Mako 8 - La Bible en Otetela (Bible K'Ekila) 1991Jesu Ambusha Antu Nunu Nei Mbu ya Nde ( Mat. 15:32-39 ) 1 Lu nshi sho, ului a wuki wʼantu wakamote ntu. Vo tawaki la mbu ya nde. Jesu aketi ambeki andi, akawatela ati: 2 Dimi lambuka ului one wʼantu ketshi, ne dia vo wambutshikala la mi nshi shatu. Vo kema la mbu ya nde. 3 Naka dimi layakimo utsha la wakawo la ndjala, vo wayutokomo lu mbuka, ne dia amotshi wakayi uma lʼetali. 4 Ambeki andi wakawumbula vati: Lendi ukuki untu nkundja ekama wa ma lu dihuli ne dia shenga, dia ndutsha antu ane? 5 Ndi akawambula ati: Ekama engana weli la nyu? Vo wakûkaluya diui vati: Esambeli. 6 Ndi akadjasha ului wʼantu la kete. Ndi akose ekama ako esambeli, akuki lusaka, akawatula. Ndi akasha ambeki andi dia vo nkitsha la ntundu kawo, ku vo wakekitsha la ntundu kʼului wʼantu. 7 Vo waki ndu la tusisi. Lamʼakandatotshokola, ndi akawatela ati: Nyutukitsha ndu to la ntundu kawo. 8 Antu wakali, wakaluti. Vo wakatongona betshi diakatshikala asaka esambeli. 9 Vo waki antu uku nunu nei. Ku Jesu akakimo. 10 Kemʼedja ndi akoto la ambeki andi lu watu, wakatshu utsha lu beke dia Dalamanuta. Wambuyanga Djimbitelu ( Mat. 16:1-4 ; Luk. 12:54-56 ) 11 Afarise wakayi le Jesu; wakatatela mama la ndi, wayanga djimbitelu yʼuma lʼulungu, dia mbuhimba. 12 Ndi akakitshakitsha lumu, akambula ati: Okoko wana wayanga wa lolonga lone djimbitelu? Mete kanyutelami nti: Hawenya wa lolonga lone djimbitelu. 13 Ndi akatshiki, akoto ntu lu watu, akatshu utsha la wedi ukina. Edya kʼAfarise ( Mat. 16:5-12 ) 14 Ambeki andi wakuhela ntola ma. Paka ukama otoi utu mbaki la wo lu watu. 15 Ndi akakokomiya ati: Nyendi ololo, nyewo edya kʼAfarise ndu edya ka Herode. 16 Vo wakatanela vati: Shu kema la ma. 17 Jesu akeyi tukanyi tawo; akawambula ati: Ukundi wadjanyu lundju ne dia nyu nyaha la ma? Nyu nyatalimbitela, kuyanga mana fundu? Etema anyu wambuyala lunyu? 18 Nyu la ashu, ku nyu hanyenyi? Nyu la atui, ku hanyuki? Undi, nyu hanyuho? 19 Lamʼakamatula ekama etanu wa ma lʼatei wʼantu nunu tanu, asaka angana wa betshi dia ma diakatshikala wakanyatongona? Ku vo wakûkaluya diui vati: Dikumi la ahendi. 20 Ndu lamʼakamatula ekama wa ma esambeli lʼatei wʼantu nunu nei, asaka angana wa betshi dia ma diakatshikala wakanyatongona? Vo wakûkaluya diui vati: Esambeli. 21 Ndi akawambula ati: Nyu nyatamani fundu utu? Jesu Ambokonoya Kanga Tshungu 22 Vo wakakumi la Betesayida. Antu amotshi wakayi la kanga tshungu le ndi, wakosengasenga vati: Uwunandi. 23 Ndi akakimela kanga tshungu lu lunya, akamo la ndi uma lu ngelu. Ndi akawutela losoi lu ashu, akawahe anya; akawumbula ati: We menaka engo kemotshi? 24 Ndi akedia ashu, akati ati: Dimi lambena antu, keli lambuwaena wakendakenda uku etamba. 25 Jesu akananda ashu andi ntu, ku ndi akendi tee, akakono, akenyi diango tshe ololo, 26 Ndi akutumi lakandi; akawutela ati: Tutshokaki la ngelu. Petero Ambetawo Ati: Jesu Onʼa Unyashungu ( Mat. 16:13-20 ; Luk. 9:18-21 ) 27 Jesu akatshu, ndi la ambeki andi, utsha lu ngelu ya la Kayisariya Filipi. Ndi akambula ambeki andi lu mbuka ati: Akona amvuta antu, emi? 28 Vo wakûkaluya diui vati: Joani Ubatizanyi; akina vati: Elidja; akina vati: Umvutshi omotshi. 29 Ku ndi akawambula ati: Ya nyu, amvutanyu, emi na? Petero akûkaluya diui ati: Kristu keye. 30 Ku ndi akakokomiya ati: Tanyutelaki untu dikambu diami. Jesu Ambuta Dia Nyoi Kandi la Eulwelu Kandi ( Mat. 16:21-28 ; Luk. 9:22-27 ) 31 Jesu akatatela mbaetsha ati: Dieli la Onʼa untu dia nsuyama efula. Dieli la mi dia ntunama le dikumanyi, la le elombedi a waki, ndu le afundji. Ndu dieli la mi dia ndjakema, la dia mbulo lamʼayeta nshi shatu. 32 Ndi akawatela aui aso hwe. Petero akawose, akatatela mbushimba la mbulaka. 33 Keli Jesu akasikiso, akenyi ambeki andi. Ndi akahangwela Petero ati: Satana! utshimbi Pokongo ami. We hadji yimba lu akambu wa Unyashungu, paka lu akambu wʼantu. 34 Ndi aketi ului wʼantu la ambeki andi, akawatela ati: Naka untu alanga ndjelami, ndi ayaseke, embe utamba andi a mpeketanya, andjeli. 35 Ne dia untu tshe lalanga mamela lumu landi, ayulushisha; keli one lashisha lumu landi dikambu diami la dia lukumu lʼololo, ayulamela. 36 Waho akona wayuyala le untu lakundja kete tshe, naka ndi ambushisha lumu landi lu dikambu diako? 37 Engo kakona kukuki untu mengonya la lumu landi? 38 Untu tshe lʼatei a lolonga lone la luseka ndu lʼakambu wa kolo layumbuka dimi la aui ami sonyi, ndu dimi, Onʼa untu, layuwuka sonyi lamʼayumuya lu lutumbu la Papa, kame la andjelo wʼekila. |
La Bible en Otetela © Allianee Biblique de la Republique Democratique du Congo, 1991
Bible Society of the Democratic Republic of Congo