Mateu 8 - La Bible en Otetela (Bible K'Ekila) 1991

Jesu Ambokonoya Kanga Sudi

¹ Lamʼakahulo Jesu uma lʼukungu, elui a waki wʼantu wakûyeli.

² Nyulungi, kanga sudi akayi le ndi, akakhusama la ntundu kandi; akati ati: Khumadiondjo, naka we alanga, we mbeyaka nkonoyami.

³ Ndi akasimbula lunya, akawunandia, akati ati: Dimi nangaka, okono. Kemʼedja, sudi kandi kakakono,

⁴ Jesu akawutela ati: Tutelaki untu. Keli utshu, utuyaenya le elombedi, ndu utulambuli ulambu wakati Mose uku djimbitelu le wo.

Jesu Ambandula Olombodi wʼAlimbi

⁵ Lamʼakakumi Jesu la Kaperenauma, olombodi wʼalimbi akayi le ndi. Ndi akosengasenga ati:

⁶ Khumadiondjo, ukambi ami ambetama lu luudu la hemo kʼekusi. Ndi ambusuwa efula.

⁷ Jesu akawutela ati: Dimi layuya, layuyokonoya.

⁸ Keli olombodi wʼalimbi akûkaluya diui ati: Khumadiondjo, dimi kema ololo wukukiye mboto lu luudu lami, keli uti diui tu, ku ukambi ami ayokono.

⁹ Dimi leko lʼokongo wa akina, ndu dimi leko la alimbi lʼokongo ami. Naka layutela one ndi: Utshu, ku ndi ntsho; la ukina ndi: Uyi, ku ndi ndja; ndu le ukambi ami ndi: Utshi dikambu ne, ku ndi ntsha.

¹⁰ Lamʼakuki Jesu aui aso, ndi akambi. Ndi akatela wane wakayuyelaka ati: Mete kanyutelami ndi: Dimi latenyi mbetawo ka wuki okone, kuyanga lu Isamyele.

¹¹ Dimi lambunyutela ndi: Antu efula wayuya uma lʼehutwelu ndu uma lʼedjelu ka unya, wayudjase la Abarahama, la Isaka, la Jakoba lu diulelu dia lʼulungu.

¹² Keli ana wa diulelu wayukadjema lʼandja lu udjima. Delu diayuyala leko ndu nkeketanya ka wanyu.

¹³ Jesu akatela olombodi wʼalimbi ati: Utshu, diatshami uku mbetawo kaye. Ukambi andi akakono lu unya ako.

Jesu Ambokonoya Ukilu a Petero a Umuntu

¹⁴ Lamʼakoto Jesu lu luudu la Petero, ndi akenyi ukilu a Petero a umuntu etami baka la diungi.

¹⁵ Ndi akawunandia la lunya landi, ku diungi diakashili. Umuntu ako akunela, akukambela ulimu.

¹⁶ La dikolo, vo wakawela antu efula waki la edienge. Ku ndi akatundja edienge la diui tu. Ndi akakonoya tshe waki la hemo.

¹⁷ Dikambu so diakayala, dia nshidiya diui diakati Isaya ati: Ndame kakose weodu asu, kakembe hemo yasu.

Dia Ndjala Umbeki wa Jesu Aha Dikambu Dia Tshitshe

¹⁸ Lamʼakenyi Jesu elui a waki wʼantu wudingi, ndi akati ati: Tuteho la wedi.

¹⁹ Ufundiji omotshi akayi le ndi, akawutela ati: Umbetsha, dimi layukuyela lu ahuli tshe wayuyutsho.

²⁰ Jesu akawutela ati: Mbulu yeko la afuku, fudu ya lʼulungu yeko la kefu, keli Onʼa untu kema la lama mbetamia ote andi.

²¹ Umbeki ukina akawutela ati: Khumadiondjo, etawo dimi tatshwi la ntukhunde papa.

²² Keli Jesu akawutela ati: Undijeli, utshiki edu wakhundeki asikawo edu.

Jesu Ambolembohaya Loheledi

²³ Lamʼakoto Jesu lu watu, ambeki andi wakuyeli.

²⁴ Nyulungi, lopepe la wulu lakayi lʼuduwa, ku watu akakumbama la asukhu. Keli ndi aki lu djo.

²⁵ Vo wakatshu le ndi, wakawemula, wakati vati: Khumadiondjo, utushimbeli, tambuvo.

²⁶ Ndi akawatela ati: Okoko wana wukanyu woma, nyu akanga wa mbetawo ka tshitshe? Ku ndi akunela, akahangwela lopepe la ashi wʼuduwa, ku wakalembohala yoo.

²⁷ Antu wakambi, wakati vati: Na wuhu wʼuntu one lakitanyia ndu lopepe ndu ashi wʼuduwa diui diandi?

Akanga wʼEdienge la Ngadara

²⁸ Lamʼakateho Jesu la wedi ukina lu kete yʼasi Ngadara, antu ahendi waki la edienge wakahumana la ndi. Vo wakayatumbaka uma la waumbu la ngala ka wulu wuhu waki nkukuka untu mbeta lu mbuka keso.

²⁹ Nyulungi, vo wakahangohango vati: Dikambu diakona dia-sasu la ye, we Onʼa Unyashungu? We ambuya lindu dia ndijutusuya la ntundu ka etena kasu?

³⁰ Limba la wuki la sumbu laki tshalula uma le wo laki lu nde.

³¹ Edienge wakosengasenga vati: Naka we ambutundja, kututumi lu limba la sumbu.

³² Ndi akawatela ati: Nyutshu. Ku vo wakatshu, wakatoto sumbu. Nyulungi, limba tshe lakakunguso lʼuhulula utsha lʼuduwa, lakavu tshe lu ashi.

³³ Wane wakayileshaka wakalawo, wakatshu lʼusumba, wakatusanya akambu tshe, ndu akambu wakayala le antu waki la edienge.

³⁴ Ku asi usumba tshe wakayi dia ndijuhumana la Jesu. Lamʼakawawenyi, vo wakosengasenga dia ndi mumo uma lu beke diawo.