʼekanga.