Mako 7 - La Bible en Otetela (Bible K'Ekila) 1991

Akambu Walanya Antu Mete

¹ Afarise la afundji amotshi wakayi uma la Jerusalema, wakasangana la Jesu.

² Vo wakenyi ambeki andi amotshi wale ma lʼanya mindu, aha mbotsha.

³ (Afarise la asi Juda tshe hawutolekaka ma, tshikima wambotsha anya pudipudi. Vo watuyelaka ditshelu dia watshewo.

⁴ Lamʼatuwukalulaka uma la kituka, vo hawuli, tshikima wamboka. Vo ndjelaka ndu ditshelu dikina efula, uku mbotsha akoho, puki, la diango diʼehotela).

⁵ Afarise la afundji wakawumbula vati: Dikambu kuna diahayeli ambeki aye ditshelu dia watshesu? Ukundi atuwolekaka ma lʼanya mindu?

⁶ Ndi akawatela ati: Nyu akanga a lukesu, mete kakati Isaya akambu wahatayi dikambu dianyu lʼafundelu ati: Antu ane watonemiaka lʼelomo awo, Keli etema awo weko etali uma le mi.

⁷ Vo watontemolaka otemolatemola, Watetshaka paka dietshelu dieli uku elembe wʼantu.

⁸ Nyu nyatukadjaka elembe wa Unyashungu, nyatumamemaka paka ditshelu diʼantu.

⁹ Ndi akawatela ati: Mete, nyambutuna elembe wa Unyashungu dia nama ditshelu dianyu.

¹⁰ Mose akati ati: Olemia sho la nyo; ndu ati: One lateketa diui dia kolo lu dikambu dia shi kana nyangu, dieli la ndi dia mvo.

¹¹ Keli nyu nyatutaka nyati: Naka untu ambutela shi kana nyangu ati: Kene kutumukukimanyia kambuyala “Korobana” (nkadimula ati: Ushasha le Unyashungu) —

¹² ku nyu hanyetawo dia ndi nkimanyia shi kana nyangu ntu.

¹³ Okone uyu nyambulanya diui dia Unyashungu la ditshelu dianyu, diakanyakiti. Nyu nyatutshaka nau akambu akina wa wuhu oso efula.

¹⁴ Ndi aketi ului wʼantu ntu, akawatela ati: Nyu tshe nyumbukeli, nyumani aui ami fundu.

¹⁵ Nduku engo kʼuma lʼandja wʼuntu katotoka lʼutema andi, keya mbulanya. Keli kene katutumbaka uma lʼutema wʼuntu katuwulanyaka.

¹⁶ One leli la atui wa mbuka, uki.

¹⁷ Ndi akamo uma le ului wʼantu, akoto lu luudu. Ku ambeki andi wakawumbula dia wela ako.

¹⁸ Ndi akawambula ati: Ndu nyu, nyatamani fundu? Nyu hanyulimbitela nyati: Engo tshe keli lʼandja, lamʼayutoto lʼutema wʼuntu, to heyi mbulanya uka?

¹⁹ Ne dia to hatutotoka lʼutema, keli to katotoka lu dikundju, ku to hatutumbaka utsha lu kumba? (Ndi akati aui aso, dia mbakilula mbu ya nde tshe.)

²⁰ Ndi akati ntu ati: Engo katumba uma lʼutema wʼuntu katulanyaka;

²¹ ne dia uiua lʼetei, uma lʼetema wʼantu katutumbaka tukanyi ta kolo, munanyi, evi, diakanelu, seka,

²² okomiya, akambu wa kolo, lukesu, saki ka kolo, kandjema, lotengo, utaku, ndu utshatsha.

²³ Akambu aso tshe wa kolo watutumbaka uma lʼetei, mbatulanyaka untu.

Umuntu Usi Surofinikiya

²⁴ Jesu akunela uma leko, akatshu utsha lu beke dia Tura la Sidona; akoto lu luudu. Ndi akalangi ndjashe, keli ndi kumbeya ndjashe ntu.

²⁵ Kemʼedja, umuntu omotshi, lukanga ona umuntu laki la odienge, akuki lukumu landi. Ndi akayi le ndi, akayakosha lʼekulu andi.

²⁶ Umuntu ako aki usi Ngirika, wudja awo aki Surofinikiya. Ndi akosengasenga dia ntundja odienge uma le onʼandi a umuntu.

²⁷ Jesu akawutela ati: Utshikeli ana dihuli, watalutshi ntundu: hasungana dia mbosa ma dia ana, ku mbukela fo.

²⁸ Keli umuntu akûkaluya diui ati: Elu, Khumadiondjo, keli ndu fo yeli la tshina dia mesa yatolekaka fusa ya ma dia ana.

²⁹ Jesu akawutela ati: Ne dia diui diaye so, aya ntsho. Odienge ambutumba uma le onʼaye.

³⁰ Ndi akatshu utsha lakawo, akatutana ona etami lu tangi, la odienge akatumbi.

Jesu Ambokonoya Kanga Luhuki la Dikukuma

³¹ Jesu akamo uma lu leke la Tura. Ndi akayeta uma la Sidona, akatenyanya kete ya Dekapoli, akakumi lʼuduwa a Ngalili.

³² Antu wakawela kanga luhuki la dikukuma, wakosengasenga vati: Uwahe lunya.

³³ Jesu akawose, akamo la ndi uma lʼatei ului wʼantu. Ndi akadji pita lu atui andi, akahongola losoi, akawunanda lu lulimi.

³⁴ Ndi akalela lʼulungu; akasikuma; akawutela ati: “Efefata,” nkadimula ati: Udihwami.

³⁵ Atui andi wakadiho, la lulimi landi lakakeleko, ku ndi akateketa ololo.

³⁶ Ndi akakokomiya ati: Tanyutelaki nduku untu. Keli uku akandaleki mbakokomiya wuhu ako mbakawaleki nyanganya lukumu lako.

³⁷ Antu wakatamanya mamba wulu, vati: Ndi ambutsha akambu tshe ololo. Ndi mbukiaka ndu akanga a puki, ndu nteketshaka ndu akanga a nyumi.