Mateu 4 - La Bible en Otetela (Bible K'Ekila) 1991

Jesu Ambuhimbama

¹ Nyuma kʼOlolo akalombola Jesu lʼusui dia ndi ntuhimbama le uhibanyi

² Lamʼakandiakili mbu ya nde tanyi akumi anei la etshu akumi anei, ndi ikuki ndjala.

³ Uhimbanyi akayi le ndi, akawutela ati: Naka On a Unyashungu keye, uteli ave any wahilo kenga dia ma.

⁴ Keli ndi akûkaluya diui ati: Akafundiama ati: Untu hayala la lumu ne dia ma tu, Keli ayuyala la lo ne dia aui tshe Watumba uma lʼunyo wa Unyashungu.

⁵ Ku uhimbanyi akatshu la ndi lu ngelu kʼekila, akûkitsha lʼote wʼetemwelo.

⁶ Ndi kawutela ati: Naka Onʼa Unyashungu keye, ulimbo uya la kete, ne dia akafundiama ati: Ndi ayukosengwela andjelo andi, Ku vo wayukemba lu anya awo, Ne dia we atukuhumanya dikaka lu dive

⁷ Jesu akawutela ati: Akafundiama ntu ati: Tuhimbaki Khumadiondjo, Unyashungu aye

⁸ Uhimbanyi akatshu la ndi ntu lʼote wʼukungu, akawenya waulelu tshe wa lʼandja ndu lutumbu lawo.

⁹ Ndi akawutela ati: Dimi layukushawo, vo tshe, naka we ayunkhusamela dia ntemolami.

¹⁰ Ku Jesu akawutela ati: Satana, mo! ne dia akafundiama ati: Kotemolaki Khumadiondjo, Unyashungu aye, Kûkambelaki ndiame ulimu.

¹¹ Uhimbanyi akutshiki. Ku andjelo wakayi, wakukimanyia.

Jesu Ambutsho la Ngalili

¹² Lamʼakuki Jesu ati: Wambundia Joani ndi akatshu la Ngalili.

¹³ Ndi akamo uma la Nazareta akayudjase la Kaperenauma ka lasuki lʼuduwa, lu leke la Zebuluna la Nafetali.

¹⁴ Dikambu ne diakayala dia nshidiya diui diakati umvutshi Isaya ati:

¹⁵ Kete ya Zebuluna la kete ya Nafetali, Lʼumamu wʼuduwa, la wedi wa Jorodana, Ngalili kʼasi wedja —

¹⁶ Antu wakadjaseka lu udjima Wakenyi usasi a wuki. Usasi wakahetela antu wakadjaseka Lu dihuli dia didjidji dia nyoi.

¹⁷ Uma lʼetena kako, kakatatela Jesu nsambisha, ata ati: Nyukadimuli etema, ne dia diulelu dia lʼulungu diaya suki.

Jesu Ambeta Antu Anei lu Ambeki

¹⁸ Lamʼakatakendiakendiaka Jesu lʼumamu wʼuduwa wa Ngalili, ndi akenyi untu la onangu, Simona letawo vati: Petero, la Andere, wakadjaka tei lʼuduwa, ne dia vo waki amundiji wa nsi.

¹⁹ Ndi akawutela ati: Nyundijeli, layunyuhiluya amundiji wʼantu.

²⁰ Kemʼedja vo wakatshiki tei yawo, wakuyeli.

²¹ Lamʼakandiamo uma leko, ndi akenyi untu ukina la onangu, Jakoba onʼa Zebede, la Joani, waki lu watu la shewo Zebede, walongosola tei yawo, ku ndi akawaeti.

²² Kemʼedja vo wakatshiki watu la shewo, wakûyeli.

²³ Jesu akakindula la Ngalili tshe, aketshaka antu lu temwelo diawo, akasambishaka lukumu lʼololo la diulelu. Ndi akakonoyaka wehu tshe wʼelandu la wehu tshe wa hemo waki la antu.

²⁴ Lukumu landi lakadiangana la Sumya tshe. Vo wakawela antu tshe waki lʼelandu, ndu akanga a wehu efula wa hemo, akanga wʼasui, akanga wʼedienge, akanga a dikhunye, ndu akanga wa tshumbi, ku ndi akakonoya.

²⁵ Elui a waki wʼantu wakuyeli uma la Ngalili, uma la Dekapoli, uma la Jerusalema, uma la Judiya, ndu uma la wedi wa Jorodana.