Nahuma 2 - La Bible en Otetela (Bible K'Ekila) 1991

¹ One latuhimbulaka tenyi tenyi ambuya dia ndjolo la ye. Ulami wumbe wa ta, endaki mbuka. Ukikitsha uya lu lukindi laye, Ukikitsha wulu aye tshe.

² (Ne dia Latuyalaka ambulula lutumbu la Jakoba, Uku lutumbu la Isariyele, Ne dia apotodi wakahotola, wakalanya tahi yawo.)

³ Dingawu diʼapami andi wa wulu diambuyala tilili. Ahuka wa wulu wambolota eloto wa tilili. Pusupusu yambuyala ngaingai Uku lumbi la dja lu lushi lʼelongoswelo kandi. Falasa ya ta yambuhasahasa.

⁴ Pusupusu yambuyala la ududu lu mbuka, Yambukhunguso lene la lene lu esese. Enelo kayo keli uku ewa. Yo yambulawo uku angadimu.

⁵ Ndi mbuhoka antu andi a waki, Vo watusukosukoka lu lokendo lawo. Vo watusamanyaka utsha lʼeheli kawo: Eshamelu kambolongoswama.

⁶ Asuku wʼokedi wambudiho, Luudu la khumʼekanga lambunyuko.

⁷ Wadi a khumʼekanga ambukulwama ahondo, ambembama. Ekambi andi wʼamantu wambulela, Wambukhuma akhumu uku fudu ya binga, Wayakomola lu tulu.

⁸ Uma lu nshi ya ntundu, Niniva aki uku eduwa kʼashi, Keli wambulawo. Vo wambuhangohango vati: Nyemali! nyemali! Ku nduku untu lewo lʼokongo.

⁹ Nyumbi dimbu dia fesa, nyumbi dimbu dia paunyi, Ne dia eumbelu kema la ekumelu, Lutumbu la diango diʼololo tshe.

¹⁰ Vo wambuyala hwe, wambuyala tongo tu, wambulanyema. Etema wambuyala ashi atu, adui wambusakana. Sasi diambuwanda vo tshe; Dundji diawo diambukadimo.

¹¹ Lendʼeli difuku dia tambwe, Wuku wʼesongo wa tambwe, Lene akatolaka tambwe nyama yakatandaka, Lene aki tana tato, Ku nduku untu lawautsha woma?

¹² Tambwe atatshatshaka betshi diukuki le ana ato, Atudiakaka ne dia wadieto. To katuludiaka weuku ato la nyama yakatandji, La afuku ato la emunyi wakatahimbudi.

Elanyelu ka Mamba ka Niniva

¹³ Ulungi, dimi layendana la ye, mbata Latuyalaka Kanga lulimbilimbi, layutshumba pusupusu yaye lu dja. Yombo yayudiaka esongo aye wa tambwe. Dimi layunya nyama yatuyundaka uma la kete. Ndu aui wʼakenaji aye hawukema ntu.