Mateu 21 - La Bible en Otetela (Bible K'Ekila) 1991

Jesu Ambukuma la Jerusalema la Lutumbu

¹ Lamʼakawasukana utsha la Jerusalema, vo wakakumi la Betefange, lʼUkungu wʼEweli. Ku Jesu akatumi ambeki andi ahendi;

² akawatela ati: Nyutshu utsha la ngelu keledinyu, nyayutana pundia ukelekami la onʼato. Kanyuyikelekuli, kanyuyi la yo le mi.

³ Naka untu omotshi ayunyumbula, kanyuwuteli nyati: Khumadiondjo kayi-humba. Kemʼedja ndi ayuyituma.

⁴ Dikambu so diambuyala dia nshidiya diui diakati umvutshi ati:

⁵ Nyuteli ona umuntu a Siona nyati: Endia, khumʼekanga kaye kayayi le ye, Ndi la memakana, ahemi ladiku dia pundia, Ndu ladiku dia osongo a pundia, lakuto le pundia.

⁶ Ambeki wakatshu, wakatshi uku akawatela Jesu.

⁷ Vo wakayi la pundia la osongo a pundia, wakakitsha ahondo ladiku diayo, ku ndi akadjase ladiku diayo.

⁸ Antu wakaleki efula wakali ahondo awo lu mbuka. Akina wakakote avundja wʼetamba, wakali lu mbuka.

⁹ Elui wʼantu, wane wakatatshokaka la ntundu kandi ndu wakatuyelaka, wakatahangohango vati: Hosana le Kanula ya Davidi! One luyi lu lukumbu la Khumadiondjo eko la otshoko! Hosana lʼulungu!

¹⁰ Lamʼakandiakumi la Jerusalema, asi usumba tshe wakakasana; wakati vati: Akona one na?

¹¹ Elui wʼantu wakati vati: Uku eli umvutshi Jesu, uma la Nazareta ka la Ngalili.

Jesu Ambutshanya Asi Kituka Uma lʼEtemwelo

¹² Jesu akoto lʼetemwelo ka Unyashungu. Ndi akatshanya wane tshe wakasundjaka ndu wakasumbaka lu etemwelo. Ndi akatshulula mesa wʼamingudi wa falanga, ndu ekala wʼasundijishi wa khudumba.

¹³ Ndi akawatela ati: Akafundiama ati: Weti luudu lami vati: Luudu la dombelo. Keli nyu nyambuluhiluya wuku wʼapotodi.

¹⁴ Akanga a tutshungu la akanga wa tshumbi wakayi le ndi lu etemwelo, ku ndi akakonoya.

¹⁵ Keli lamʼakenyi elombedi la afundji akambu wa mamba wakandiatshi, ndu akendia wahangohango lu etemwelo vati: Hosana le Kanula ya Davidi! vo wakuki yenyi.

¹⁶ Ku vo wakawumbula vati: We mbukaka okone wata akendia aso? Jesu akawatela ati: Elu; nyu nyatali nyati: We akaluwanya diandu lʼenyo Wa ana wʼashashi la waloma?

¹⁷ Ndi akatshiki, akamo uma lʼusumba, akatshu la Betaniya, akatuhanga leko.

Wulu wa Mbetawo

¹⁸ Lamʼakatakalulaka Jesu utsha lʼusumba la pindju, ndi akuki ndjala.

¹⁹ Lamʼakandenyi utamba a fingu lʼumamu a mbuka, ndi akatshu laawo. Ndi kuntana nduku engo loko, paka akatshi atu. Ku ndi akatela utamba ati: Elua tawotokaki ntu le ye pundju! Kemʼedja utamba a fingu akalengela.

²⁰ Lamʼakenyi ambeki dikambu so, vo wakambi. Vo wakati vati: Ukundi ambolengela utamba a fingu shashimuya okone?

²¹ Jesu akâkaluya diui ati: Mete kanyutelami ndi: Naka nyu nyeko la mbetawo ndu hanyukandiakandia, nyu hanyutsha paka dikambu diutshedimi utamba a fingu one tu. Keli naka nyayutela ukungu one nyati: Uyanya, uyakadja lʼuduwa, dikambu so mbeyaka ntshama.

²² Naka nyu la mbetawo, nyayulungula akambu tshe walombanyu lu dombelo dianyu.

Wambumbula Jesu Dia Wulu Audi

²³ Lamʼakoto Jesu lʼetemwelo, elombedi a waki la dikumanyi dia wudja wakayi le ndi. Lamʼakandetshaka antu, vo wakawumbula vati: La wulu akona watshaye akambu ane? Ndu akakusha wulu one na?

²⁴ Jesu akâkaluya diui ati: Ndu dimi layunyumbula umbula omotshi. Naka nyu nyayukadimula umbula ako, ku ndu dimi layunyutela uma lu wulu akona watshami akambu ane.

²⁵ Batiza ka Joani, uma lendi akito? Uma lʼulungu, kana uma le antu? Vo wakakani yimba vati: Lamʼayututa shati: Uma lʼulungu, ndi ayuta ati: Ya ukundi akinyu kumbetuwo?

²⁶ Keli naka shu tayuta shati: Uma le antu, shu mbukaka elui wʼantu woma, ne dia antu tshe mamemaka Joani vati: Umvutshi mbendi.

²⁷ Okone vo wakâkaluya Jesu diui vati: Shu hateyi. Ndu ndi akawatela ati: Ndu dimi hanyutela uma lu wulu akona watshami akambu ane.

Wela wa Ana Apami Ahendi

²⁸ Ukundi akananyu na? Untu aki la ana apami ahendi. Ndi akayi le la ntundu, akati ati: Onʼarai, utshu utukambi elo lʼekambo kʼelua.

²⁹ Ndi akâkaluya diui ati: Dimi halangi. Ku lʼokongo diku, ndi akakadimula utema, akatshu.

³⁰ Ndi akayi le la hendi, akawutela pupu. Ndi akâkaluya diui ati: Dimi layutsho, uwandji; ku ndi kuntsho.

³¹ Vo ahendi, akona akatshi lulangu la shi? Vo wakati vati: One la ntundu. Jesu akawatela ati: Mete kanyutelami ndi: Elungudi wʼelambu la amantu wa luseka wayunyumela mboto lu diulelu dia Unyashungu.

³² Joani akayi le nyu lu mbuka ka akambu wʼololo, ku nyu kumbêtawo. Keli elungudi wʼelambu la amantu wa luseka wakawetawo. Lamʼakanyenyi dikambu so, nyu kunkadimula etema lʼokongo diku, dia nyu mbêtawo.

Ekambi wʼEkambo wa Kolo

³³ Nyulungi wela ukina. Kanga luudu omotshi akiko, lakakambi ekambo kʼelua. Ndi akahiki lukumbu lʼetamba wa lumu lʼutshimba ato; akatshimi difuku dia mamulaka elua loko; akahiki luudu lʼetangelu. Ndi akakitshikela ekambi wʼekambo, akatshu lu kete kina.

³⁴ Lamʼakasukana eleku ka dielelo diʼelua, ndi akatumi ekambi andi le ekambi wʼekambo dia ntosa elua andi.

³⁵ Ku ekambi wʼekambo wakose ekambi andi: wakakomola omotshi, wakadiaki ukina, wakuki ukina ave.

³⁶ Ndi akatumi ekambi andi ekina wuleki wa ntundu efula, ku vo wakatshela pupu.

³⁷ Keli lʼokongo diku, ndi akatumela onʼandi; akati ati: Wayolemia onʼami.

³⁸ Keli lamʼakenyi ekambi wʼekambo ona, vo wakatanela vati: Ukito uku. Nyeso tudiaki, katose sangu diandi.

³⁹ Ku vo wakawundi, wakusukula uma lʼekambo, wakudiaki.

⁴⁰ Okone lamʼayuya kanga ekambo kʼelua, ukundi ayundutshela ekambi wʼekambo eso?

⁴¹ Vo wakawutela vati: Ndi ayudiaka antu wa kolo aso tshe, ayutshikela ekambi ekina ekambo, wane wayuwushaka elua lu deku diawo.

⁴² Jesu akawambula ati: Nyu kumbala lu afundelu ati: Dive diakatuni ambiki a luudu, Mbakayala ote wa tshuku. Dikambu so diakayala uma le Khumadiondjo, Ndu dio dieko dikambu dia mamba lu ashu asu?

⁴³ Okone dimi lambunyutela ndi: Wayunyokosola diulelu dia Unyashungu, ku wayudisha wudja watotokaka elua adio.

⁴⁴ One layoko lu dive ne, ayuhimbohimbo tenyi. Keli lamʼayudiokwela untu omotshi, diayuhandijula uku ditshu.

⁴⁵ Lamʼakuki elombedi a waki la Afarise wela andi, vo wakeyi vati: Shu mbatandi.

⁴⁶ Lamʼakawayangi mbundia, vo wakuki elui wʼantu woma, ne dia vo wakolemia uku umvutshi.