Mako 9 - La Bible en Otetela (Bible K'Ekila) 1991

¹ Jesu akawatela ati: Mete kanyutelami nti: Amotshi wemadi lane, hawuvo ntundu vo watenyi diulelu dia Unyashungu diayayi la wulu.

Ehilwelu ka Jesu

² Lamʼaketi nshi shamalu, Jesu akose Petero, Jakoba la Joani, akambela la wo vame lʼukungu wʼutali, lu dieta. Ndi akahilo la ntundu kawo.

³ Ahondo andi wakayala ngaingai, ndu wema pesopeso utamanya. Nduku uminyi wʼahondo wa la kete, leya mbete ahondo wema wuhu oso.

⁴ Elidja la Mose wakene le wo. Vo wakasawula la Jesu.

⁵ Petero akahula diui akatela Jesu ati: Umbetsha, ndeka ololo shu ntshikala lindu. Tuhiki tumbu satu, kemotshi kaye, kemotshi ka Mose, kemotshi ka Elidja.

⁶ Ndi kumbeya mvuta nduku diui dikina, ne dia vo wakaleki mbuka woma.

⁷ Dingi diakayi, diakahutamela. Diui diakayi uma lu dingi ati: Onʼami la ngandji one; nyuwukeli.

⁸ Kemʼedja, ambeki wakakesakesa, vo komena nduku untu ntu, tshikima Jesu.

Elidja a Mete

⁹ Lamʼakawayahuloka uma lʼukungu, Jesu akakokomiya ati: Tanyutelaki nduku untu dikambu dienyinyu, edja ndu lamʼayulo Onʼa untu uma lu nyoi.

¹⁰ Vo wakalami aui aso lʼutema, wambwana vati: Eulwelu kʼuma lu nyoi keso katandi, ukundi weto?

¹¹ Vo wakawumbula vati: Okoko wana wata afundji vati: Dieli la Elidja dia ndja ntundu?

¹² Ndi akâkaluya diui ati: Dieli la Elidja dia ndja ntundu dia nongosola akambu tshe. Ku ukundi akawafundi dikambu dia Onʼa untu vati: Dieli la ndi dia nsuwa asui efula la monywama?

¹³ Keli dimi lambunyutela nti: Elidja ambuyakaka. Vo wakutshela dikambu tshe diakawalangi, uku akafundama lu dikambu diandi.

Jesu Ambokonoya Dikenda Kanga Ekhunye

¹⁴ Lamʼakawasukana le ambeki, vo wakenyi ului a wuki wʼantu wadingi, la afundji wama la wo.

¹⁵ Lamʼakenyi ului wʼantu Jesu, vo wakatamanya mamba. Vo wakalawo utsha le ndi dia ntuwemula.

¹⁶ Ndi akawambula ati: Dikambu diakona diamanyu la wo?

¹⁷ Untu omotshi uma lʼatei wʼului ako akûkaluya diui ati: Umbetsha, dimi lakayi la onʼami a pami one le ye. Ndi eko la odienge watuweteka lumi.

¹⁸ Lu ahuli tshe watuwahemaka odienge ako, vo watuhumanyaka lu kete. Ona atutumbaka lolodu, atokeketanyaka anyu, atusinitalaka sina. Dimi lakasengisengi ambeki aye dia mbutundja odienge, keli vo haweyi ntsha.

¹⁹ Ndi akati ati: Yee, nyu wa lolonga lone laha la mbetawo, edja ndu kaandi ayumukimo ntshikala la nyu? Edja ndu kaandi ayumukimo ndjala la memakana le nyu? Nyuyi la ndi le mi.

²⁰ Vo wakayi la ndi esadi le Jesu. Lamʼakenyi odienge Jesu, vo wakahuhanya ona wulu. Ku ona akako lu kete, akangito, atumba lolodu.

²¹ Jesu akambula shi ati: Umaka etena kakona kakayala ona la dikambu ne? Ndi akûkaluya diui ati: Umaka dikenda.

²² Tena efula, odienge ako atokoshaka lu dja ndu lu ashi dia mbudiaka. Naka we mbeyaka ntsha, utuki ketshi, utukimanyia.

²³ Jesu akûkaluya diui ati: Naka we mbeyaka ntsha, akambu tshe mbeyaka ntshama le untu letawo.

²⁴ Kemʼedja shi akahangohango ati: Dimi lambetawo! Unkimanyia nshidiya yamu yami!

²⁵ Lamʼakenyi Jesu ului wʼantu wambomota, ndi akahangwela odienge ati: We odienge wateteka ona one lumi la luhuki, dimi lambukutela nti: Utumbi uma le ndi! Tuwahemaki ntu.

²⁶ Odienge ako akahangohango, akuhuhanya wulu efula, ku vo wakatumbi. Ona akayala uku untu lambuvo, edja ndu antu efula wakati vati: Ndi ambuvo.

²⁷ Jesu akukimela lu lunya, akawetula, ku ndi akunela.

²⁸ Lamʼakandoto lu luudu, ambeki andi wakawumbula lu sheki vati: Ukundi akisu kumbeya mbutundja?

²⁹ Ndi akâkaluya diui ati: Wuhu one mbeyaka ntumba tshikima la dombelo.

Jesu Ambuwatela Ntu Dia Nyoi Kandi

³⁰ Vo wakamo uma leko, waketi la Ngalili. Ndi kunanga untu mbeya dihuli diendi.

³¹ Ndi aketsha ambeki andi ati: Onʼa untu ayukimwama lu anya wʼantu. Vo wayudiaka, ku lamʼayeta nshi shatu umakʼetena kayuwudiaka, ndi ayulo.

³² Vo kumana dikambu so fundu, keli wakuki woma wa mbumbula.

Tamu Dia Luleki Wuki

³³ Vo wakakumi la Kaperenauma. Lamʼaki Jesu lu luudu, ndi akawambula ati: Kakanyayamaka lu mbuka?

³⁴ Vo wakatshikala ki; ne dia vo wakayamanyaka vati: Akona uleki wuki lʼatei asu?

³⁵ Ndi akadjase, aketi ambeki andi dikumi la ahendi. Ndi akawatela ati: Naka untu nangaka ndjala lu dihuli dia ntundu, ayali lʼokongo wʼantu tshe, ndu ukambi wʼantu tshe.

³⁶ Ku ndi akose kiendakenda, akaweme lʼatei awo. Ndi akolele lu anya, akawatela ati:

³⁷ Untu tshe lalungula kiendakenda motshi uku one lu lukumbu lami, ndi ambunungula dime. Untu tshe lanungula, hanungula dime, keli ambulungula one lakantumi.

Utshi wʼAkamba wa Mamba

³⁸ Joani akawutela ati: Umbetsha, shu takenyi untu atundja edienge lu lukumbu laye, ku shu takusike, ne dia ndi kuntuyela.

³⁹ Jesu akati ati: Tanyusikeki, ne dia nduku untu latsha dikambu dia mamba lu lukumbu lami, ayeya mpindwelami esadi.

⁴⁰ Ne dia untu tshe laha utunyi le su, keli la su.

⁴¹ Mete kanyutelami nti: Untu tshe lanyusha dikoho diʼashi a no, ne dia nyu nyeko wa Kristu, ndi hushisha difutu diandi.

⁴² Keli untu tshe latakanya kiendakenda motshi yambumbetawo, ndeka ololo vo mbukeleka dive dia wuki diʼohelo lu kingu, ku mbutambiya lu uduwa.

⁴³ Naka lunya laye lambukutakanya, uluhimbuli. Ndeka ololo we mboto lu lumu lʼekomo, uleki ntsho lu luwinga la dja la anya ahendi, lenʼeli dja yahadimala;

⁴⁴ lene ahavu kusu yawo, ndu ahatudimalaka dja.

⁴⁵ Naka lukulu laye lambukutakanya, uluhimbuli. Ndeka ololo we mboto lu lumu lʼekomo, uleki ntsho lu luwinga la dja la ekulu ehendi;

⁴⁶ lene ahavu kusu yawo, ndu ahatudimalaka dja.

⁴⁷ Naka su diaye diambukutakanya, udikhunduli. Ndeka ololo we mboto lu diulelu dia Unyashungu la su otoi, uleki mbikadjema la ashu ahendi lu luwinga la dja;

⁴⁸ lene ahavu kusu yawo, ndu ahatudimalaka dja,

⁴⁹ ne dia dja yayete untu tshe mpe uku leho.

⁵⁰ Leho leko ololo, keli naka leho lambusuwo, la na la ayunyulete mpe ntu? Nyuyali la leho lʼetema anyu, ndu nyuyali ki untu la unyandi.