Mateu 2 - La Bible en Otetela (Bible K'Ekila) 1991

Akanga a Yimba Wambuya Dia Ndjendia Jesu

¹ Lamʼakuto Jesu la Betelehema ka la Judiya lu nshi ya khumʼekanga Herode, endia, akanga a yimba wakayi uma lu leke lʼEhutwelu ka unya uya la Jerusalema. Vo wakambula vati:

² Khumʼekanga kʼasi Juda lutwi, lendiʼendi na? Ne dia shu takenyi yoto yandi lu leke lʼEhutwelu, mbambutuya dia ndijotemola.

³ Lamʼakuki khumʼekanga Herode dikambu so, ndi akakasana, ndu asi Jerusalema tshe kame la ndi.

⁴ Ndi akasanganya elombedi a waki tshe la afundji wa wudja, akawambula lene ukuki Kristu mbuto.

⁵ Ku vo wakawutela vati: La Betelehema ka la Judiya. Ne dia umvutshi akafundi ati:

⁶ We Betelehema, lu kete ya Juda, We haleki tshitshe lʼatei wʼembuledi wa Juda, Ne dia umbuledi ayutumba uma le ye. Ndi kayulela wudja ami Isamyele.

⁷ Herode aketi akanga a yimba lu usheshe, ku vo wakulimbitshiya eteni kakene yoto shikaa.

⁸ Ndi akatumi la Betelehema, akawatela ati: Nyutshu, nyutushihudia dikambu dia ona shikaa. Lamʼayunyutuwena, kanyuyumvuteli, ndu dimi nkandijutshu la ntotemola.

⁹ Lamʼakawuki diui dia khumʼekanga, vo wakakime mbuka. Ku yoto yakawenyi lu leke lʼEhutwelu ka unya, yakatshu la ntundu kawo, edja ndu yakatemala ladiku dia lene aki ona.

¹⁰ Lamʼakawenyi yoto, vo wakatamanya ngenangena.

¹¹ Vo wakoto lu luudu, wakemyi ona ashashi la Mamya, nyangu. Ku vo wakakhusama, wakotemola. Vo wakafula diango diawo, wakawusha eshasha: paunyi, malashi, la mura.

¹² Lamʼakawaewula Unyashungu lu do dia aha vo nkilula utsha le Herode, vo wakatshu utsha lu kete yawo lu mbuka kekina.

Wambulawo la Jesu Utsha lʼEdjibitu

¹³ Lamʼakawatshu, nyulungi, ondjelo a Khumadiondjo akene le Josefu lu do. Ndi akawutela ati: Unela, osa ona la nyangu, ulawo utsha lʼEdjibitu. Utudjase leko edja ndu lamʼayumukutela, ne dia Herode ayuyanga ona dia mbudiaka.

¹⁴ Ndi akunela, akose ona la nyangu lʼutshu, akatshu lʼEdjibitu.

¹⁵ Ndi akatutshikala leko edja ndu lamʼakavu Herode. Dikambu so diakayala ne dia nshidiya diui diakati Khumadiondjo lu unyo wʼumvutshi ati: Dimi laketi onʼami uma lʼEdjibitu.

Wambudiaka Ana Waha la Dikambu

¹⁶ Lamʼakenyi Herode ati: Akanga a yimba wambonsoka, ndi akatamanya mbuka kele. Ndi akatumi diui, ku wakadiaki ana apami tshe waki la deku pendi pulu lʼesi wi la Betelehema ndu wa lʼutshimba tshe, uku etena kakûlimbitshiya akanga a yimba.

¹⁷ Ku diui diakashidiyama diakati umvutshi Jeremiya ati:

¹⁸ Diui diakukema lu Rama, Delu la utandia a wuki, Ratshele alela anʼandi. Ndi akaseke dia antu mbusamba, Ne dia anʼandi tawakiko.

Wambukalula La Nazareta

¹⁹ Keli kamʼakavu Herode, nyulungi, ondjelo a Khumadiondjo akene le Josefu lu do lʼEdjibitu. Ndi akati ati:

²⁰ Unela, osa ona la nyangu, utshu lu kete ya Isamyele, ne dia waku wakayangi ndjaka ona wambuvo.

²¹ Ndi akunela, akose ona la nyangu, akayi lu kete ya Isamyele.

²² Keli lamʼakuki Jesefu ati: Arakelao ambulela Judiya lu dihuli dia Herode, shi, ndi akuki woma dia ntsho leko Lamʼakawewula Unyashungu lu do ndi akatshu lu beke dia la Ngalili.

²³ Ndi akayi, akayudjase lu ngelu ketawo vati: Nazareta. Dikambu so diakayala dia nshidiya diui diakati amvutshi vati: Wayuweta vati: Usi Nazareta.