Mako 13 - La Bible en Otetela (Bible K'Ekila) 1991

Ehandjwelu ka Jerusalema

¹ Lamʼakayatumbaka Jesu uma lʼetemwelo, umbeki andi omotshi akawutela ati: Umbetsha, enda ave wa mamba ndu mvudu ya mamba!

² Ku Jesu akawutela ati: We menaka mvudu ya waki nye? Nduku dive diayutshikala ladiku dia dikina, wayahandjula.

³ Ndi akadjase lʼUkungu wʼEweli, lu welelo wʼetemwelo. Petero, Jakoba, Joani la Andere wakawumbula lu usheshe vati:

⁴ Ututeli, lushi lakona layuyala akambu aso? Ndu djimbitelu yakona yayuyala lamʼayuyanga akambu ako nshidiyama?

⁵ Jesu akatatela mbatela ati: Untu tanyunganyiaki.

⁶ Antu efula wayuya lu lukumbu lami, wata untu lʼuutu ati: Dimi keli Kristu. Vo wayunganyia antu efula.

⁷ Lamʼayunyuka akambu wʼata la kumu yʼata, tanyudidimaki. Akambu aso wayuya mete, keli ekumelu atayala.

⁸ Wudja ayolosha wudja, la diulelu diayolosha diulelu. Adidimu wa kete wayenama lu dihuli la dihuli. Ndjala ya kasha yayuyala. Akambu aso wavuvala etatelu kʼasui.

⁹ Keli nyu nyewo, wayunyukimo lu dumbwelu; wayunyokomola lu temwelo diawo. Nyu nyayemala lu dumbwelu la ntundu kʼembuledi ndu ka khumi ya dikanga dikambu diami.

¹⁰ Dieli la lukumu lʼololo nsambishama ntundu lu wedja tshe.

¹¹ Lamʼayuwutsho la nyu la ntunyukimo lʼelumbwelu, tanyuyakananyaki ntundu nyati: Kayututa na? Kanyuti aui wayuwunyusha lʼetena kako, ne dia aha nyu mbayuta, keli Nyuma kʼOlolo kayuta.

¹² Untu lʼuntu ayukimo onangu dia ndi mvo. Shi ayukimo onʼandi. Ana wayontombokwela ambutshi awo, wayadiaka.

¹³ Antu tshe wayunyuhetsha dikambu dia lukumbu lami. Keli one layushikikala edja ndu lʼekumelu, ayushimbamela.

¹⁴ Lamʼayunyena etemolatemola, engo ka wononyi, kemadi lu dihuli diahatahumbi memala (one lala akambu ane amani fundu), wane weli la Judiya kawulawo utsha lʼekungu.

¹⁵ Lʼetena kako, untu leli lʼote a luudu, takitaki, totoki lu luudu landi dia ntundja diango.

¹⁶ Ndu untu leli lʼekambo, takalulaki dia ntosa dihondo diandi.

¹⁷ Ndi shoko yayuyala lʼetena keso le amantu weli la waemi, la le wane walomia ana li!

¹⁸ Nyolombe Unyashungu diaha akambu aso ndjala lu nshi ya tshitshi.

¹⁹ Fono ka wulu kayuyala nshi sho, wuhu wahatayala nduku lushi umaka etatelu kʼandja wakatungi Unyashungu edja ndu kakiane, ndu wuhu wahayalaki ntu pundju.

²⁰ Utunduyala Khumadiondjo kunsusa nshi yako, tshiki nduku untu lakashimbamela. Keli ndi akasusi nshi yako ne dia esonami, wakandasonola.

²¹ Lʼetena keso, naka untu ayunyutela ati: Enda, Kristu eko lane! kana ati: Enda, ndi eko leku! tanyuwetawoki.

²² WaKristu wa kashi la amvutshi wa kashi wayunela, wayenya tulimbitelu la akambu wa mamba, dia munganyia ndu esonami, naka vo wayeya ntsha.

²³ Keli nyewo; dimi oso ambutanyutedi akambu tshe ntundu.

Eyelu ka Mesiya

²⁴ Lu nshi sho, lamʼayushila fono keso, unya ayukadimo udjima; ngondo hukashiya;

²⁵ toto tayoko uma lʼulungu; diango dia wulu dia lʼulungu diayusutshasutshama.

²⁶ Ku wayena Onʼa untu ayayi lu wangi la wulu wa mamba ndu la lutumbu.

²⁷ Ku ndi ayutuma andjelo; vo wayutusanganya esonami andi uma lu beke nei, uma lu kuma ka kete pulu ndu lu kuma kʼulungu.

Djimbitelu yʼUtamba a Fingu

²⁸ Nyose wetshelu uma lʼutamba a fingu. Lamʼatuyalaka tahi yawo woduwodu, ndu lamʼatutumbaka songusongu, nyu nyatulimbitelaka nyati: Owo aya suki.

²⁹ Okone ndu nyu, lamʼayunyena akambu aso wambutshama, kanyeyi nyati: Onʼa untu aya kasuki, ka suku.

³⁰ Mete kanyutelami nti ntu wa lolonga lone hawushila, tshikima akambu aso tshe wambushidiyama.

³¹ Ulungu la kete wayushila, keli aui ami hawushila.

Jesu Ambutela Antu Dia Vo Mendaka

³² Nduku untu leya lushi kana ushidi ako, kuyanga andjelo wa lʼulungu, kuyanga Ona, paka Papa ndame.

³³ Nyewo, nyendaki, ne dia nyu hanyeya lamʼayukuka etena kako.

³⁴ Dikambu diako dieko uku untu lakatshu lu kete kina, lakatshiki luudu landi, lakasha ekambi andi okende, lakakahela ulimu untu lʼuntu, lakatela ndu ulami wa suku ati: Ulamaki ngelu ololo!

³⁵ Nyendaki — ne dia nyu hanyeyi etena kayuya kanga luudu, kana la dikolo, kana lʼasa ndeki, kana kokʼa ntundu, kana la pindju —

³⁶ Lamʼayunduya shashimuya, ndi atukunyutana lu djo.

³⁷ Diui diunyutedimi ne, antu tshe mbaditelami nti: Nyendaki.