Mateu 22 - La Bible en Otetela (Bible K'Ekila) 1991

Dambu Dia Tshuki, la Antu Wakaseke Ndja

¹ Jesu akahula diui, akawaukela wela ntu ati:

² Diulelu dia lʼulungu diambufana la khumʼekanga kemotshi, lakakatela onʼandi a pami dambu dia tshuki.

³ Ndi akatumi ekambi andi dia nteta wane wakandialadiya lu dambu dia tshuki, keli vo kunanga ndja.

⁴ Ndi akatumi ekambi andi ekina ntu ati: Nyututeli wane wakamaladiya lu dambu nyati: Nyulungi, dimi lambolongosola ma diami dia dikolo: ngombe yami la esongo wa ngombe wununyi wambudiakema, la diango tshe diambolongoswama. Nyuyi lu dambu dia tshuki.

⁵ Keli vo wakonyola dikambu diako, wakatshu lu akambu awo: omotshi akatshu lʼekambo kandi, ukina lʼukandia andi.

⁶ Akina wakandi ekambi andi, wakatshela kolo, wakadiaki.

⁷ Khumʼekanga akumala kele. Ndi akatumi alimbi andi, ku vo wakatulanya andjakanyi aso, ndu wakatutshumba usumba awo.

⁸ Ku ndi akatela ekambi andi ati: Diango dia tshuki diambolongoswama, keli antu wakamaladiya, tawaki ololo.

⁹ Okone nyutshu lu asanga wa mbuka, nyuteti wane wayunyutana, wayi lu dambu dia tshuki.

¹⁰ Ku ekambi eso wakatshu lu wambuka, wakasanganya antu tshe wakawatani, ndu wa kolo, ndu wʼololo. Okone luudu la tshuki lakaluli too lʼambetami wa dambu.

¹¹ Keli lamʼakoto khumʼekanga dia ndjendia ambetami wa lu dambu, ndi akenyi untu omotshi laki kundja la dihondio dia tshuki loko.

¹² Ndi akawumbula ati: Ongenyi, ukundi akayotwe lone aha la dihondio dia tshuki? Untu ako akatewala.

¹³ Ku khumʼekanga akatela ekambi andi ati: Nyukeleki lʼanya ndu lʼekulu, nyuwukadja lu udjima wa lʼandja. Delu diayuyala leko ndu ekeketanyelu ka anyu,

¹⁴ ne dia antu efula waketami, keli antu tshitshe mbambosonwama.

Wambumbula Jesu Dia Mbundia lu Lulimi: “Kana Ololo Nambula Kayisa”

¹⁵ Afarise wakatshu, wakadji sheki ya nyanga wuhu wukukiwo mundia Jesu lu aui andi.

¹⁶ Vo wakatumi ambeki awo kame la asika Herode. Ku vo wakatuwumbula vati: Umbetsha, shu mbeyaka shati: Kanga mete keye; ndu we atetshaka antu mbuka ka Unyashungu lu mete. We hakanela nduku untu, ne dia we hadji yimba dia wuhu akona weli antu.

¹⁷ Okone ututeli uku akanaye. Eko ekila dia nfuta elambu le Kayisa, kana kema?

¹⁸ Keli Jesu akeyi longo lawo; akawambula ati: Nyu akanga a lukesu, okoko wana wampimbanyu?

¹⁹ Uhunyomenya falanga yalambulawo. Vo wakawela denariyo otoi.

²⁰ Ku Jesu akawambula ati: Efanelu la efundelu kaki na kene?

²¹ Vo wakûkaluya diui vati: Ka Kayisa. Ku ndi akawatela ati: Okone nyusha Kayisa diango dia Kayisa; nyusha Unyashungu diango dia Unyashungu.

²² Lamʼakawuki diui so, vo wakambi; wakutshiki, wakatshu.

Kana Eulwelu kʼUma lu Nyoi Keko

²³ Lushi lako, Asaduke, wane watutaka vati: Eulwelu kʼuma lu nyoi kemako, wakayi le Jesu. Vo wakawumbula umbula omotshi,

²⁴ vati: Umbetsha, Mose akati ati: Naka pami kemotshi ambuvo, ku ndi kuntutshi ana, onangu kakitani la wadendi, dia ndi mbulwela onangu luhanga.

²⁵ Lʼatei asu kaki anangu esambeli. Lʼenundu akatshuki wadi, akavu. Ku lamʼakindi kumbuta ana, ndi akatshikela onangu wadendi.

²⁶ Ndu la hendi akatshi osoku, ndu la satu, edja ndu lʼesambeli.

²⁷ Ndu umuntu akayuvo lʼokongo awo tshe.

²⁸ Okone lu eulwelu kʼuma lu nyoi, ndi ayuyala wadi a na lʼatei wʼantu aso esambeli? ne dia waki la ndi vo tshe.

²⁹ Ku Jesu akâkaluya diui ati: Nyu nyambunganela, ne dia nyu hanyeyi afundelu, kana wulu wa Unyashungu.

³⁰ Lu eulwelu kʼuma lu nyoi, vo hawutshuki, kuyanga ntshukama. Keli vo weli uku andjelo lʼulungu.

³¹ Keli dia eulwelu ka wavo uma lu nyoi, nyu nyatali diui diakati Unyashungu ati:

³² Dimi keli Unyashungu wa Abarahama, Unyashungu wa Isaka, Unyashungu wa Jakoba? Ndi kema Unyashungu a wavo, keli eko Unyashungu a wasena.

³³ Lamʼakuki ului wʼantu diui so, vo wakambi dia wetshelu andi.

Olembe Akona Wuleki Wuki?

³⁴ Keli lamʼakuki Afarise vati: Ndi ambutewadia Asaduke, vo wakasangana kame.

³⁵ Otoi awo aki umbeyi wʼelembe, akambula Jesu ne dia mbuhimba ati:

³⁶ Umbetsha, lu elembe, olembe akona wuleki wuki?

³⁷ Jesu akawutela ati: Ulangi Khumadiondjo Unyashungu aye lʼutema aye tshe, la lumu laye tshe, ndu la yimba yaye tshe.

³⁸ Olembe oso, mbeli olembe wuleki wuki ndu wa ntundu.

³⁹ Olembe a hendi ambufana ati: Ulangi unyaye uku ayalangaye.

⁴⁰ Elembe tshe la aui wa amvutshi wambuhanema lu elembe ene ehendi.

Jesu Ambumbula Afarise Dia Kristu

⁴¹ Lamʼakasangana Afarise kame, Jesu akawambula umbula omotshi,

⁴² ati: Ukundi akananyu dia Kristu na? Kanula ya na yendi? Vo wakawutela vati: Kanula ya Davidi.

⁴³ Ndi akawambula ati: Ukundi akaweti Davidi lakaludiama la Nyuma kʼOlolo, ati: Khumadiondjo, akandiati ati:

⁴⁴ Khumadiondjo akatela Khumemi ati: Udjase lu lunya lami la pami, Edja ndu lambukitsha atunyi aye la tshina diʼekulu aye?

⁴⁵ Naka Davidi akaweti ati: Khumadiondjo, ya ukundi wendi kanula yandi?

⁴⁶ Nduku untu akeyi mbukaluya diui. Uma lu lushi loso, untu kundjala la dihunga dia mbumbula embula ntu.