Nahuma 3 - La Bible en Otetela (Bible K'Ekila) 1991

¹ Mananu kayali le usumba wa dikila, Wuludi too la kashi la dihotwanelu, wahakimo diango!

² Paka ekuma wʼohehela, lundju lʼetshimbi, Ekhunguswelu ka falasa ndu elimbulimbwelu ka pusupusu!

³ Ambahemi wa falasa watatshu, Tombo tatangadimo la akonga watalingalinga, Ului wʼandjakemi, Tuta dia wuki diʼedu, Edu kema lʼekumelu, Vo watutakanaka ladiku diʼedu!

⁴ Akambu tshe ne dia umuntu kanga munanyi, Latuyalongosolaka dia nkutula apami. Umuntu kanga doka dia mamba, Lakasundja wedja uma lu luseka landi, La khumbu uma lu doka diandi.

⁵ Ulungi, dimi layendana la ye, Layukufula ahondo aye la ntundu kaye. Dimi layenya wedja utakataka aye, La waulelu sonyi kaye, Mbata Latuyalaka Kanga lulimbilimbi.

⁶ Dimi layakadja diango dia mindu ladiku diaye. Layukete engo kaha la nemo, Ndu layukete engo ka dienyanyu.

⁷ Ku wane tshe wayukena, wayukulawoka; Wayutaka vati: Niniva ambulanyema. Akona ayukhuma akhumu lu dikambu dandi? Uma lendi ayunûyangela asambi?

⁸ Undi, we kuleki Tebese kaki lʼumamu wa Nile ololo, Kakadingami lʼashi, kaki la ashi a waki uku lungeli, Ndu la ashi uka eheli kato?

⁹ Etiyopiya la Edjibitu waki wulu ato, Wulu ako tawaki la ekumelu. Ndu Puta la asi Libiya waki ekimanyidi ato.

¹⁰ Keli vo wakatolama, wakatshu utsha lu fumbi. Ndu anʼawo wʼashashi wakatshatshema Betshi betshi lʼete wʼesese tshe. Vo wakukela antu awo wa lukumu uwali, La antu awo a waki tshe wakakelekama la molola.

¹¹ Ndu we ayudjo, we ayuyashe. We ayuyanga eshamelu ka mbishama utunyi aye.

¹² Wembe aye wa ta tshe wayuyala uku etamba wa fingu, Same la elua wa fingu wambela ntundu. Naka vo wamousutsuasutshama, Ku vo nko lʼunyo wʼalimbi.

¹³ Ulungi, alimbi aye weko amantu lʼatei aye. Asuku wa kete yaye wambudihwama le atunyi aye, Dja yakatshumbi ekengiti aye.

¹⁴ Uduwuli ashi ne dia edjaselu, Ukikitsha wembe aye wa ta. Oto lu kete yʼomoma, uyisohe potopoto, Ukikitsha khuka kʼatafadi wulu!

¹⁵ Dja yayukutshumba leko; yombo yayukudiaka. Yo yayukudiaka. Yo yayukole uku atolekaka endjo akatshi. Uyafudia efula uku endjo, Ufulaneli uku waombi a dikata!

¹⁶ We akafudia ambetshetshi aye wʼukanda Uleki toto ta lʼulungu. Endjo watulanyaka, ku watufumboka.

¹⁷ Ewandji aye weli uku waomoi a dikata, La afundji aye uku bumbu dia edajo Watahemaka lu peli lu lushi la tshitshi. Keli lamʼatandaka unya, vo watufumboka, Ku dihuli diewo hadieyama.

¹⁸ We khumʼekanga kʼAsuriya, Alami aye wʼekoko wambotokokala, Antu aye a waki wambumuya; Wudja aye wambuhandjo vwa ladiku diʼekungu, Nduku untu lasanganya.

¹⁹ Nduku lodia ne dia ehumwelu kaye Puta Kaye kaya kandji efula. Wane tshe watukaka lukumu laye, Watuhumaka saka dikambu diaye; Ne dia akona aki kolo kaye kunkumaka le ndi tena tshe?