Mako 11 - La Bible en Otetela (Bible K'Ekila) 1991

Jesu Ambukuma la Jerusalema la Lutumbu

¹ Lamʼakawasukana la Jerusalema, vo waketi lasuki la Betefange la Betaniya utsha lʼUkungu wʼEweli. Jesu akatumi ambeki andi ahendi ati:

² Nyutshu lu ngelu keledinyu. Kamʼayunyukuma loko, nyu nyayutana osongo wa punda wukelekami, wahatahema untu. Nyutukelekuli, nyuyi la wo.

³ Naka untu ayunyumbula ati: Okoko wana watshanyu okone? Kanyukaluya diui nyati: Khumadiondjo kuhumba. Ndi ayukaluya esadi.

⁴ Vo wakatshu, wakatutana osongo a punda wukelekami lu seke, lasuki la suku, ku vo wakukelekula.

⁵ Antu amotshi lʼatei a waku wakemadi laawo, wakawambula vati: Na dikambu diku? Okoko wana wakelekulanyu osongo wa punda uku?

⁶ Vo wakâkaluya diui uku akawatela Jesu, ku vo waketawo dia vo ntsho.

⁷ Vo wakayi la osongo ako wa punda le Jesu, wakahe ahondo awo ladiku diawo. Jesu akadjase laawo.

⁸ Antu efula wakali ahondo awo lu mbuka, la akina avundja wakawahimbula uma lu dikambo.

⁹ Wane wakatatshokaka la ntundu ka Jesu, la wane wakayuyelaka, wakatahangohangoka vati: Hosana! One luyi lu lukumbu la Latuyalaka atshokwami!

¹⁰ Diulelu dia tshesu Davidi diayayi, diatshokwami! Hosana lʼulungu!

¹¹ Jesu akakumi la Jerusalema, akoto lʼetemwelo. Ndiakashishima diango tshe diaki loko. Ku lamʼakayangi unya mbidja, ndi akatshu la ambeki andi dikumi la ahendi utsha la Betaniya.

Jesu Ambudja Utamba a Fingu Mananu

¹² La wedi a pindju, lamʼakawayayakaka uma la Betaniya, Jesu akuki ndjala.

¹³ Ndi akenyi utamba a fingu waki la akatshi tshalula. Ndi akatshu la ntenda ati: Kana layutana ulua omotshi loko. Lamʼakandakumi laawo, ndi akatani paka akatshi, ne dia nshi sho taki etena kʼelua.

¹⁴ Jesu akateketa; akatela utamba ati: Untu talekaki elua aye ntu pundju. Ambeki andi wakuki diui so.

Elongoswelo kʼEtemwelo

¹⁵ Vo wakakumi la Jerusalema. Jesu akoto lu etemwelo, ku ndi akatatela mbitshanya wane wakasundjaka, la wane wakasumbaka diango lʼetemwelo. Ndi akatshulula mesa wʼamengudi wa falanga, ndu ekala wʼasumbishi wa tukudumba.

¹⁶ Ndi kumbetawo nduku untu ntenanya etemwelo atembe engo.

¹⁷ Ndi akawaetsha; akawambula ati: Undi, nkufundama ati: Luudu lami layetama ati: Luudu la dombelo la wedja tshe? Keli nyu nyambulete wuku wʼapotodi.

¹⁸ Elombedi a waki la afundji wakuki dikambu so, wakayangi mbuka ka mbudiaka. Keli vo wakawuki woma, ne dia ului tshe wʼantu wakambi dia wetshelu andi.

¹⁹ Ndi akatumbaka uma lʼusumba nshi tshe la dikolo.

Wulu wa Mbetawo

²⁰ Lamʼakawatetaka lu mbuka la pindju, vo wakenyi utamba a fingu ako ambolengela tshe, ndu ediu awo wambuma.

²¹ Petero akuho utamba ako, akatela Jesu ati: Umbetsha, enda! Utamba a fingu wakayadji mananu ambolengela.

²² Jesu akawatela ati: Nyetawo Unyashungu.

²³ Mete kanyutelami nti: Naka untu ayutela ukungu uku ati: Umo leku, utoto lʼuduwa; mete, ndi ayena dikambu diako diambutshama naka ndi kema la tamu lʼutema andi, ndu ambetawo ati: Dikambu dialombami diayutshama.

²⁴ Okone lambunyutela nti: Lamʼalombanyu Unyashungu, nyetawo nyati: Tambulungula kene kalombasu; ku mete, nyu nyayukilungula.

²⁵ Lamʼemalanyu nyalomba Unyashungu, naka nyu la untu dikambu, nyudimanyia. Okone mbayunyudimanyia ndu Shenyu leli lʼulungu kolo yanyu.

²⁶ Keli naka nyu hanyudimanyia akina kolo yawo, Shenyu leli lʼulungu hunyudimanyia kolo yanyu.

Wambumbula Jesu Dia Wulu Andi

²⁷ Vo wakayi ntu la Jerusalema. Lamʼaketetaka Jesu lʼetemwelo, elombedi a waki, afundji, la dikumanyi wakayi le ndi.

²⁸ Vo wakawumbula vati: La wulu akona watshaye akambu ane? Akakusha wulu wa ntsha akambu ane?

²⁹ Jesu akâkaluya diui ati: Ndu dimi nangaka nyumbula umbula omotshi. Naka nyu nyayunkadimwelawo, ku dimi layunyutela dia wulu watshami akambu ane.

³⁰ Undi, batiza ka Joani kakayi uma lʼulungu, kana uma le antu? Nyunkadimweli.

³¹ Vo wakatanela lʼatei awo vati: Naka shu tayuta shati: Uma lʼulungu, ndi ayutumbula ati: Ya ukundi akinyu kumbetawo na?

³² Keli shu tayuta shati: Uma le antu? — vo wakuki antu woma, ne dia antu tshe wakamamemaka Joani vati: Umvutshi mbendi.

³³ Vo wakâkaluya Jesu diui vati: Shu hateyi. Ku Jesu akawatela ati: Ndu dimi halunyutela dia wulu akona watshami akambu ane.