Mateu 11 - La Bible en Otetela (Bible K'Ekila) 1991

¹ Lamʼakashili Jesu mbetsha ambeki andi dikumi la ahendi, ndi akamo uma leko dia ntetsha ndu dia ntusambisha lu esumba awo.

Akendiji Uma le Joani Ubatizanyi

² Lamʼaki Joani lu lukanu, ndi akuki akambu wakatshi Kristu. Ku ndi akatumi ambeki andi,

³ dia vo ntuwumbula vati: We keli ndiʼako layayi, kana ntulungameli ukina?

⁴ Ku Jesu akâkaluya diui ati: Nyutshu, nyututeli Joani akambu wukanyu ndu wenanyu:

⁵ akanga a tutshungu wambena, akanga a tshumbi wambokendiakendia, akanga a sudi wambokono, akanga a puki wambuka, edu wambulo, akanga a wula wambusambishama lukumu lʼololo.

⁶ Untu tshe lahatani dikambu dia mbutakanya le mi, eko la otshoko.

Jesu Ambandula Joani

⁷ Lamʼakawatshu, Jesu akatatela mvutela elui wʼantu dikambu dia Joani ati: Kakona kakanyatshu dia ntendia lʼusui wa shenga? Sopo diasutshasutshama la loheledi uka?

⁸ Keli kakanyatshu dia ntendia na? Untu lolotshi ahondo wa yovuyovu? Nyulungi, wane watolotaka ahondo wa yovuyovu, weko lu mvudu ya khumi ya dikanga.

⁹ Keli kakanyatshu na? Dia ntendia umvutshi? Elu; dimi lambunyuteia ndi: One luleki umvutshi.

¹⁰ Ndʼako kakawafundi vati: Endia, lambutuma dikendiji diami la ntundu ka elundiji kaye. Ndi ayukolongoswela mbuka kaye la ntundu kaye.

¹¹ Mete kanyutelami ndi: Lʼatei a wane wakutama uma le amantu, nduku untu luleki Joani Ubatizanyi wuki. Keli paka ote luleki tshitshe lu diulelu dia lʼulungu, kuʼeki wuki.

¹² Uma lu nshi ya Joani Ubatizanyi edja ndu kakiane, diulelu dia lʼulungu diatusuyamaka wulu. Akanga a wulu mbatudihotolaka la khudu.

¹³ Ne dia aui tshe wʼamvutshi la elembe wakatelaka antu akambu wahatayi edja ndu lu nshi ya Joani,

¹⁴ naka nyu nangaka mbetawo diui ne: Elidja oso, ndi kayayi.

¹⁵ One leli la atui wa mbuka, uki.

¹⁶ Keli, la na ayumufanya wa lu lolonga lone? Vo weko uku akendia wudjashi lu tuka, weta anyawo lu tokenyo

¹⁷ vati: Shu takanyudedi pungi, ku nyu hanyonwe wenye. Shu takaledi, ku nyu hanyutshi utandia.

¹⁸ Ne dia Joani akayi, ndi kondekaka, konokaka, ku antu wakaweti vati: Kanga edienge kendi.

¹⁹ Onʼa untu akayi, ndi ndekaka, nokaka, ku vo mvutaka vati: Nyendi kanga dishi la onoshi a wanu! ongenyi wa elungudi wʼelambu la antu wa kolo! Yimba yambuyindjama lʼelimu ayo.

Jesu Ambuhangwela Esumba Emotshi

²⁰ Jesu akatatela mpangwela esumba wakandiatatshaka akambu wa mamba kambi, ne dia vo kunkadimula etema.

²¹ Fono kayayi le ye, we Korazina! Fono kayayi le ye, we Betesayida! Ne dia utunduyala akambu wa mamba wakatshama lʼatei anyu, mbakatshama lu Tura la Sidona, tshiki vo wambukadimulaka etema, wolotshi akunyia ndu wudjashi lʼetuku.

²² Keli dimi lambunyutela ndi: Lu lushi lʼelumbwelu, fono kanyu kayuleka ka Tura la Sidona.

²³ Ndu we Kaperenauma, wayukumbiya pulu ndu lʼulungu uka? Wayukuhuluya lʼUdimu a Pengandu. Utunduyala akambu wa mamba wakatshama lʼatei aye, mbakatshama la Sodoma, tshiki to keko edja ndu elo.

²⁴ Keli dimi lambunyutela ndi: Lu lushi lʼelumbwelu, fono kaye kayuleka ka kete ya Sodoma.

Jesu Ambuka Unyashungu Lusaka; “Nyuyi le Mi”

²⁵ Lʼetena kako, Jesu akati ati: Dimi lambukuka lusaka, we Papa, Uwandiji wʼulungu la kete, ne dia we akashe akambu ane le akanga a yimba la ewu, ku we ambuwashula le ana wʼashashi.

²⁶ Elu, Papa, ne dia wuhu uku mbaki lulangu laye la ngandji ka mamba.

²⁷ Papa ambunkimwela diango tshe. Nduku untu leya Ona, tshikima Shi; ndu nduku untu leya Shi, tshikima Ona. Ku Ona ayuwenya untu tshe lalangandi.

²⁸ Nyuyi le mi, nyu tshe watukambaka ndu weli la wetshu wa wulu, ku dimi layunyusha mumuya.

²⁹ Nyembe lokoho lami, nyeki akambu uma le mi. Ne dia dimi la memakana la ndjakitshakitsha lʼutema, ku nyu nyayutana mumuya lʼetema anyu,

³⁰ ne dia lokoho lami leko ololo, la ushiko ami weko usadi.