Mateu 26 - La Bible en Otetela (Bible K'Ekila) 1991

Sheki ya Ndjaka Jesu

¹ Lamʼakashili Jesu mvuta aui aso tshe, ndi akatela ambeki andi ati:

² Nyu mbeyaka nyati: Lʼokongo a nshi hyendi, lushi la wuki lʼElekanelu layuyala. Onʼa untu ayukimoma dia vo mbudiaka lʼutamba a mpeketanya.

³ Lʼetena keso, elombedi a waki la dikumanyi dia wudja wakasangana lu seke dia olombedi a ladiku, lakawetaka vati: Kaifasi.

⁴ Vo wakambwana dia mundia Jesu la lukesu, la dia mbudiaka.

⁵ Keli vo wakati vati: Aha lʼetena ka lushi la wuki, lundju latukuyala lʼatei wʼantu.

Malashi wʼUshinga a Wulu

⁶ Lamʼaki Jesu la Betaniya lu luudu la Simona, kanga sudi,

⁷ umuntu omotshi akayi le ndi la olondio wa malashi wʼushinga a wulu efula. Ndi akawutela lʼote lamʼakandiadjashi la mesa.

⁸ Lamʼakenyi ambeki dikambu so, vo wakuki kele, wakati vati: Ukundi alanyawo malashi okone na?

⁹ Malashi one utusundjama la falanga efula dia mbisha asi wula.

¹⁰ Keli Jesu akeyi dikambu so, akawambula ati: Ukundi atshumulanyu umuntu one? Ndi ambuntshela dikambu diʼololo.

¹¹ Nyu nyeko la akanga a weula nshi tshe lʼatei anyu, keli dimi kema lʼatei anyu nshi tshe.

¹² Ndi ambumvutela malashi one, ndi ambutsha dikambu dia nongosolami lamʼayuwunkhunde.

¹³ Mete kanyutelami ndi: Lʼahuli tshe wa la kete, lene ayuwusambishaka lukumu lʼololo lone, wayutaka ndu dikambu diambutsha umuntu one. Dio diayuyala euhwelu kandi.

Judasi Ambuyanga Nkimo Jesu le Elombedi

¹⁴ Lʼokongo diku omotshi la lu dikumi la ahendi lukumbu landi Judasi Isakariyote, akatshu le elombedi a waki.

¹⁵ Ndi akawambula ati: Kayunyumbisha naku dimi layunyukimwelandi? Ku vo wakufuti tenyi dia fesa akumi asatu.

¹⁶ Uma ka etena keso, kakandiayangi mbakimwela Jesu.

Ma DiʼElekanelu

¹⁷ Lushi la ntundu la Ma Diaha la Edya, ambeki wakayi le Jesu. Vo wakawumbula vati: Lendi alangaye shu ntukolongoswela dia ntole ma diʼelekanelu?

¹⁸ Ndi akati ati: Nyutshu lʼusumba, laka untu omotshi, kanyutuwuteli nyati: Umbetsha kata ati: Etena kami kaya suki. Dimi layuyole ma dia elekanelu lakaye, dimi la ambeki ami.

¹⁹ Ambeki wakatshi uku akawatela Jesu. Vo wakatolongosola ma diʼelekanelu.

²⁰ La dikolo, Jesu akadjashi la ambeki andi dikumi la ahendi wale ma.

²¹ Lamʼakawalekaka, ndi akati ati: Mete kanyutelami ndi: Otoi anyu ayunfunga.

²² Vo wakanyangi efula; wakatatela mbumbula untu lʼuntu ati: Khumadiondjo, dimi?

²³ Ndi akâkaluya diui ati: One ludjisha la mi lunya lu lukinga, ndi kayunfunga

²⁴ Onʼa untu ayutsho uku ufundiami dikambu diandi. Keli fono kayayi le untu ako lafunga Onʼa untu! Aki ololo untu ako kumbuto.

²⁵ Judasi, lakufungi, akawumbula ati: Umbetsha, dimi? Jesu akawutela ati: Wemʼoso ata.

²⁶ Lamʼakawalekaka ma, Jesu akose ukama wa ma, akotshokola, akawatula. Ndi akasha ambeki, akati ati: Nyose, nyuli; dimba diami ne.

²⁷ Ndi akose dikoho, akuki lusaka, akawasha, akati ati: Nyono nyu tshe.

²⁸ Dikila diami dia sheki ne diambutshulwama dia nyimanyia antu efula kolo.

²⁹ Dimi lambunyutela ndi: Umaka kakiane dimi handjono ashi wʼelua ene edja ndu lushi layumono la nyu ashi wʼelua wʼeyuyu lu diulelu dia Papa.

Jesu Ambutela Petero Dia Langunu Landi

³⁰ Lamʼakawimbi usambu, vo wakatshu lu Ukungu wʼEweli.

³¹ Ku Jesu akawatela ati: Nyu tshe nyayutakana lu dikambu diami lʼutshu one, ne dia akafundiama ati: Dimi layudiaka ulami wʼekoko, ku ului wʼekoko wayudiangana.

³² Keli lamʼayumulwama, layutsho la ntundu kanyu la Ngalili

³³ Keli Petero akûkaluya diui ati: Kuyanga antu tshe wayutakana lu dikambu diaye, dimi halutakana pundju.

³⁴ Jesu akawutela ati: Mete kakutelami ndi: Lʼutshu one, la ntundu lekeka lateki, we ayumanguna tena satu.

³⁵ Petero akawutela ati: Naka dieli la mi dia mvo la ye, halakanguna. Ndu ambeki tshe wakati pupu.

Ngetesemane

³⁶ Jesu akayi la wo lu dihuli diakawetaka vati: Ngetesemane. Ndi akatela ambeki andi ati: Nyutukudjase lane, dimi ntukutsho lene dia ntolomba.

³⁷ Ndi akatshu kame la Petero la ana ahendi wa Zebede. Ndi akatatela nyanga lʼutema, aki la lokonyo efula.

³⁸ Ku ndi akawatela ati: Utemʼami ambutamanya nyanga utsha lu nyoi. Nyutshikali lane, nyosenaki la mi.

³⁹ Ku ndi akangana la wo yema, akayakosha ekhukhumadi la kete. Ndi akalombe ati: Papa, naka nkukaka, dikoho ne diamumweli. Keli aha uku alangami, paka uku alangaye.

⁴⁰ Ku ndi akayi le ambeki, akatani lu djo. Ndi akatela Petero ati: Ngandi, nyu hanyeyi nsena la mi ushidi otoi?

⁴¹ Nyewoki, nyolombaki, nyutukoko lʼehimba. Mete utema nangaka, keli dimba mbeli wodu.

⁴² Ndi akatshu etena ka hendi, akatolomba ati: Papa, naka dikoho ne hadieyi mumwelami, paka dimi dino, diatshami uku alangaye.

⁴³ Ndi akayi ntu, akatani lu djo, je dia ashu awo waki wetshu.

⁴⁴ Ndi akatshiki ntu, akatshu, akatolomba etena ka satu, akati aui ntu pupu.

⁴⁵ Ku ndi akayi le ambeki, akawambula ati: Nyakalali djo ndu nyakumuya? Nyendi, unya aya suki; Onʼa untu ambushila la nkimwama lʼanya wʼantu wa kolo.

⁴⁶ Nyeto, tutshu. Nyendi ufungi ami aya suki.

Judasi Ambufunga Jesu; Wambundia Jesu

⁴⁷ Kamʼakandiataka osoku, Judasi, omotshi a lu dikumi la ahendi, akayi la ului a wuki wʼantu waki la tombo la tukalimba, uma le elombedi a waki la dikumanyi dia wudja.

⁴⁸ Ufungi andi akawasha djimbitelu ati: One layononana la mi, keti ndi uku; kanyuwundi.

⁴⁹ Kemʼedja, ndi akawemula ati: Moyo, Umbetsha! Ku ndi akanonana la ndi.

⁵⁰ Jesu akawutela ati: Ongenyi, aya ntsha dikambu diuyeye. Ku vo wakayi, wakahe Jesu anya, wakawundi.

⁵¹ Endia, omotshi a wane waki la Jesu, akasimbula lunya, akasomola yombo, akakote ukambi wʼolombedi a ladiku, akuhimbula tui.

⁵² Ku Jesu akawutela ati: Ukaluya yombo yaye lu dihusu; ne dia wane tshe wakimela yombo, wayuvo la yombo.

⁵³ We nkanaka wati: Dimi haleyi nomba Papa, ku ndi ntumelami andjelo wuleki elui dikumi lʼehendi kakiane uka?

⁵⁴ Ukundi ukuki afundelu nshidiyama ati: Dieli la dikambu ne ndjala?

⁵⁵ Lu unya oso, Jesu akatela elui wʼantu ati: Nyu nyambuya la tombo la tukalimba dia ndjumundia uku atuwundiaka opotodi uka? Dimi lakadjaseka la lushi la lushi lu etemwelo, letsha, nyu kumundiami.

⁵⁶ Keli dikambu ne tshe diambuyala dia nshidiya afundelu wa amvutshi. Ku ambeki tshe wakutshiki, wakalawo.

Diwandja Dia Jesu la Ntundu kʼEmbadi

⁵⁷ Amundji wa Jesu wakotole laka Kayifasi, olombedi a ladiku, lene akasangana afundji la dikumanyi.

⁵⁸ Keli Petero akatuyelaka tshalula utsha lu seke dia lukumbu la olombedi a ladiku, akoto loko, akatudjase la alami, ne dia mendia ekumelu ka dikambu.

⁵⁹ Elombedi a waki la ului wʼembadi tshe wakayangi dikambu dia mamanyiya Jesu, ne dia mbeya mbudiaka.

⁶⁰ Keli vo kumbutana la dikambu, kuyanga mbakayi emenyi efula wa kashi. Keli lʼokongo diku, ahendi wakayi;

⁶¹ wakati vati: Untu one akati ati: Dimi mbeyaka mpandjula etemwelo ka Unyashungu la nkihika lu nshi shatu.

⁶² Olombedi a ladiku akemala, akawumbula ati: We hakaluya nduku diui? Dikambu diata emenyi ene, ukundi edio?

⁶³ Keli Jesu akatshikala ki. Olombedi a ladiku akawutela ati: Dimi lambukolomba lu lukumbu la Unyashungu a lumu ndi: Ututeli kana Kristu keye, Onʼa Unyashungu.

⁶⁴ Jesu akûkaluya diui ati: Wemʼoso ata. Keli dimi lambunyutela ndi: Umaka kakiane, nyayena Onʼa untu udjashi lu lunya la pami la Wulu; ayayi lu wangi wa lʼulungu.

⁶⁵ Ku olombedi a ladiku akayatela ahondo, akati ati: Ndi ambotenga Unyashungu, akatahumbi emenyi ntu? Hanyuki! nyu nyame aso wuka lotengo landi.

⁶⁶ Akananyu na? Vo wakâkaluya diui vati: Ndi nkukaka mvo.

⁶⁷ Ku vo wakohongwela soi lʼekundji, wakokomola mbala. Akina wakuhakula tombo,

⁶⁸ wakawutela vati: We Kristu, ututeli akambu wahatayi! Untu akona ukokomodi?

Petero Ambanguna Jesu Tena Satu

⁶⁹ Petero akadjashi lʼandja lu seke dia lukumbu. Ukambi a umuntu omotshi akayi le ndi, akawutela ati: Ndu we kaki la Jesu yʼusi Ngalili.

⁷⁰ Keli ndi akanguna la ntundu kawo tshe, akati ati: Dimi haleyi kene kataye.

⁷¹ Lamʼakandiatumbi lʼandja lu mbalasa, ukambi a umuntu ukina akawenyi, akatela wane wakemadi laawo ati: Ndu untu one kaki la Jesu yʼusi Nazareta.

⁷² Ndi akanguna ntu, atshiba ati: Dimi haleyi untu oso.

⁷³ Kemʼedja wane wakemadi laawo, wakatela Petero vati: Mete ndu we keli usikawo, ne dia oteketa aye ambukushula.

⁷⁴ Ku ndi akatatela ntshika tunyi la ntshiba ati: Dimi haleyi untu oso. Kemʼedja lekeka lakeki.

⁷⁵ Ku Petero akuho diui diakawutela Jesu ati: La ntundu ka lekeka lateki, we ayumanguna tena satu. Ndi akatumbi, akaleli wulu.