Mateu 16 - La Bible en Otetela (Bible K'Ekila) 1991

Wambolomba Jesu Djimbitelu yʼUma lʼUlungu

¹ Afarise la Asaduke wakayi le Jesu o dia ndijûhimba, wakôlombe dia ndi mbaenya djimbitelu yʼuma lʼulungu.

² Keli ndi akâkaluya diui ati: La dikolo, nyu nyatutaka nyati: Ayuvala yanyi, ne dia ulungu weko tilili.

³ La pindju, nyu nyatutaka nyati: Ayuyala tshitshi, ne dia ulungu weko tilili udu lutshukutshuku. Nyu mbeyaka nshihudia akambu wa lʼulungu, keli hanyeyi nshihudia tulimbitelu ta tena.

⁴ Wa lolonga lone la kolo ndu la luseka watuyangaka djimbitelu, keli hawuwasha nduku djimbitelu kina, paka djimbitelu ya Jona. Ku ndi akatshiki, akatshu.

Edya kʼAfarise la Asaduke

⁵ Lamʼakakumi ambeki la wedi ukuna, vo kundjala la ma: wakuhela dia ntola.

⁶ Jesu akawatela ati: Nyendi ololo! Nyewo edya kʼAfarise la Asaduke.

⁷ Vo wakambwana vati: Shu hatuyi la ma.

⁸ Keli Jesu akeyi tukanyi tawo; akati ati: Nyu akanga a mbetawo ka tshitshe, ukundi ambwananyu nyati: Shu kema la ma?

⁹ Nyu hanyuyeya? Hanyuyuho dikenga tanu le antu nunu tanu, la efula kʼasaka kakanyatongona?

¹⁰ Nyu hanyuyuho dikenga esambeli le antu nunu nei, la efula kʼasaka kakanyatongona?

¹¹ Ukundi ahanyeyi nyati: Dimi hanyutedi dikambu dia ma? Keli ndi: Nyewo edya kʼAfarise la Asaduke.

¹² Ku vo wakayeya vati: Ndi hatutedi dia mbewo edya ka lu ma, keli dia shu mbewo wetshelu wa Afarise la Asaduke.

Petero Ambetawo Ati: Jesu Ona Unyashungu

¹³ Lamʼakayi Jesu lu leke la Kayisamya Filipi, ndi akambula ambeki andi ati: Ukundi wata antu dia Onʼa untu endi na?

¹⁴ Vo wakati vati: Amotshi mvutaka vati: Joani Ubatizanyi; akina vati: Elidja; akina vati: Jeremiya, kana otoi omotshi wʼamvutshi.

¹⁵ Ndi akawambula ati: Ya ukundi atanyu, emi?

¹⁶ Simona Petero akâkaluya diui ati: Kristu keye Onʼa Unyashungu a lumu.

¹⁷ Jesu akûkaluya diui ati: Simona Bara-Jona, we eko la otshoko! ne dia antu kunkenya dikambu ne, paka Papa leli lʼulungu.

¹⁸ Ntu, dimi lambukutela ndi: Petero keye; lu dive ne kayumuhika ekelizia ami. Ku wulu wa nyoi hawukileka wulu.

¹⁹ Dimi layukusha sapi ya diulelu dia lʼulungu. Kene tshe kakelekaye la kete, wayukikeleka lʼulungu. Kene tshe kakelekulaye la kete, wayukikelekula lʼulungu.

²⁰ Ku ndi akakokomia ambeki ati: Tanyutelaki untu nyati: Kristu kendi.

Jesu Ambuta Dia Nyoi Kandi, Eulwelu Kandi, la Eyelu Kandi

²¹ Uma lʼetena keso, kakatatela Jesu menya ambeki andi ati: Dieli la mi dia ntsho la Jerusalema dia nsuyama asui efula le dikumanyi, elombedi a waki la afundji, dia ndjakema, la dia mbulwama lushi la satu.

²² Ku Petero akatshu la ndi, akatatela mbulaka, ata ati: Unyashungu ashimbi dikambu so, we Khumadiondjo! Dikambu diako tadiuyalaki pundju le ye!

²³ Keli ndi akasikiso, akatela Petero ati: Satana, utshimbi lʼokongo ami! Utamba a ntakanyami mbeye, ne dia we kema lu leke la Unyashungu paka lu leke lʼantu.

²⁴ Ku Jesu akatela ambeki andi ati: Naka antu alanga ndijelami, ndi embe utamba andi a mpeketanya, andijeli.

²⁵ Ne dia untu tshe lalanga mamela lumu landi, ayulushisha. Keli untu tshe lashisha lumu landi dikambu diami, ayulutana.

²⁶ Naka untu ayukundja andja tshe, la nshisha lumu landi, waho andi lendiʼewo? Engo kakona kayengonya untu la lumu landi?

²⁷ Ne dia Onʼa untu ayuya lu lutumbu la Shi, nui la andjelo andi, ku ndi ayufuta untu lʼuntu uku akandiatshi.

²⁸ Mete kanyutelami ndi: Amotshi wemadi lane, hawunganela nyoi ntundu watenyi Onʼa untu ayayi lu diulelu diandi.