Mateu 23 - La Bible en Otetela (Bible K'Ekila) 1991

Jesu Ambuhunwela Antu Dia Afarise

¹ Ku Jesu akatela elui wʼantu la ambeki andi ati:

² Afundji la Afarise mbudjashi lu kati ka Mose,

³ okone nyutshaki ndu nyetawoki akambu tshe wanyutelawo. Keli tanyutshaki uku atuwutshaka, ne dia vo watusambishaka, keli hawutshi.

⁴ Vo watukelekaka eshiko wa wetshu, wa wulu memba, watuwaheka lu aheka wʼantu. Keli vame hawulangi mbaunyiya kuyanga la luhita.

⁵ Keli vo watutshaka etsha awo ne dia menama le antu. Vo watuhamiaka tetshi tawo ta dikuhu tufundiami avesa wufundiami elembe. Watokokolaka ehimbu wa ahondo awo.

⁶ Vo watulangaka ahuli wa nemo lu alambu, la die diuleki amena lu temwelo,

⁷ la waemu lu tuka; ndu dia antu mbaeta vati: Umbetsha.

⁸ Keli nyu tanyetamaki umbetsha, ne dia nyu nyeko la umbetsha otoi, ku nyu tshe nyeko antu la onangu.

⁹ Tanyetaki untu a lu kete nyati: Shesu, ne dia nyu nyeko la Shesu otoi, ndi eko lʼulungu.

¹⁰ Tanyetamaki ewandiji, ne dia nyu nyeko la uwandji otoi, Kristu ndiame.

¹¹ Keli one luleki wuki lʼatei anyu, kayali ukambi anyu.

¹² Untu tshe layambiya, ayukitshakitshama. Untu tshe layakitshakitsha, ayumbiyama.

Fono Esambeli

¹³ Keli fono kayayi le nyu, afundji la Afarise, akanga a lukesu! ne dia nyu nyatudihelaka antu lukuki la diulelu dia lʼulungu. Nyu nyame hanyoto loko, ku hanyetawo dia wane walanga mboto woto.

¹⁴ Fono kayayi le nyu, afundji la Afarise, akanga a lukesu! ne dia nyu nyatohotolaka wadi waki edu mvudu, ndu nyatolombaka alombelo wʼetali ne dia dienyanyu. Okone dianyelu dianyu diayuleka wuki.

¹⁵ Fono kayayi le nyu, afundji la Afarise, akanga a lukesu! ne dia nyu nyatetetaka lu ashi a waki ndu lu kete dia mbete untu omotshi umbetawudi a dikambu dianyu. Lamʼambunduyala umbetawudi a dikambu dianyu, ku nyu mbete onʼa luwinga la dja, lunyuleki tena pendi.

¹⁶ Fono kayayi le nyu, elombodi a tutshungu, nyu wane watutaka nyati: Naka untu ambutshiba etemwelo, nduku dikambu; keli naka untu ambutshiba paunyi ka lu etemwelo, keti ndi ambutshungama lu etshibelu kandi!

¹⁷ Nyu akanga a dinginya wa tutshungu! Engo kakona kuleki wuki, paunyi, kana etemwelo kakakidia paunyi?

¹⁸ Ndu nyati: Untu tshe latshiba ediakelu, kema la dikambu. Keli untu tshe latshiba ushasha wa loko, ndi ambutshungama.

¹⁹ Nyu akanga a tutshungu! Engo kakona kuleki wuki, ushasha, kana ediakelu katukidiaka ushasha?

²⁰ Okone one latshiba ediakelu, ndi ambutshiba ndu diango tshe dieli loko.

²¹ One latshiba etemwelo, ndi ambukitshiba, to la one ludjashi loko.

²² One latshiba ulungu, ambutshiba kati ka diulelu ka Unyashungu, to la one ludjashi loko.

²³ Fono kayayi le nyu, afundji la Afarise, akanga a lukesu! ne dia nyu nyatukimoka tenyi dia dikumi dia nyumba, ndu luhuhu, ndu samimbala, ku nyatukaltka akambu wuleki waki lu elembe, uku dialelu dʼololo, ketshi, la mbetawo. Aki ololo dia nyu ntsha akambu aso, keli aha nkale akambu akina.

²⁴ Nyu elombodi a tutshungu, nyatolengolaka tshimbatshimba la djungo, nyatomenaka kamelo!

²⁵ Fono kayayi le nyu, afundji la Afarise, akanga a lukesu! ne dia nyu nyatotshaka lʼandja a dikoho la donga, keli lʼetei awo ambulula too la dihotwanelu la dishi.

²⁶ We Ufamse a tshungu! utaotshisha lʼetei a dikoho la donga, okone ndu lʼandja ayuyala pudipudi.

²⁷ Fono kayayi le nyu, afundji la Afarise, akanga a lukesu! ne dia nyu nyeko uku waumbu wediawo ladiku, weli amena lʼandja, keli lʼetei awo, vo wambulula la weka wa edu wʼantu la mindu tshe.

²⁸ Okone ndu nyu menamaka antu wʼololo lu ashu wʼantu, keli lʼetei etema anyu, nyu yambulula too la lukesu la akambu wa kolo.

²⁹ Fono kayayi le nyu, afundji la Afarise, akanga a lukesu! Ne dia nyu nyatuhikaka waumbu wa amvutshi, nyatusangaka waumbu wʼantu wʼololo.

³⁰ Nyu nyatutaka nyati: Ututuyala lu nshi ya watshesu, tshiki shu komboto la wo lu unungu wa dikila diʼamvutshi.

³¹ Okone nyu nyambuyafunga nvati: Shu teko tukanula ta andjaki wʼamvutshi.

³² Ku nyuludia yediko ya watshenyu.

³³ Nyu elui, ndu diuhu dia akhuha, ukundi ayunyuhandia elumbwelu ka luwinga la dja?

³⁴ Okone dimi latunyutumelaka amvutshi la akanga a yimba, la afundji. Nyu nyayudiaka amotshi udiakadiaka, akina lu utamba a mpeketanya. Nyayokomola akina emambu lu temwelo dianyu, nyayuwasuya lu usumba lʼusumba.

³⁵ Okone dikila tshe dia antu wʼololo diakako la kete diayuyala le nyu, uma ka dikila dia Abele untu ololo edja ndu dikila dia Zekamya, onʼa Barakiya, lakanyadiaki lʼasa etemwelo la ediakelu.

³⁶ Mete kanyutelami ndi: Akambu ane tshe wayuyala le wa lu lolonga lone.

Jesu Ambulelela Jerusalema

³⁷ Yee, Jerusalema, Jerusalema, latudiakaka amvutshi, latukaka wane watuwukutumelaka ave! Ndi tena efula diakamalangi nsanganya anʼaye, uku atusanganyaka wali a koko ana ato la tshina dia ahafu ato, keli nyu kunanga li!

³⁸ Endia, wambunyutshikela khumbu kanyu anyanya.

³⁹ Dimi lambunyutela ndi: Nyu hanyuyomena edja ndu lamʼayunyuta nyati: One layayi lu lukumbu la Khumadiondjo eli la otshoko.