Mateu 18 - La Bible en Otetela (Bible K'Ekila) 1991

Dia Luleki Wuki

¹ Lu etena keso, ambeki wakayi le Jesu, wakayuwumbula vati: Akona uleki wuki lu diulelu dia lʼulungu?

² Ku ndi aketi kiendiakendia motshi, akaweme lʼatei awo.

³ Ndi akati ati: Mete kanyutelami ndi: Nyu hanyeyi mboto lu diulelu dia lʼulungu, tshikima nyu nyambukadimula etema, ndu njambuyala uku tokendiakendia.

⁴ Okone untu tshe layakitshakitsha uku kiendiakendia nye, ndi kuleki wuki lu diulelu dia lʼulungu.

⁵ Untu tshe lalungula kiendiakendia uku nye lu lukumbu lami, ndi ambumbetawo.

⁶ Keli one latakanya kiendiakendia motshi yambumbetawo, ndeka ololo mbukeleka dive diʼohelo lu kingu, ku mbutambia lu dingundia dia lʼuduwa.

Akambu wa Ntakanya

⁷ Fono le wa la kete ne dia akambu wa ntakanya! Dieli la akambu wa ntakanya ndja, keli fono le untu latunga akambu ako.

⁸ Naka lunya laye kana lukulu laye lambukutakanya, uluhimbuli, ulukadja. Mboto lu lumu lʼekomo kana etshumbi, ndeka mbikadjema lʼanya ahendi ndu la ekulu ehendi lu dja pundju ololo.

⁹ Naka su diaye diambukutakanya, udikhunduli, udikadja. Mboto lu lumu la su dimotshi, ndeka mbikadjema la ashu ahendi lu luwinga la dja ololo.

Okoko Wakashisho

¹⁰ Nyewo, tanyonyolaki nduku kiendiakendia lʼatei awo. Dimi lambunyutela ndi: Lʼulungu, andjelo awo watendiaka elundiji ka Papa leli lʼulungu nshi tshe.

¹¹ Ne dia Onʼa untu akayi dia ndijushimbela wane wakashisho.

¹² Ukundi akananyu na? Naka untu la ekoko lukama, ku ndi ambushisha omotshi, ndi hatshiki akumi divwa la divwa lu akuna, dia ntuyanga one wushishwi?

¹³ Lamʼayunduwena, mete kanyutelami ndi: Ongenongeno andi le one wushishwi, ayuleka ongenongeno andi le akumi divwa la divwa wahashishwi.

¹⁴ Okone Shenyu leli lʼulungu halangi nduku kiendiakendia mvo.

Jesu Ambutela Ambeki Andi Lama Ntsha Naka Akina Wambatshela Kolo

¹⁵ Naka unyaye ayukutshela kolo, kutshu, kutuwenya munga kandi, we la ndi atu. Naka ndi ayukukela, we ayekesanela la ndi.

¹⁶ Keli naka ndi hakukela, kutshu la untu otoi kana ahendi. Okone aui tshe wayushikikala lʼenyo wʼemenyi ehendi kana esatu.

¹⁷ Naka ndi hawaukela, ututeli ekelizia. Naka ndi hukela ndu ekelizia, ndi ayali uku usi wudja le ye, la uku ulungudi wʼelambu.

¹⁸ Mete kanyutelami ndi: Diakelekanyu la kete, wayudikeleka ndu lʼulungu. Diakelekulanyu la kete, wayudikelekula ndu lʼulungu.

¹⁹ Dimi lambunyutela ntu ndi: Naka ahendi anyu wayusanga lulimi la kete dia nomba dikambu dimotshi, Papa leli lʼulungu ayatshela uku alombawo,

²⁰ ne dia lene asangana ahendi kana asatu lu lukumbu lami, dimi ndjalaka lʼatei awo.

Ukambi Waha la Ketshi

²¹ Petero akayi, akawumbula ati: Khumadiondjo, unyami ayuntshela kolo tena dingana dia dimi mbudimanyia? Undi, edja ndu tena esambeli?

²² Jesu akawutela ati: Dimi hankutedi ndi: Edja ndu tena esambeli, keli ndi: Edja ndu akumi esambeli tena esambeli.

²³ Okone diulelu dia lʼulungu diambufana la khumʼekanga kemotshi, kakalangi mbala la ekambi andi diango diandi, diaki le wo.

²⁴ Lamʼakandiatatela mbala diango, wakayi la omotshi laki la dibasa diandi dia talata nunu dikumi.

²⁵ Keli ne dia ndi taki la diango dia ngela dibasa, khumendi atati ati: Wusundja, ndi la wadendi, la anʼandi ndu diango diandi tshe, dia ngela dibasa.

²⁶ Ku ukambi ako akukhusamela, akosengasenga ati: Khumadiondjo, utukumbete, ku layukongela diango tshe.

²⁷ Khumendi akawuki ketshi, akukimo, akudimanyia dibasa.

²⁸ Keli ukambi ako akatumbi, akatani unyandi ukambi laki la dibasa dia denariyo lukama. Ndi akawundi, akuhini khumbe, akati ati: Ongele dibasa diami.

²⁹ Okone unyandi ukambi akayakosha, akosengasenga ati: Utukumbete, ku layukongela dibasa.

³⁰ Ndi kunanga; akatuwudja lu lukanu edja ndu ndi ambongela dibasa.

³¹ Keli lamʼakenyi anyandi ekambi akambu wakatshama, vo wakanyangi efula. Vo wakatshu, wakatutela khumewo akambu tshe wakatshama.

³² Ku khumendi akaweti, akawutela ati: We ukambi wa kolo! dimi lakakudimanyia dibasa diku tshe, ne dia we akansengasenga.

³³ Taki ololo ndu we mbuka unyaye ketshi, uku aka-makuki?

³⁴ Khumendi akumala, akukimo le asuyanyi, edja ndu ndi ambongela dibasa tshe.

³⁵ Osoku mbanyutshela ndu Papa leli lʼulungu, naka nyu hanyudimanyiya anyanyu kolo uma lʼetema anyu.