Mika 4 - La Bible en Otetela (Bible K'Ekila) 1991

Diulelu Dia Latuyalaka lʼAndja wʼUtundu

¹ Keli lu nshi yayayi, ukungu wa luudu la Latuyalaka Wayushikikala lʼete wʼekungu. Vo wayediama ladiku dia akuna, antu wayumbela leko,

² Wedja efula wayuya, Ku wayuta vati: Nyuyeti, tutshu lʼukungu wa Latuyalaka, Lu luudu la Unyashungu a Jakoba, Dia ndi ntutetsha mbuka yandi, Mbayuteya nkendakenda lu tuwuka tandi. Ne dia uma la Siona kayutumbaka elembe, La aui wa Latuyalaka uma la Jerusalema.

³ Ndi ayulumbuya wedja efula, Ayusambula akambu wa wedja a wulu wʼetali. Vo wayutshula tombo tawo kungu, La akonga awo tukuwa ta loho. Wudja hawuyedia tombo tawo dia ndo la wudja ukina, Kuyanga mbeka akambu wa ta ntu.

⁴ Keli vo wayudjase, untu lʼuntu la tshina diʼokodi andi wa vinyo, Ndu la tshina dia utamba andi wa fingu. Ku nduku untu ayuwautsha woma, Ne dia unyo wa Latuyalaka Kanga lulimbilimbi wakati dikambu diako

⁵ Wedja tshe, wudja la wudja, Watuyelaka lukumbu la etemolatemola kawo. Keli shu tayuyela lukumbu la Latuyalaka, Unyashungu asu, pundju pundju.

Etshungwelu ka Isariyele Uma lu Lohombo

⁶ Latuyalaka kata ati: Lushi loso, Dimi layusanganya akanga a tshumbi, Layomotsha wane wakatshanyema ndu wane wakamatshela kolo.

⁷ Dimi layete akanga a tshumbi atshikadi, La wane wakatshanyema wudja a wulu. Ku Latuyalaka ayuwaulela lʼUkungu a Siona, Umaka kakiane pundju pundju.

⁸ Dikambu ne diayuyala le ye, We etangelu kʼekoko, Dikuna dia ona umuntu a Siona. Luwandji lʼedjedja, Diulelu dia ona umuntu a Jerusalema, layuya le ye.

⁹ Okoko wana wandaye kuku kakiane? Undi, khumʼekanga kema lʼatei aye? Undaki aye akavu? Diako mbambukunda lunyangu uku umuntu latata lono?

¹⁰ We ona umuntu a Siona, usuwi, Ukhumi akhumu uku umuntu latata lono, Ne dia we utsha ntumba kakiane uma lʼusumba, la ntudjase lʼusui. We ayutsho la Babilona; ayutushimbamela leko. Leko kayukutshungula Latuyalaka uma lʼanya wʼatunyi aye.

¹¹ Kakiane wedja efula wambusanganyema dia nkolosha, Wata vati: Walanyemi. Ashu asu wendi Siona tee.

¹² Keli vo haweyi tukanyi ta Latuyalaka, Kuyanga nimbitela esangweyu kandi, Ne dia ndi akasanganya Uku dikanda diʼepunga lu dihuli diʼesuswelu.

¹³ Ona umuntu a Siona, unela, ususuli! Ne dia dimi layukutshela luseki la mbulu ndu sanga yʼehotela. We ayatshatsha wedja efula betshi betshi. Nyu nyayukidia waho awo le Latuyalaka, La ekundji awo le Khumadiondjo, Kanga kete tshe.