Mateu 5 - La Bible en Otetela (Bible K'Ekila) 1991

Daku dia Jesu lu Dikuna: Etshoko wʼAntu

¹ Lamʼakenyi Jesu elui wʼantu, ndi akam ela lʼukungu. Lamʼakandiadjase, ambeki andi wakayi le ndi.

² Ndi akafula unyo, akawaetsha ati:

³ Wane weli la wula lʼetema, weko la otshoko, ne dia diulelu dia lʼulungu dieli diawo.

⁴ Wane watulelaka, weko la otshoko, ne dia vo wayusambama.

⁵ Wane weli la memakana, weko la otshoko, ne dia vo wayukita kete.

⁶ Wane weli la ndjala la pusa ka akambu wʼololo weli la otshoko, ne dia vo wayulutshama.

⁷ Wane wukana ketshi, weko la otshoko, ne dia vo wayuwauka ketshi.

⁸ Wane weli la etema wa pudipudi, weko la otshoko, ne dia vo wayena Unyashungu.

⁹ Waelundja antu weko la otshoko, ne dia vo wayuwaeta vati: Ana wa Unyashungu.

¹⁰ Wane wambusuyama dia akambu wʼololo, weko la otshoko, ne dia diulelu dia lʼulungu dieli diawo.

¹¹ Lamʼayuwunyotenga, lamʼayuwunyusuya, lamʼayuwunyumamanyia wehu tshe wʼakambu wa kolo dia dikambu diami, nyeko la otshoko.

¹² Nyongenengene nyutamanya ngenangena, ne dia difutu dianyu dieko efula lʼulungu, ne dia wakasuya amvutshi waki la ntundu kanyu wuhu ako.

Ambeki lʼAtei a Wa la Kete

¹³ Leho la la kete mbenyu. Keli naka leho lambusuwo, ukundi ayuluyala mpe ntu? Lo lambuyala anyanya, wayulukadja, wayulukamela lʼekulu wʼantu.

¹⁴ Yanyi ya wa la kete mbenyu. Haweyi mbishe usumba weli ladiku dia dikuna.

¹⁵ Antu hawutohetshaka tala, ku dikitsha la tshina dia kidundia, keli watudikitshaka ladiku dia ekitshelu ka tala. Usasi adio atohetelaka antu tshe weli lu luudu.

¹⁶ Okone usasi anyu ahete la ntundu ka antu, dia vo kaweyi etsha anyu wʼololo, kawutumbuli Shenyu le lʼulungu.

Jesu Akayi Dia Ndjushidiya Elembe la Aui wa Amvutshi

¹⁷ Tanyukanaki nyati: Dimi lakayi dia ndijudiaka elembe la aui wa amvutshi. Dimi kundja dia ndjadiaka, keli lakayi dia ndiashidiya.

¹⁸ Mete kanyutelami ndi: Edja ndu lamʼayushisho ulungu la kete, nduku djetaleta, nduku shikoshiko yayushisho uma lʼelembe, edja ndu lamʼuyutshama akambu ane tshe.

¹⁹ Untu tshe ladiaka olembe omotshi uma lʼelembe ene wuleki tshitshe, ndu letsha antu dia ntsha wuhu ako, wayuweta vati: Luleki tshitshe lu diulelu dia lʼulungu. Keli untu tshe layuwatshaka ndu layuwaetshaka, wayuweta vati: Untu a wuki lu diulelu dia lʼulungu.

²⁰ Dimi lambunyuteja ndi: Nyu hanyeyi mboto lu diulelu dia lʼulungu, tshikima akambu anyu wʼololo mbuleki wa afundji la Afarise.

Dikambu Dia Lutunu

²¹ Nyu nyakuki diui diakawatela antu wʼedjedja vati: Tudiakaki. Untu tshe ladiaka, ayuyala la dikambu dia ntsho lʼelumbwelu.

²² Keli dimi lambunyutela ndi: Untu tshe luka unyandi kele, ayuyala la dikambu dia ntsho lʼelumbwelu. Untu tshe layutela unyandi ati: We djeli, ayuyala la dikambu dia ntsho lʼembadi. Untu tshe layuta ati: We epoka, ayuyala la dikambu dia ntsho lu luwinga la dja.

²³ Okone naka we eko lu nkimo ushasha aye lʼediakelu, ku we ambuho wati: Unyami eko la mi dikambu,

²⁴ kutshiki ushasha aye leko la ntundu kʼediakelu. Kutshu, kutashidisha dikambu diasaye la unyaye, kuyi, kupikimo ushasha aye.

²⁵ Ukitanyia la utunyi aye esadi lamʼekinyu lu mbuka. Ne dia utunyi aye atukutukukimo le umbadi, la umbadi ntukukimo le ulami, ku vo ntukudja lu lukanu.

²⁶ Mete kakutelami ndi: We hutumba uma leko, tshikima we ambufuta dikuta dia ndijihelu.

Dia Luseka

²⁷ Nyu nyakuki diui diakawati vati: Tunanaki luseka.

²⁸ Keli dimi lambunyutela ndi: Untu tshe lendia umuntu, ku ndi ambukumbula, ndi ambunana la ndilʼutema.

²⁹ Naka su diaye dia lupami diambukutakanya, udikhunduli, udikadja. Ne dia nshisha leke otoi lʼuma lu dimba ndeka mbikadjema lʼtundu aye tshe lu luwinga la dja ololo.

³⁰ Naka lunya laye la lupami lambukutakanya, uluhimbuli, ulukadja. Dia nshisha leke otoi lʼuma lu dimba ndeka mbikadjema lʼutundu aye tshe lu luwinga la dja ololo.

³¹ Wakati ntu vati: Untu tshe lakimo wadendi, awusha mukandia wa ndjaka diwala.

³² Keli dimi lambunyutela ndi: Untu tshe lakimo wadendi naka aha lu dikambu dia luseka, ndi ambuwete umunanyi. Untu tshe latshuka umuntu losekiwo, ambunana.

Dia Tshibelu

³³ Ntu, nyakuki diui diakawatela antu wʼediedia vati: Tutshibaki lu kashi, keli ushidiya kene lakayatshibe le Khumadiondjo.

³⁴ Keli dimi lambunyutela ndi: Tanyutshibaki nduku utshiba. Tanyutshibaki ulungu, ne dia vo weli kati ka diulelu ka Unyashungu.

³⁵ Tanyutshibaki kete, ne dia yo yeli kihuna kʼekulu andi. Tanyutshibaki Jerusalema, ne dia yo yeko usumba wa khumʼekanga ka wuki.

³⁶ Tutshibaki ote aye, ndia we heyi mpiluya wondiji a divu otoi dia vo ndjala wema kana udima.

³⁷ Keli diui dianyu diayali: Elu; kana Kema. Diui tshe diahema ladiku dia aui aso dieli uma le kanga kolo.

Dia Nsomboya

³⁸ Nyu nyakuki diui diakawati vati: Su la su, nu la nu.

³⁹ Keli dimi lambunyutela ndi: Tanyulemanyaki la untu a kolo. Keli naka untu ambukokomola lu tama dia lunya la pami, kuwingisweli ndu tama dikina.

⁴⁰ Naka untu omotshi nangaka dia ntukufundia, dia mtosa ukutu aye, kukimo, ndi kose ndu koti diaye.

⁴¹ Naka untu ambukokendjakendja kilometere otoi la wulu, kutshu la ndi kilometere hyendi.

⁴² Usha one lakolomba engo. Tutshindjaki okongo le one lalanga nsomba uma le ye.

Dia Nanga Atunyi

⁴³ Nyu nyakuki diui diakawati vati: Ulangi unyaye, uhetsha utunyi aye.

⁴⁴ Keli dimi lambunyutela ndi: Nyulangi atunyi anyu, nyolombele wane watunyusuyaka.

⁴⁵ Okone nyu nyayuyala ana wa Shenyu le lʼulungu, ne dia ndi atuhutuyaka unya le antu wa kolo ndu le antu wʼololo, ndu atutumaka mvula le antu wʼololo ndu le antu wa kolo.

⁴⁶ Naka nyu nyatulangaka wane watunyulangaka, nyayuyala la difutu diakona? Ndu elungudi wʼelambu hawututshaka osoku uka?

⁴⁷ Naka nyu nyatemulaka anyanyu atu, dikambu diakona diatunyutshaka diulekinyu antu akina? Ndu asi wedja hawututshaka osoku uka?

⁴⁸ Okone nyuyali ololo tshe, uku weli Shenyu le lʼulungu ololo tshe.