Mateu 15 - La Bible en Otetela (Bible K'Ekila) 1991

Akambu Walanya Antu Mete

¹ Afarise la afundji wakayi le Jesu uma la Jerusalema; wakawumbula vati:

² Okoko wana wadiaka ambeki aye ditshelu dia dikumanyi? ne dia vo hawotsha anya lamʼalewo ma.

³ Ku ndi akâkaluya diui ati: Ya ukundi adiakanyu elembe wa Unyashungu ndu nyu ne dia ditshelu dianyu?

⁴ Ne dia Unyashungu akati ati: Olemia sho la nyo, ndu ati: One lateketa diui dia kolo lu dikambu dia shi, kana dia nyangu, ndi avu!

⁵ Keli nyu nyatutaka nyati: Untu layutela shi kana nyangu ati: Engo kutumukukimanyia, laml ukikimo le Unyashungu,

⁶ ndi halemia shi kana nyangu. Okone nyu nyatulanyaka diui dia Unyashungu ne dia ditshelu dianyu.

⁷ Nyu akanga a lukesu! mete kakati Isaya dikambu dianyu ati:

⁸ Antu ane watonemiaka lʼelomo. Keli etema awo weko etali uma le mi.

⁹ Vo watontemolaka otemolatemola, Watetshaka dietshelu dieli uku elembe wʼantu.

¹⁰ Ku ndi aketi antu; akawatela ati: Nyuki, nyumani fundu.

¹¹ Kene koto lʼunyo, halanya untu. Keli kene katumba uma lʼunyo, keso katulanyaka untu.

¹² Ku ambeki wakayi le ndi. Vo wakawumbula vati: We mbeyaka wati: Afarise wakatakanyi lamʼukiwo diui so?

¹³ Keli ndi akâkaluya diui ati: Wayuhikula etumbatumba tshe kaki Papa leli lʼulungu kumune.

¹⁴ Nyuwaete; elombodi wa tutshungu mbewo. Naka kanga tshungu ayolombola kanga tshungu, vo ahendi wayoko lu difuku.

¹⁵ Keli Petero akûkaluya diui ati: Utulimbitshiya wela oso.

¹⁶ Ndi akambula ati: Ndu nyu mbahatamani fundu?

¹⁷ Nyu hanyeyi nyati: Kene tshe koto lʼunyo, katetaka lu dikundju, katutumbaka utsha lu kumba?

¹⁸ Keli kene katutumbaka uma lʼunyo, katuyakaka uma lʼutema. To katulanyaka untu.

¹⁹ Ne dia uma lʼutema katutumbaka tukanyi ta kolo, diakanelu, luseka, munanyi, uvi, omenyi wa kashi, la dimamanyelu.

²⁰ Akambu aso mbatulanyaka untu. Keli nde ma lʼanya mindu, halanya untu.

Umuntu Usi Kanana

²¹ Jesu akamo uma leko, akatshu lu leke la Tura la Sidona.

²² Ku umuntu usi Kanana akatumbi uma lu leke loso, akahangohango ati: We Khumadiondjo, kanula ya Davidi, umbuki ketshi! Onʼami a umuntu ambusuyama wulu lʼodienge.

²³ Keli ndi kumbukaluya diui. Ambeki andi wakayi, wakosenpasenga vati: Ukaluya, ne dia ndi eko lu ndjahangohango lʼokongo asu.

²⁴ Keli ndi akâkaluya diui ati: Dimi lakatumama paka le ekoko wakashisho lu khumbu ka Isamyele.

²⁵ Keli umuntu akayi, akakhusama la ntundu kandi, akati ati: Khumadiondjo, unkimanyia.

²⁶ Jesu akâkaluya diui ati: Hasungana dia mbosa ma dia ana, ku mbukela fo.

²⁷ Ndi akati ati: Elu, Khumadiondjo, ndu fo mbatolekaka fusa yatokokaka uma lu mesa a khumewo.

²⁸ Ku Jesu akûkaluya diui ati: Umuntu, mbetawo kaye keko wuki! Diatshami le ye uku alangaye. Onʼandi a umuntu akakono lu unya ako.

Jesu Ambukalula la Ngalili

²⁹ Jesu akamo uma leko, akayi lasuki la Uduwa a Ngalili. Ndi akambela lu akuna, akatudjase leko.

³⁰ Elui a waki wʼantu wakayi le ndi, wakayi ndu la akanga a dikomo, tshumbi, tutshungu, nyumi, la ekonyi ekina efula. Vo wakakitsha la ntundu kandi, ku ndi akakonoya.

³¹ Okone lamʼakenyi elui wʼantu akanga a nyumi wamboteketa, akanga a dikomo wambokono, tshumbi wambokendiakendia, tutshungu wambosena, vo wakambi. Ku vo wakatumbula Unyashungu wa Isamyele.

Jesu Ambusha Antu Nunu Nei Mbu ya Nde

³² Jesu aketi ambeki andi, akawatela ati: Dimi lambuka ului wʼantu ketshi, ne dia vo wambutshikala la mi nshi shatu. Vo kema la mbu ya nde. Dimi halangi mbadianganya la ndjala, vo watukokomo lu mbuka.

³³ Ambeki wakawumbula vati: Lendi ukukisu nkundja dikenga dia ma lu dihuli ne dia shenga, dia ndutsha ului a wuki wʼantu one?

³⁴ Jesu akawambula ati: Dikenga dingana dieli la nyu? Vo wakâkaluya diui vati: Esambeli la tusisi.

³⁵ Ndi akadjasha ului wʼantu la kete.

³⁶ Ndi akose dikenga diako esambeli la tusisi, akuki lusaka, akadiatula. Ndi akasha ambeki, ku ambeki wakasha elui wʼantu.

³⁷ Vo tshe wakali, wakaluti. Ku wakatongona betshi diakatshikala asaka esambeli too.

³⁸ Wane wakali, waki apami nunu nei, ndu amantu la ana.

³⁹ Ku ndi akadianganya elui wʼantu. Ndi akoto lu watu, akakumi lu beke dia Mangadana.