Mateu 14 - La Bible en Otetela (Bible K'Ekila) 1991

Wambuhimbula Joani Ubatizanyi Ote

¹ Lu nshi sho, khumʼekanga Herode akuki lukumu la Jesu.

² Ndi akatela ekambi andi ati: Joani Ubatizanyi oso. Ndi kambulo uma lu nyoi. Uma lu dikambu so mbendi la wulu wa ntsha akambu wa mamba.

³ Laso ku Herode akandi Joani, akukeleka ekodi, akawudji lu lukanu ne dia Herodiyasi, wadi aki Filipo, onangu.

⁴ Ne dia Joani akawutela ati: Eko ekila dia we mbidjase la ndi.

⁵ Lamʼakandialangi mbudiaka, ndi akuki ului wʼantu woma, ne dia vo wakolemia uku umvutshi.

⁶ Keli lamʼakakuki lushi lakuto Herode, ona umuntu a Herodiyasi akanwela wenye, akangenyangenya Herode.

⁷ Ndi akutshibela ati: Layukusha engo tshe kayuyolomba.

⁸ Ku usekaseka a umuntu akasengwama uma le nyangu, akati ati: Umbisha ote wa Joani Ubatizanyi lu donga.

⁹ Khumʼekanga akanyangi. Keli ne dia tshibelu diandi, ndu dia wane wakadjashi kame la ndi lu dambu, ndi akati ati: Nyuwushawo.

¹⁰ Ndi akatumi diui, ku wakatuhimbula Joani ote lu lukanu.

¹¹ Wakela ote andi lu donga, wakayuwusha usekaseka a umuntu, ku ndi akatolela nyangu.

¹² Ku ambeki andi wakayi, wakose udu andi, wakatukhunde. Ku vo wakatutela Jesu.

Jesu Ambusha Antu Nunu Tanu Mbu ya Nde

¹³ Lamʼakuki Jesu dikambu so, ndi akamo uma leko lu watu, akatshu ndiame lu dihuli dia dieta. Keli lamʼakuki elui wʼantu dikambu diako, vo wakamo uma lu esumba, wakuyeli lʼekulu.

¹⁴ Lamʼakandiatumbi uma lu watu, ndi akenyi ului a wuki wʼantu. Ndi akawauki ketshi, akakonoya wane waki la hemo lʼatei awo.

¹⁵ La dikolo, ambeki wakayi le ndi. Vo wakawutela vati: Dihuli ne dieko dieta, ndu unya ambeta. Udianganya elui wʼantu watshu lu wangelu watuyasumbeli mbu ya nde.

¹⁶ Keli Jesu akawatela ati: Vo hawuhumbi ntsho; nyuwasha mbu ya nde.

¹⁷ Vo wakawutela vati: Shu teko paka la dikenga tanu dia ma la nsi hyendi lane.

¹⁸ Ndi akati ati: Nyumbeladio.

¹⁹ Ndi akatela elui wʼantu dia vo mbidjase lʼadiyu. Ku ndi akose dikenga dia ma tanu la nsi hyendi, akalela lʼulungu, akaditshokola. Ndi akatula dikenga dia ma, akasha ambeki andi, ku ambeki wakasha elui wʼantu.

²⁰ Vo tshe wakali, wakaluti. Vo wakatongona betshi diakatshikala asaka dikumi la ahendi too.

²¹ Wane wakali, waki uku apami nunu tanu, ndu amantu la ana.

Jesu Ambokendiakendia Ladiku DiʼAshi

²² Kemʼedja Jesu akotshiya ambeki andi lu watu dia vo ntsho la ntundu kandi utsha la wedi ukina edja ndu lamʼakandiashidiya nyanganya elui wʼantu.

²³ Lamʼakandiashidiya nyanganya elui wʼantu, ndi akambela lu akuna ndiame dia ntolomba. La dikolo, ndi aki leko ndiame.

²⁴ Keli lu etena keso, watu waki tshalula efula uma lʼokenge wakasutshasutshama la asukhu, ne dia lopepe lakûkaluyaka.

²⁵ La koko ka ntundu, ndi akayi uya le wo, ayakendiakendia ladiku dia uduwa.

²⁶ Lamʼakawenyi ambeki ayakendiakendia ladiku diʼuduwa, vo wakakasana, wakati vati: Edimu keku! Ku vo wakaleli la woma.

²⁷ Keli kemʼedja, Jesu akawatela ati: Nyongenengene; dimʼone; tanyukaki woma.

²⁸ Petero akûkaluya diui ati: Khumadiondjo, naka we, umvuteli keli ndiji le ye ladiku dia ashi.

²⁹ Ndi akati ati: Yaka. Okone Petero akatumbi uma lu watu, akakendiakendia ladiku dia ashi utsha le Jesu.

³⁰ Keli lamʼakandenyi lopepe, ndi akuki woma. Lamʼakandiatatela ndijita, ndi akaleli, akati ati: Khumadiondjo, unshimbeli!

³¹ Kemʼedja. Jesu akasimbula lunya, akukimela. Ndi akawumbula ati: We kanga mbetawo ka tshitshe, okoko wana wakananaye?

³² Lamʼakawambela lu watu, lopepe lakakimo mpepa.

³³ Wane waki lu watu wakotemola, wakati vati: Mete, Onʼa Unyashungu keye.

Jesu la Ngenesareta

³⁴ Lamʼakawateho, vo wakayi lu kete ya Ngenesareta.

³⁵ Lamʼakaweyi antu wa lu dihuli so, vo wakatumi diui lu leke lako tshe, ku wakayi la akanga wa hemo tshe le ndi.

³⁶ Vo wakosengasenga dia vo munandia paka uhimbu a dihondio diandi utu. Ku wane wakanandia, wakakono.