Mika 2 - La Bible en Otetela (Bible K'Ekila) 1991

Mananu Wane Watusu-yaka Asi Wula

¹ Mananu kayali le wane watukanaka akambu wa kolo, Watutshaka kolo lu tangi yawo! Lamʼatuhutoka unya, vo watukitshaka, Ne dia to keko lu wulu wʼanya awo.

² Vo watokomiyaka dikambo, watudiosaka, Ndu mvudu, ku watuyihotolaka. Vo watusuyaka untu la khumbu kandi, untu la ukito andi.

³ Diako mbata Latuyalaka ati: Nyuki, dimi lambusanguya dia ntshela khumbu kene kolo, Kahanyeya ndawuya kingu yanyu, Kuyanga nkendakenda lʼutaku, Ne dia oso ayuyala etena ka kolo.

⁴ Lushi loso, wayunyukela yukedi, wayulela delu diʼokei; Wayuta vati: Shu tambushila ushiki. Ndi ambukadimula etenyi ka wudja ami. Ndi wuhu ambundukinya uma le mi li! Ndi ambukahanya dikambo diasu le akanga wʼuhedia.

⁵ Diako mbahanyuyala la untu layunyedikela okodi. Lu eukelu kʼuwali lu lusanganya la Latuyalaka.

⁶ Tusambishaki — Osoku mbatusambishaki. Untu tasombishaki akambu wa wuhu one. Sonyi hatundi.

⁷ Nyu khumbu ka Jakoba, ololo vo mvuta akambu aso? Nyuma ka Latuyalaka ambushimbama? Aha etsha andi ene? Aui ami hawutshela one latokendakendaka usimbwi ololo?

⁸ Keli nyu nyatunelaka dia ndo la wudja ami uku utunyi. Nyu nyatukululaka akanga memakana ahondo, Wane watetaka la ki, waha la kanyi ya ta.

⁹ Nyu nyatutshanyaka amantu wa wudja ami. Uma lu khumbu yawo yatuwongenangenaka. Nyu nyutunyaka anʼawo uma lu lutumbu lami pundju.

¹⁰ Nyuneli, nyutshu, Ne dia one kema dihuli dianyu dia mumuya. Mindu kambudilanya, la elanyelu ka wulu.

¹¹ Utunduyala untu omotshi ayeteta, Ayutataka aui wa lukesu lu aihuli la dihuli, Ati: Oimi layunyusambisha dia wanu la dinono dia wulu, Tshiki ndi kutuyala usumbisha wa wudja one!

¹² Mete, dimi layusanganya utundu aye tshe, we Jakoba. Mete, dimi layusanganya atshikadi wa Isariyele. Dimi layamotsha kame uku ekoko weli lʼukutu, Uku limba la dungalunga lu dihuli diawo diʼelelu. Vo wayutsha lundju la wuki lu dikambu diʼului wʼantu.

¹³ Uhandjudi aketi la ntundu kawo. Vo wakahandjula lukuki, Waketi la suku, ku wakatumbi loko. Khumʼekanga kawo aketi la ntundu kawo, Ku Latuyalaka lolombo lawo.