Mika 6 - La Bible en Otetela (Bible K'Ekila) 1991

Tamu ta Latuyalaka la Isariyele

¹ Kakiane, nyulungi uku ata Latuyalaka ati: Nyuneli, nyulumbuli dikambu dianyu la ntundu kʼekungu. Akuna wuki diui dianyu.

² Nyuki, nyu ekungu ndu nyu atshina a wulu wa kete! Nyuki uku wama Latuyalaka la wudja andi, Ne dia Latuyalaka eko la tamu lʼasa ndi la wudja andi. Ndi ayama la Isariyele.

³ Nyu wudja ami, dikambu diakona diakamanyutshela? Lu dikambu diakona diakamanyuhekuya? Nyumvuteli!

⁴ Dimi lakanyutundja uma lu kete ya Edjibitu, Lakanyutshungula uma lu luudu la lohombo. Dimi lakatumi Mose, Arona la Miriyama la ntundu kanyu.

⁵ Nyu wudja ami, nyuho kakiane, Uku akasanguya Balaka, khumʼekanga ka Moaba, Ndu uku akûkaluya Balama, onʼa Boere, diui. Nyuho ndu uku akanyatetaka uma la Shitime utsha la Ngilingala, Dia nyu mbeya etsha wʼololo wa Latuyalaka.

Kene Kayanga Latuyalaka

⁶ La na ayumusukana la ntundu ka Latuyalaka, Ndu ayumokolama la ntundu ka Unyashungu, KhumʼUlungu? Dimi layuya la ntundu kandi la elambu wa lutshumba, La esongo wa ngombe wa eleku otoi?

⁷ Latuyalaka ayongenangena la nunu dia waumi wʼekoko, Kuyanga la nunu dikumi dia ekedi wa biso? Dimi layukimo onʼami lʼenundu ne dia ehedia ami, Etenyi kami kʼosohi ne dia kolo kʼutema ami?

⁸ We untu, ndi akakenya kene keli ololo, Kakona katuyanga Latuyalaka uma le ye? Paka dia ntsha akambu wʼololo, dia nanga ketshi, Ndu dia nkendakendaka la ndjakitshakitsha kame la Unyashungu aye?

⁹ Diui dia Latuyalaka diambulelela usumba. Ku untu leli la yimba, ayuka lukumbu laye woma. Nyuki ohehela woma ndu one lutumi.

¹⁰ Undi dimi mbeyaka mbuhela waumbelu wa kolo Weli lu luudu lʼuntu a kolo, La yediko ya tshitshe yadjawo mananu?

¹¹ Undi, dimi mbeyaka nyindja Untu leli la kilo ya kolo, Ndu la tediko ta wetshu ta lukesu?

¹² Akanga wʼengonyi aye wambulula too la akambu wa ngala. Antu aye watutaka kashi, Nimi yawo yeli too la lukesu lʼenyo awo.

¹³ Ndu uma lu dikambu so, mbakamanyukia puta ya wulu. Dimi lakanyulanya ne dia kolo yanyu.

¹⁴ Nyu nyayole, keli hanyuluta. Ndjala kayuyala lʼatei anyu. Nyu nyayumba, keli hanyulama. Kene kayunyulama, kayumukimo le yombo

¹⁵ Nyu nyayuhe, keli hanyuna. Nyu nyayamula mbeli, keli hanyushinula iso kayo. Nyu nyayamula elua, keli hanyono ashi awo.

¹⁶ Nyu nyatulamaka elembe wa Omiri, La ditshelu tshe dia khumbu ka Ahaba. Nyatuyelaka aui awo, dia dimi nyete tongo tu, La antu aye engo ka mpongwela soi. Nyu nyayembela wudja ami diango diawo.