Mako 16 - La Bible en Otetela (Bible K'Ekila) 1991

Diumbu Diambutanema Hwe

¹ Lamʼaketi lushi lʼekila, Mariya o wʼusi Mangadala, Mariya nyangu Jakoba, la Salome wakasumbi diango diʼupumu, dia ndjukita lʼudu wa Jesu.

² La kesekese lu lushi la ntundu la lubingu, vo wakayi la diumbu, unya ambuhuto.

³ Vo wakayambwanaka vati: Untu akona ayutungitwela dive uma lu suku dia diumbu?

⁴ Lamʼakawedia ashu, wenyi ku dive diakangitwami. Dive diako diaki wuki utamanya.

⁵ Vo wakoto lu diumbu, wakenyi olongo a pami udjashi lu lunya la pami, olotshi ukutu a wema. Ku vo wakambi.

⁶ Ndi akawatela ati: Tanyambaki. Jesu yʼusi Nazareta, lakawadiaki lʼutamba a mpeketanya, kayanganyu. Ndi ambulo, ndi kema lane; nyendi dihuli diakawawetamia!

⁷ Nyutshu, nyututeli ambeki andi ndu Petero nyati: Ndi ambutatela ntsho la ntundu kanyu utsha la Ngalili. Nyu nyayutuwena leko, uku akandanyutela.

⁸ Vo wakatumbi uma lu diumbu, wakalawo. Vo kumvutela nduku untu diui so, ne dia vo waki la woma.

Jesu Ambene le Mariya wʼUsi Mangadala

⁹ Lamʼakulo Jesu la kesekese, lu lushi la ntundu la lubingu, ndi akene ntundu le Mariya wʼusi Mangadala, lakandatundja edienge esambeli.

¹⁰ Mariya akatshu, akatutela antu waki kame la ndi lʼutanda.

¹¹ Lamʼakawuki vati: Ndi eko la lumu, ndu akene le Mariya, vo kumbetawo.

Jesu Ambene le Antu Ahendi

¹² Lʼokongo wa akambu aso, Jesu akene le antu ahendi, lamʼakawatatshokaka utsha lʼusui.

¹³ Vo wakatshu, wakatutela akina dikambu diako, keli vo kumbetawo ndu diui diawo.

Jesu Ambene le Ambeki Dikumi la Otoi

¹⁴ Lʼokongo diku, Jesu akene le ambeki dikumi la otoi lamʼakawadjashi wale ma. Ndi akatshumula dikambu dia tamu la lunyu lʼetema, ne dia vo kumbetawo aui wʼantu, wakawenyi lʼokongo wʼeulwelu kandi.

¹⁵ Ndi akawatela ati: Nyutshu lu kete tshe, nvusambisha antu tshe lukumu lʼololo.

¹⁶ One tshe letawo, ndu labatizama, ayushimbamela. Keli one tshe lahetawo, ayanyema.

¹⁷ Tulimbitelu tone tayuyala le wane wetawo: vo wayutundja edienge lu lukumbu lami; wayoteketa eteketa wʼeyuyu;

¹⁸ wayunda elui; naka vo wayono engo ka nyoi, engo kako nuwautsha kandji; ndu wayahe akanga a hemo anya, ku vo wayukalangana.

Jesu Ambulungwama lʼUlungu

¹⁹ Lamʼakashidiya Khumadiondjo Jesu nteketa la wo, ndi akalungwama lʼulungu. Ndi akatudjase lu lunya la pami la Unyashungu.

²⁰ Ku vo wakatshu, wakasambisha lukumu lʼololo lu ahuli tshe. Khumadiondjo akakambaka kame la wo, akikitsha diui la tulimbitelu takayelaka esambishelu kadio. Ayali osoku!