Mako 12 - La Bible en Otetela (Bible K'Ekila) 1991

Wela wʼEkambi wʼEkambo

¹ Jesu akatatela mbaetsha akambu la wela ati: Untu omotshi akune ekambo kʼelua. Ndi akadingi lukumbu lʼetamba a lumu lʼutshimba ato. Ndi akatshi yundja ya mamula ashi wʼelua, akahiki luudu lʼetangelu. Ndi akakitshikela ekambi wʼekambo, akatshu utsha lu kete kina.

² Lu nshi ya dielelo diʼelua, ndi akatumi ukambi andi omotshi le ekambi wʼekambo dia ntosa elua.

³ Ekambi wʼekambo ako wakawundi, wakokomola, wakûkaluya anyanya.

⁴ Ndi akatumi ukambi ukina le wo. Vo wakokote puta lʼote, wakutshela kolo.

⁵ Ndi akatumi ukina la satu le wo, ku vo wakatudiaka. Ndi akatumi ndu akina efula, ku vo wakakomola amotshi, wakadiaki akina.

⁶ Ndi aki la etoi kʼona, lakandukaka ngandji. Ndi akayutuma le wo ati: Vo wayolemia onʼami.

⁷ Keli ekambi wʼekambo wakatanela vati: Ukito uku! Nyeso tutudiaki, ku sangu diandi diayuyala diasu.

⁸ Vo wakawundi, wakudiaki, wakawukadja lʼandja wʼekambo.

⁹ Ya ukundi ayutsha kanga ekambo? Ndi ayuya; ayuliaka ekambi wʼekambo, ku ayusha akina ekambo kako.

¹⁰ Nyu nyatali afundelu kene ati: Dive diakatuni ambiki wa mvudu, Diakayuyala dive dia wuki dia lu tshuku;

¹¹ Dikambu ne diakatshama uma le Khumadiondjo, Dio dieko mamba lu ashu asu?

¹² Vo wakayangi mbunda, ne dia wakeyi vati: Shu mbukedindi wela oso. Keli vo wakuki ului wʼantu woma. Okone vo wakutshiki, wakatshu.

Wambumbula Jesu ne Dia. Mbunda lu Lulimi: — Kana Ololo Nambula Kayisa

¹³ Vo wakatumi Afarise la asika Herode amotshi dia munda Jesu lu lulimi.

¹⁴ Lamʼakawayi, vo wakawutela vati: Umbetsha, shu mbeyaka shati: Kanga mete keye; we hakanela nduku untu. We hatendaka wuhu akona weli antu, keli we atetshaka antu mbuka ka Unyashungu lu mete. Undi, eko ekila nfuta ulambu le Kayisa, kana kema?

¹⁵ Tufuti, kana tatufutaki? Keli ndi akeyi lukesu lawo, akawambula ati: Ukundi ampimbanyu okone na? Uhunyela denariyo, keli diendi.

¹⁶ Ku vo wakawela denariyo otoi. Ndi akawambula ati: Efanelu la efundelu ka na kene? Vo wakûkaluya diui vati: Ka Kayisa.

¹⁷ Jesu akawatela ati: Nyusha Kayisa diango dia Kayisa. Nyusha Unyashungu diango dia Unyashungu. Ku vo wakatamanya mamba dikambu diandi.

Kana Eulwelu kʼUma lu Nyoi Keko?

¹⁸ Asaduke, wane watutaka vati: Kema eulwelu kʼuma lu nyoi, wakayi le Jesu. Vo wakawumbula vati:

¹⁹ Umbetsha, Mose akatufundela ati: Naka untu ambuvo, ambutshika wadendi, aha la ona, onangu kakitani la wadendi, kululi luhanga laki onangu.

²⁰ Apami esambeli wʼetoi utema wakiko. Lʼenundu akatshuki wadi, ku ndi akavu, kuntshika ona.

²¹ La hendi akakitana la wadendi, ku ndi akavu, kuntshika ona. Ndu la satu akakitana la ndi, akavu pupu.

²² Vo esambeli tshe ngaso utu, kuntshika ona. Lamʼakawashili mvo tshe, ndu umuntu akayuvo.

²³ Lʼeulwelu kʼuma lu nyoi, akona, lʼatei awo vo esambeli, ayuyala umendi? ne dia vo tshe wakawose wadi.

²⁴ Jesu akâkaluya diui ati: Aha uma lu dikambu ne mbanganelanyu, ne dia nyu hanyeyi afundelu, kuyanga wulu wa Unyashungu?

²⁵ Ne dia lamʼulo antu uma lu nyoi, vo hawutshuki, hawutshukama, keli vo watuyalaka uku andjelo lʼulungu.

²⁶ Lu dikambu dia eulwelu ka wavo, nyu nyatali lu buku dia Mose, lu ahuli wufundami dikambu dia dikumbu, uku akawutela Unyashungu ati: Dimi keli Unyashungu wʼAbarahama, Unyashungu wa Isaka, Unyashungu wa Jakoba?

²⁷ Ndi kema Unyashungu a wavo, keli ndi eko Unyashungu a wasena. Nyu nyambunga heyama!

Elembe Ehendi a Waki

²⁸ Ufundji omotshi akayuka lamʼakawambwanaka. Ndi akenyi ati: Jesu ambukaluya aui ololo. Ndi akambula Jesu ati: Olembe akona wuleki elembe ekina tshe?

²⁹ Jesu akûkaluya diui ati: Olembe a ntundu eko okone ati: Isariyele li, nyuki! Khumadiondjo, Unyashungu asu, Khumadiondjo eko otoi.

³⁰ Ulangi Khumadiondjo Unyashungu aye lʼutema aye tshe, la lumu la ye tshe, la yimba yaye tshe, ndu la wulu aye tshe.

³¹ Olembe a hendi one ati: Ulangi unyaye uku ayalangaye. Nduku olembe uleki elembe ene wuki.

³² Ufundji ako akawutela ati: Umbetsha, kawo. Mete kutshiye wati: Otoi mbendi, nduku ukina, paka ndi.

³³ Dia mbulanga lʼutema tshe, la yimba tshe, la wulu tshe, ndu nanga unyaye uku ayalangaye, ndeka elambu tshe la elambu tshe wa lutshumba ololo.

³⁴ Lamʼakenyi Jesu ati: Ndi ambukaluya diui dia yimba, ndi akawutela ati: We kema etali uma lu diulelu dia Unyashungu. Uma lʼetena keso, nduku untu aki la dihunga dia mbumbula umbula.

Jesu Ambumbula Afarise Dia Kristu

³⁵ Lamʼaketshaka Jesu antu lʼetemwelo, ndi akawambula ati: Ukundi weya afundji mvuta vati: Kristu eko kanula ya Davidi?

³⁶ Davidi ndame, lakaludiama la Nyuma kʼOlolo, akati ati: Khumadiondjo akatela Khumemi ati: Udjase lu lunya lami la pami, Edja ndu lambukitsha atunyi aye la tshina diʼekulu ave.

³⁷ Davidi ndame mbetaka ati: Khumadiondjo; ya ukundi wendi kanula yandi? Elui wʼantu kʼantu wakukaka aui andi lʼongenongeno.

Jesu Ambewula Antu Dia Afundji

³⁸ Jesu aketsha antu ati: Nyewo afundji. Vo nangaka nkendakenda wolotshi ekutu wʼetali, la antu mbaemula lu tuka.

³⁹ Vo nangaka mbidjase lu ekala wa ntundu lu temwelo, ndu lu ahuli wa ntundu lu alambu.

⁴⁰ Vo watohotolaka wadi waki edu mvudu, watolombaka Unyashungu edja, ne dia dienyanyu. Vo wayuleka manyema.

Akuta a Wadi Aki Udu

⁴¹ Jesu akadjase lu welelo wʼekitshelu ka eshasha. Ndi akendaka lamʼakadjaka antu eshasha lu ekitshelu. Akanga wʼengonyi efula wakadjaka diango efula.

⁴² Wadi aki udu omotshi, kanga wula, akayi, akayudja ekinga ehendi loko waki yediko ya sushi.

⁴³ Jesu aketi ambeki andi, akawatela ati: Mete kanyutelami nti: Wadi aki udu one, kanga wula, ambudja ushasha wuleki wudjisha akina tshe lu ekitshelu.

⁴⁴ Ne dia vo tshe wakadjisha eshasha uma lʼefula ka diango dieli la wo; keli ndi, uma lu wula andi, mbudjishandi kene tshe kaki la ndi, ka-kandahumbi ndjakimanyia.