Mika 7 - La Bible en Otetela (Bible K'Ekila) 1991

Ditshelu Dia Kolo Dia Isariyele

¹ Omenyi fono mbemi! ne dia lambuyala Uku elua wakawambi lʼetena kʼowo, Uku sandji diʼelua wa vinyo diakawanyinginya. Lʼokongo wa embelu, nduku esandji kekiko ka nde, Nduku ulua wa fingu wakatatela mbela, Watulangaka utema ami wekiko.

² Untu ololo akanyema uma la kete, Nduku untu lʼusimbwi leko lʼatei wʼantu. Vo tshe watuhulamaka dia ntshulula dikila, Untu lʼuntu atambaka onangu otei.

³ Vo wataheka anya awo ladiku dia kene keli kolo, Dia vo nkitsha esadi. Uwandji la umbadi watolombaka mbu yʼutshu. Untu a wuki atutaka lulangu la kolo leli lʼutema andi. Vo watulumamatanyaka kame.

⁴ One luleki ololo lʼatei awo, Eko uku tende dia dungu; One luleki nsimbo lʼatei awo, Eko uku lukumbu lʼatende. Lushi lʼalami awo, la sui diawo, lambukuma. Kakiane sonyi kawo kaya suki.

⁵ Tekamaki unyaye, Tukitshaki elungamelu le ongenyi. Ulami asuku wa unyo aye, La ntundu ka umuntu letami lu tulu kaye,

⁶ Ne dia ona pami ambonyola shi, Ona umuntu ambuhendwela nyangu, La olokayi ambuhendwela nyangu umendi. Atunyi wʼuntu weko antu wa lu luudu landi hita.

⁷ Keli le mi, dimi layenda le Latuyalaka, Dimi layulungamelaka le Unyashungu a panda kami. Unyashungu ami ayumbukela.

Latuyalaka Atelaka Usasi la Etshungwelu

⁸ We utunyi ami, tongenangenaki lu dikambu diami. Lamʼambumoka, dimi layeto. Lamʼambumudjase lu udjima, Latuyalaka ayuyali usasi le mi.

⁹ Dimi layukike kele ka Latuyalaka, Ne dia dimi lakutshela kolo, Edja ndu ndi ambulumbula dikambu diami. Ndi ayuntudja lu usasi, Ku dimi layena etshungwelu kandi.

¹⁰ Ku utunyi ami lakamumbula ati: Lendʼeli Latuyalaka, Unyashungu aye? Ayema dikambu diako, ayolombo la sonyi. Ashu ami wayena lulangu lami lu dikambu diandi. Ndi utsha mpotshabotshama lʼekulu. Uku loteke la lʼesese.

¹¹ Lushi la mpika peli diaye; Lu lushi lako ulelu wayosekwama etali.

¹² Lushi lako vo wayuya le ye. Uma la Asuriya pulu lʼEdjibitu, Ndu uma lʼEdjibitu, pulu ndu lu Ndjali, Uma lʼashi a waki pulu lʼashi a waki akina, La uma lʼukungu pulu lʼukungu ukina.

¹³ Keli kete yayulanyema lu dikambu dia wane wudjashi loko, Ne dia elua wʼetsha awo.

Ketshi ka Latuyalaka le Isariyele

¹⁴ Ulesha wudja aye la ukalimba, Limba la dungalunga lʼukito aye, Latudjaseka la mi lʼukunda, Lʼatei wa kete ya dikambo. Vo wali lu Bashana ndu lu Ngiliyade Uku lu nshi yʼedjedja.

¹⁵ Dimi layuwaenya akambu wa mamba, Uku wa lu lusthi lakanyayayakaka uma lʼEdjibitu.

¹⁶ Wedia wayena, wayolombo la sonyi Lu dikambu dia wulu awo tshe. Vo wayahe anya awo lʼenyo awo, Atui awo wayuyala puki.

¹⁷ Vo wayolembola ditshu uku ului, Uku diango diayakutula dia la kete. Vo wayuya wayadidima uma lʼahuli awo wʼeshamelu. Vo wayukalula la woma wa mamba Le Latuyalaka Unyashungu asu. Ku vo wayuyala la woma lu dikambu diaye.

¹⁸ Akona eli Unyashungu uku we, latudimanyiaka kolo, latuhelaka uheaia wʼatshikadi wʼukito aye? Ndi hatutshikalaka la kele pundju, Ne dia ndi atongenangenaka lu ngandji ka shikaa.

¹⁹ Ndi ayutuka ketshi ntu. Ndi ayukamela kolo yasu la tshina diʼakaka. We ayukadja kolo yasu tshe lʼehongo wʼashi a waki.

²⁰ We ayenya kolamelu aye le Jakoba, La ngandji ka shikaa le Abarahama Uku akayatshibela washesu lu nshi yʼedjedja.