Mateu 13 - La Bible en Otetela (Bible K'Ekila) 1991

Jesu Ambetsha Antu la Wela: “Umbuki a Wuhu”

¹ Lushi lako, Jesu akatumbi uma luluudu, akatudjase lʼokenge wʼuduwa.

² Elui a waki wʼantu wakudingi, ku ndi akoto lu watu, akadjase. Ului tshe wʼantu wakemala lʼokenge wʼashi.

³ Ndi akawatela akambu efula la wela. Ndi akati ati: Umbuki a wuhu akatshu dia ntuka wuhu.

⁴ Lamʼakandiatukaka wuhu, wehu emotshi wakako lʼumamu a mbuka. Fudu yakayi, yakekomola.

⁵ Wehu ekina wakako lu kete yʼave, lenʼaki kundjala kete kambi. Kemʼedja vo wakatumbi, ne dia kete yaki kunune.

⁶ Keli lamʼakandi unya, vo wakalengela, ku wakumi, ne dia tawaki la ediu.

⁷ Wehu ekina wakako lu atende; atende wakuli, waketshidia.

⁸ Wehu ekina wakako lu kete yʼololo, wakadji tongo: emotshi lukama lukama, ekina akumi asamalu akumi asamalu, ekina akumi asatu akumi asatu.

⁹ One leli la atui, uki.

Okone Atelandi Antu Akambu lu Wela

¹⁰ Ambeki wakayi, wakambula Jesu vati: Dikambu kuna diatelaye antu akambu la wela?

¹¹ Ndi akâkaluya diui ati: Wakanyusha dia nyu mbeya akambu wushami wa diulelu dia lʼulungu, keli kumbasha.

¹² Ne dia untu tshe leli la diango wayuwusha dikina, ku ndi ayuyala la efula. Keli untu tshe laha la engo, wayokosola ndu kene keli la ndi.

¹³ Diako mbawatelami akambu la wela. Ne dia vo menaka, ku hawenyi; vo mbukaka, ku hawuki ndu hawushihudia.

¹⁴ Diui diakati Isaya diambushidiya mete le wo, ati: Mete, nyu nyayuka, keli hanyushihudia; Mete, nyu nyayendia, keli hanyena.

¹⁵ Ne dia etema wʼantu ane wakayala wetshu, Atui awo weko puki, Ku vo wambudiha ashu awo, Ne dia vo watukena lʼashu, Watukuka lʼatui awo, Watukushihudia lʼetema awo, Watukukadimo ntu, Dia dimi mbakonoya.

Jesu Ambumanya Ambeki Wela wa Umbuki a Wuhu Fundu

¹⁶ Keli ashu anyu weko la otshoko, ne dia vo menaka; ndu atui anyu, ne dia vo mbukaka.

¹⁷ Mete kanyutelami ndi: Amvutshi efula la antu wʼololo wakakumbula mena akambu wenanyu, keli vo kumbaena; wakakumbula mbuka akambu wukanyu, keli vo kumbauka.

¹⁸ Okone, nyulungi kitshimudi ya wela wa umbuki a wuhu.

¹⁹ Lamʼuka untu diui dia diulelu, ku ndi hadishihudia, ku kanga kolo atuyakaka, atunyaka kene kakawune lʼutema andi. Oso eli wuhu wakawuki lʼumamu a mbuka.

²⁰ One lakawuki lu kete yʼave, eli untu latukaka diui, kemʼedja ku ndi ambudietawo lʼongenongeno.

²¹ Keli ndiame kema la udiu, atutshikalaka paka etenyi ka tshitshe. Ku lamʼatuyakaka fono kana asui ne dia diui, kemʼedja ndi atutakanaka.

²² One lakukama lʼatei wʼatende eli untu latukaka diui, ku tukanyi ta akambu wa la kete, la lukesu lʼekundji, atutshidiaka diui. Ku ndi ambuyala aha la tongo.

²³ One lakukama lu kete yʼololo, eli one latukaka diui, latudishihudiaka. Mete ndi atotokaka elua: emotshi lukama lukama, ekina akumi asamalu akumi asamalu, ekina akumi asatu akumi asatu.

Kangaka lʼAtei wʼEpunga

²⁴ Jesu akawaukela wela ukina ati: Diulelu dia lʼulungu diambufana la untu lakune wuhu wʼololo lʼekambo kandi.

²⁵ Keli lamʼaketama antu djo, utunyi andi akayi, akayune ndu wehu wa kangaka lʼatei wʼepunga, ku ndi akatshu.

²⁶ Keli lamʼakatumbi nongo, ndu lamʼakayusanula epunga, ku ndu kangaka yakeneka.

²⁷ Ekambi wa kanga luudu wakayi, wakawumbula vati: Khumadiondjo, we kumune wuhu wʼololo lʼekambo kaye? Ku ukundi ambuyala kangaka loko?

²⁸ Ndi akawatela ati: Utunyi ami kakatshi dikambu diako. Ekambi andi wakawumbula vati: We nangaka shu ntuhikula kangaka?

²⁹ Keli ndi akati ati: Kema; ne dia lamʼayunyutuhikula kangaka, nyutukutuhikula ndu epunga kame la yo.

³⁰ Nyete ehendi kawo wuli kame, edja ndu lu dinela. Ku lu nshi ya dinela, dimi layutela amunyi ndi: Nyusanganya kangaka ntundu, nyuyikeleki lu dikandia ne dia ndijitshumba, keli nyusanganya epunga lu dipenge diami.

Lotongo la Lohodia

³¹ Jesu akawauki wela ukina ati: Diulelu dia lʼulungu dieli uku lotongo la lohodia, lakose untu, lakanduki lʼekambo kandi.

³² Lo mbuleki tongo tshe tshitshe, keli lamʼulalo, lo ndekaka akatshikatshi wuki. Lo ndjalaka utamba, ku fudu ya lʼulungu yatuyakaka, yatahemaka lu tahi yalo.

Edya

³³ Jesu akawauki wela ukina ati: Diulelu dia lʼulungu dieli uku edya, kakose umuntu, kakandiashe lu tediko tusatu ta shima, edja ndu to kakakukanela la shima tshe.

³⁴ Jesu akatela elui wʼantu akambu aso tshe lu wela. Mete ndi kumbatela nduku dikambu, tshikima ndu wela.

³⁵ Dikambu so diakayala, dia nshidiya diui diakati umvutshi ati: Dimi layufula unyo ami la wela; Layuta akambu wakashama umaka etatelu kʼandja.

Jesu Ambukadimwela Ambeki Wela wa Kangaka

³⁶ Jesu akatshiki elui wʼantu, akoto lu luudu. Ambeki andi wakayi le ndi, wakayuwutela vati: Utulimbitshiya wela wa kangaka ya lʼekambo.

³⁷ Ndi akâkaluya diui ati: One lune wuhu wʼololo, eli Onʼa untu.

³⁸ Ekambo eli andja; wuhu wʼololo eli ana wa diulelu. Kangaka yeli ana wa kango kolo.

³⁹ Utunyi lakalune eli uhimbanyi. Dinela dieli ekumelu ka etena kene. Amunyi weli andjelo.

⁴⁰ Uku atusanganyaka antu kangaka, atuwulutshumbaka lu dja, mbayuyala lʼekumelu ka andja ane.

⁴¹ Onʼa untu ayutuma andjelo andi, wayosonola diango tshe diatakanya antu la tshe watutshaka kolo uma lu diulelu diandi,

⁴² ayuwakadja lu khuka ka dja. Delu diayuyala leko ndu ekeketanyelu ka anyu.

⁴³ Ku antu wʼololo wayoheta uku unya lu diulelu dia Shewo. One leli la atui, uki.

Eumbelu Kakashama

⁴⁴ Diulelu dia lʼulungu dieli uku eumbelu kakashama lʼekambo, kakashula untu, kakandiafe ntu. Ne dia ongenongeno andi, mbakandiatusundja kene tshe kaki la ndi, mbakandiasumbi ekambo kako.

Lowoko la Dikeso

⁴⁵ Ntu, diulelu dia lʼulungu dieli uku usi ukandia, latuyangaka mboko yʼololo yʼakeso.

⁴⁶ Lamʼakandiatani lowoko lʼushinga wulu, ndi akatusundja kene tshe kaki la ndi, akalusumbi.

Tei lʼUduwa

⁴⁷ Ntu, diulelu dia lʼulungu dieli uku tei, kakawadji lʼuduwa, kakatshumanya wehu tshe.

⁴⁸ Lamʼakataluli, antu wakakikutula lʼumamu, wakadjase. Vo wakasanganya yaki ololo lu mbulo, keli wakakadja yaki kolo.

⁴⁹ Osoku mbayuyala lʼekumelu kʼandja ane. Andijelo wayuya, wayunya antu wa kolo uma lʼatei wʼantu wʼololo,

⁵⁰ ku wayuwakadja lu khuka ka dja. Delu diayuyala leko ndu ekeketanyelu ka anyu.

⁵¹ Undi, nyambulimbitela akambu aso tshe? Vo wakati vati: Elu.

⁵² Ku ndi akawatela ati: Okone ufundiji tshe lakawetsha dia ndjala umbeki a diulelu dia lʼulungu, eko uku kanga luudu, latutundjaka diango diʼeyuyu la diango diʼedjedja uma lu eumbelu kandi.

Jesu Ambetsha Antu la Nazareta; Wamboseka

⁵³ Lamʼakashili Jesu mbaukela wela eso, ndi akamo uma leko.

⁵⁴ Jesu akayi lu kete yawo, aketsha antu lʼetemwelo kawo. Ku vo wakambi, wakati vati: Lendi oshi untu one yimba nye, ndu akambu wa mamba ane?

⁵⁵ Aha onʼa utshudi wʼabaya kendi? Vo haweti nyangu vati: Mamya? Jakoba, la Josefu, la Simona la Judasi waha anangu?

⁵⁶ Ndu akadiendi tshe, waha lʼatei asu? Ku uma lendi akayala untu one la akambu ane tshe?

⁵⁷ Ku vo wakatakana dia dikambu diandi. Keli Jesu akawatela ati: Umvutshi ndjalaka aha la kenemo tshikima lu leke lawo, la lu khumbu kawo.

⁵⁸ Ndi kuntsha akambu wa mamba leko, ne dia uhedia awo.