Mako 3 - La Bible en Otetela (Bible K'Ekila) 1991

Jesu Ambokonoya Untu Lushi lʼEkila

¹ Jesu akoto ntu lu etemwelo. Untu kanga lunya lakumi aki loko.

² Afarise wakawendi dia mena kana ndi avokonoya lushi lʼekila, dia vo mbosongwela.

³ Jesu akatela kanga lunya lakumi ati: Unela, emali.

⁴ Ku ndi akawambula ati: Dikambu diakona dieli ekila ntsha lushi lʼekila, ntsha ololo kana ntsha kolo? Nshimbela untu kana mbudiaka? Keli vo wakalembohala.

⁵ Ndi akewewa, awaenda la kele, anyanga ne dia lunyu lʼetema awo. Ndi akatela untu ako ati: Usimbuli lunya laye. Ndi akalusimbula; ku lunya landi lakakono.

⁶ Afarise wakatumbi, kemʼedja vo wakusangela lulimi vo la asika Herode dia mbudiaka.

Jesu Ambokonoya Antu Efula

⁷ Jesu la ambeki andi wakatshu lʼuduwa. Ului a wuki wʼantu uma la Ngalili wakuyeli, ndu antu uma la Judiya,

⁸ uma la Jerusalema, uma la Idumaya, uma la wedi a Jorodana, ndu uma lʼetshimba wa Tura la Sidona, ului a wuki wakuki lukumu lʼakambu a waki wakandatshaka, wakayi le ndi.

⁹ Ndi akatela ambeki dia vo mbukungela la watu, ne dia ului wʼantu watukuwukamakamela.

¹⁰ Ndi akakonoya antu efula. Okone tshe waki la hemo ya wulu, wakomotela dia vo mbunanda.

¹¹ Lamʼakenyi edienge Jesu, vo wakukhusamela, wakahangohango vati: Onʼa Unyashungu keye!

¹² Ndi akakokomiya wulu ati: Tanyumbeyanyaki la antu.

Jesu Ambosonola Ambeki Dikumi la Ahendi

¹³ Jesu akambela lu akuna, aketi wane wakandalangi mbeta, ku vo wakatshu le ndi.

¹⁴ Ndi akasonola dikumi la ahendi, dia ndjala kame la ndi, la dia ndi mbatuma dia ntusambisha,

¹⁵ ndu dia vo ndjala la wulu a ntundja edienge.

¹⁶ Simona, lakandole ati: Petero;

¹⁷ Jakoba, onʼa Zebede; la Joani, onangu Jakoba, wako wakandole ati: Boanenge (kitshimudi ati: Ana wa dikhungula dia mvula);

¹⁸ Andere; Filipo; Baratolomayo; Mateu; Tomasi; Jakoba, onʼa Alafeyo; Tadeyo; Simona, usi Kanana;

¹⁹ la Judasi Isakariyote, lakûfungi. Ku Jesu akoto lu luudu.

Jesu Ambukaluya Afundji Diui ne Dia Wulu Andi

²⁰ Ului wʼantu wakamote ntu, edja ndu Jesu la ambeki andi kumbeya nde ma.

²¹ Lamʼakuki engenyi andi lukumu lʼakambu wakayala, vo wakatshu dia ntuwosa, vati: Ndi ambudjo dadi.

²² Afundji wakayi uma la Jerusalema, wakati vati: Belezebulu kambuwahema; ndi atutundjaka edienge paka lu wulu wa uwandji wʼedienge.

²³ Ku Jesu akawaeti, akawaukela wela ati: Ukundi ayeya Satana ntundja Satana?

²⁴ Naka diulelu diambatana, diulelu diako hadieyi nshikikala.

²⁵ Naka khumbu kambatana, khumbu kako heyi nshikikala.

²⁶ Naka Satana ayuyalosha, ayuyatanya, ndi heyi nshikikala. Ku dikambu diandi diayushila.

²⁷ Nduku untu leya mboto lu luudu la kanga wulu dia mbosa diango diandi, tshikima ndi ambutakeleki kanga wulu ako, ku lʼokongo diku, ndi ayosa diango dieli lu luudu.

²⁸ Mete kanyutelami nti: Wayudimanyia antu kolo yawo tshe ndu tengo yatengawo Unyashungu,

²⁹ keli hawudimanyia untu latenga Nyuma kʼOlolo pundju; ndi ayutshikala lu kolo kandi pundju.

³⁰ Jesu akati osoku, ne dia vo wakataka vati: Ndi eko la odienge.

Watutshaka Lulangu la Unyashungu Mbeli Asikandi

³¹ Nyangu la anangu Jesu wakayi, wakayemala lʼandja, wakatumi untu la ndjuweta.

³² Ului a wuki wʼantu wakadjashi wûdingi. Vo wakawutela vati: He nyo la ananyo ane weli lʼandja, wakuyanga.

³³ Ndi akâkaluya diui ati: Wa na weli nyomi la analingu?

³⁴ Ndi akendi wane wakadjashi wûdingi, akati ati: Nyomi la analingu ane!

³⁵ Ne dia untu tshe latutshaka lulangu la Unyashungu, keli onalingu, kadiyemi, la nyomi.