Mateu 20 - La Bible en Otetela (Bible K'Ekila) 1991

Asi Ulimu lu Ekambo kʼElua

¹ Diulelu dia lʼulungu dieli uku kanga luudu, lakatshu kʼolomo la pindju dia ntuyanga asi ulimu, dia vo ndijukambela lu ekambo kandi kʼelua.

² Ndi akukana la wo dia mbafuta denariyo otoi lu lushi otoi, akatumi lʼekambo kandi kʼelua.

³ Ndi akatshu ntu uku lʼeshidi divwa, akenyi akina wemadi wemalemala lu kituka.

⁴ Ndi akawatela ati: Ndu nyu, nyutshu lʼekambo kʼelua, layunyusha kene tshe keli ololo. Ku vo wakatshu.

⁵ Ndi akatshu ntu uku lʼeshidi dikumi lʼehendi, ndu lʼeshidi esatu, akatshi pupu.

⁶ Lamʼakakuki unya lʼeshidi etanu, ndi akatshu, akatani akina wemadi. Ndi akawambula ati: Ukundi wemalanyu lane unya tshe wemalemala?

⁷ Vo wakawutela vati: Ne dia nduku untu lutosengodi ulimu. Ndi akawatela ati: Ndu nyu, nyutshu lʼekambo kʼelua.

⁸ La dikolo, kanga ekambo kʼelua akatela ulami andi a diango ati: Eta asi ulimu, uwasha difutu, utateli le wane wakayi lʼokongo edja ndu wa ntundu.

⁹ Lamʼakayi wane wakayutatela nkamba lʼeshidi etanu, vo wakalungula tshe denariyo otoi otoi.

¹⁰ Lamʼakayi wa ntundu, vo wakakani vati: Shu tayulungula yediko yuleki. Keli ndu vo tshe, wakalungula denariyo otoi otoi.

¹¹ Lamʼakawalungula difutu diawo, vo wakangunangunela kanga luudu.

¹² Vo wakati vati: Wane wa lʼokongo, wakakambi ushidi otoi utu, keli we ambuwaedimia la su, shu ane wakakambi unya tshe lu yanyi ya wulu!

¹³ Keli ndi akâkaluya otoi awo diui ati: Ongenyi, dimi hankutshedi kolo. We hukanyi la mi dia denariyo otoi?

¹⁴ Osa kene keli kaye, utshu; dimi nangaka mbisha wane wa lʼokongo uku wukuwashami.

¹⁵ Undi, olembe mbeko dia dimi ntsha uku alangami la diango diami? Kuku kana we ambumbuka kandjema ne dia lukahu lami?

¹⁶ Okone wa lʼokongo, wayuyala wa la ntundu; ku wa la ntundu, wayuyala wa lʼokongo.

Jesu Ambuta Dia Nyoi Kandi la Eutwelu Kandi Etena ka Satu

¹⁷ Lamʼakatatshokaka Jesu utsha la Jerusalema, ndi akose ambeki andi dikumi la ahendi vame, akawatela lu mbuka ati:

¹⁸ Nyendi, shu ane wutatshu utsha la Jerusalema, Onʼa untu ayutukimwama le elombedi a waki la afundji. Vo wayutuwamia dia ndi mvo.

¹⁹ Vo wayukimo le asi wedja dia vo mbosoka, la mbokomola, ndu dia mbudiaka lʼutamba a mpeketanya. Ku lushi la satu, ndi ayulwama.

Nyangu Ana wa Zebede Ambolonibela Anʼandi Ahuli a Waki

²⁰ Nyangu ana wa Zebede akayi la anʼandi wʼapami le Jesu. Ndi akukhusamela, akolombe dikambu dimotshi.

²¹ Jesu akawumbula ati: Alangaye na? Umuntu akawutela ati: Uti diui dia anʼami ahendi ane mbidjase: omotshi lu lunya laye la pami, la ukina lu lunya laye la lomoso, lu diulelu diaye.

²² Jesu akâkaluya diui ati: Nyu hanyeyi kene kalombanyu. Nyu mbeyaka no dikoho diayangami no? Vo wakawutela vati: Shu mbeyaka.

²³ Ndi akawatela ati: Mete nyu nyayono dikoho diami. Keli mbidjase lu lunya lami la pami kana lu lunya lami la lomoso, kema dikambu diami dia mbisha untu. Keli dio dieko dikambu dia wane wakalongoswela Papa.

²⁴ Lamʼakuki ambeki dikumi dikambu so, vo wakuki anyawo ahendi yenyi.

²⁵ Keli Jesu akawaeti, akati ati: Embuledi wʼasi wedja watuwahamelaka. Antu awo a waki watuwaulelaka.

²⁶ Keli lʼatei anyu tayalaki osoku. One lalanga ndjala wuki lʼatei anyu, dieli la ndi dia ndjala ukambi anyu.

²⁷ One lalanga ndjala la ntundu kanyu, dieli la ndi dia ndjala fumbi kanyu.

²⁸ Ndu Onʼa untu, kundja dia antu mbukambela ulimu, keli akayi dia mbakambela ulimu, la dia mbakimwela lumu landi uku etshungwelu ka antu efula.

Akanga a Tutshungu Ahendi la Jeriko

²⁹ Lamʼakawayatumbaka uma la Jeriko, ului a wuki wʼantu wakayeli Jesu.

³⁰ Nyulungi, akanga a tutshungu ahendi wakadjashi lʼumamu a mbuka. Ku lamʼakawuki vati: Jesu kateti, vo waka-hangohango vati: We Kanula ya Davidi, utuki ketshi!

³¹ Keli ului wʼantu wakahangwela vati: Nyuyali ki. Keli vo wakaleki mpangohango vati: We Kanula ya Davidi, utuki ketshi!

³² Ku Jesu akemala, akawaeti. Ndi akawambula ati: Alanganyu dimi nyutshela na?

³³ Vo wakawutela vati: Khumadiondjo, ashu asu wasene.

³⁴ Jesu akangasana la ketshi, akanandia ashu awo. Kemʼedja vo wakasene, wakuyeli.