Mako 10 - La Bible en Otetela (Bible K'Ekila) 1991

Jesu Ambuya la Judiya Ntu

¹ Jesu akamo uma leko, akatshu lu leke la Judiya, pulu ndu la wedi wa Jorodana. Elui wʼantu wakamotaka le ndi. Ndi akawaetshaka uku aki etshelu kandi.

Dia Ndjaka Diwala

² Afarise wakayi le ndi, wakawutuoula dia mbuhimba vati: Eko ekila dia pami nkimo wadendi?

³ Ndi akawambula ati: Ukundi akanyutela Mose na?

⁴ Vo wakûkaluya diui vati: Mose aketawo vo nfunda mukanda wʼediakelu ka diwala, la nkimo wadi.

⁵ Keli Jesu akawatela ati: Ndi akafundi olembe one, ne dia lunyu lʼetema anyu.

⁶ Keli umaka etatelu kʼetungelu, Unyashungu akatungi, pami la umuntu.

⁷ Dia dikambu ne, mbayutshika untu shi la nyangu, mbayu-ndumamana la wadendi,

⁸ ku vo ahendi wayuyala dimba otoi. Okone vo kema ahendi ntu, keli wambuyala otoi.

⁹ Okone untu takakitulaki kene kakamamanya Unyashungu.

¹⁰ Lamʼakiwo lu luudu, ambeki andi wakawumbula dikambu diako ntu.

¹¹ Ku ndi akâkaluya diui ati: Naka untu amboseka wadendi, ku ambutshuka umuntu ukina, ndi ambunanya wadendi.

¹² Naka umuntu ndame amboseka umendi, ku ambutshukama le pami kekina, ndi ambunana.

Jesu Ambotshokola Tokendakenda

¹³ Vo wakayi la tokendakenda le Jesu, dia ndi mbananda, ku ambeki andi wakahangwela.

¹⁴ Lamʼakenyi Jesu dikambu so, ndi akuki kele; akawatela ati: Nyete tokendakenda wayi le mi, tanyasikeki, ne dia diulelu dia Unyashungu dieli dia antu uku vo.

¹⁵ Mete kanyutelami nti: Untu tshe lahalungula diulelu dia Unyashungu uku kiendakenda, mete ndi huto loko.

¹⁶ Ndi akalele lʼanya andi, akatshokola, akawahe anya.

Dikambu Dia Ukundji Wulu

¹⁷ Lamʼakatatshokaka Jesu lu mbuka, untu omotshi akayi le ndi ayalawo, akayakosha lʼekulu andi. Ndi akawumbula ati: Umbetsha wʼololo, kayumutsha dia nkita lumu la pundju?

¹⁸ Jesu akûkaluya diui ati: Okoko wana wambetaye wati: Ololo? Nduku leli ololo, tshikima Unyashungu ndame.

¹⁹ We mbeyaka elemre ati: Tudiakaki. Tunanaki. Tuvaki. Tukesaki. Olemia sho la nyo.

²⁰ Ndi akûkaluya diui ati: Umbetsha, akambu aso tshe mbatumutshaka umaka dikenda.

²¹ Jesu akawendi tee, akawuki ngandji. Ndi akawutela ati: Dikambu otoi mbambutshikala le ye. Utshu, utusundja diango dieli la ye, kusha akanga a weula, ku we ayuyala la diango lʼulungu. Kuyi, kuyundjeli.

²² Ndi akasunama uma lu diui so, akakende la lunyangu, ne dia ndi aki kanga diango efula.

²³ Jesu akewewa, akatela ambeki andi ati: Eko wulu le akanga wʼengonyi, dia vo mboto lu diulelu dia Unyashungu!

²⁴ Ambeki andi wakambi ne dia aui andi. Keli Jesu akâkaluya diui ati: Anʼami, eko dikambu dia wulu dia untu mboto lu diulelu dia Unyashungu!

²⁵ Eotwelo ka kamelo lu ushu wa tedi, kambuleka eotwelo ka kanga ongonyi lu diulelu dia Unyashungu dikambu dia tshitshe.

²⁶ Vo wakatamanya mamba; wakawumbula vati: Ku naka osoku, akona ayeya nshimbamela?

²⁷ Jesu akawaendi tee, akati ati: Le antu, dikambu ne hadieyama ntshama, keli le Unyashungu kema osoku. Akambu tshe mbeyaka ntshama le Unyashungu.

²⁸ Petero akatatela mbutela ati: Enda, shu tambutshika tshe, tambukuyela.

²⁹ Jesu akati ati: Mete kanyutelami nti: Nduku untu layutshika luudu, anangu, akadiyendi, nyangu, shi, ana kana kambo dikambu diami ndu ne dia lukumu lʼololo,

³⁰ lahulungula kakiane lʼetena kene: mvudu, anangu, akadiyo, wanyangu, ana, ndu dikambo, tena lukama, kame lʼasui; ku lʼetena kayayi, lumu la pundju.

³¹ Keli efula weli la ntundu, wayuyala lʼokongo; la efula weli lʼokongo, wayuyala la ntundu.

Jesu Ambuta Ntu Dia Nyoi Kandi la Eulwelu Kandi

³² Antu wakatatshokaka lu mbuka utsha la Jerusalema. Jesu aketi la ntundu kawo, ambeki wakambi, la wane watuyelaka wakuki woma. Ku ndi akose ambeki andi dikumi la ahendi ntu. Ndi akatatela mbatela dia akambu wayuya le ndi ati:

³³ Nyulungi, shu ane wutatshu utsha la Jerusalema, antu wayukimo Onʼa untu le elombedi a waki la afundji. Vo wayuwamia dia ndi mvo, wayukimo le asi wedja.

³⁴ Vo wayosoka, wayohongwela soi, wayokomola, wayudiaka. Lamʼayeta nshi shatu, ndi ayulo.

Ana wa Zebede Wambolomba Jesu Ahuli a Waki

³⁵ Jakoba la Joani, ana wa Zebede, wakasukana la Jesu; wakawutela vati: Umbetsha, shu nangaka we ntutshela dikambu tshe diayutukolomba.

³⁶ Ndi akawambula ati: Kalanganyu dimi nyutshela?

³⁷ Vo wakûkaluya diui vati: Etawo dia shu mbidjase kame la ye, omotshi lu lunya laye la pami ukina lu lunya laye la lomoso lamʼayuyuvala lu lutumbu laye.

³⁸ Keli Jesu akâkaluya diui ati: Nyu hanyeyi kene kalombanyu. Nyu la wulu wa no dikoho diahumbami no, kuyanga mbatizama la batiza kahumbami mbatizama?

³⁹ Vo wakûkaluya diui vati: Shu la wulu. Jesu akawatela ati: Mete, nyu nyayono dikoho diahumbami no, ndu nyayubatizama la batiza kahumbami mbatizama.

⁴⁰ Keli dia mbidjase lu lunya lami la pami, kana la lomoso aha dikambu diami dia mbisha untu. Dia mbidjase osoku, eli paka le wane wakawalongoswela.

⁴¹ Lamʼakuki ambeki dikumi dikambu so, vo wakatatela mbuka Jakoba la Joani yenyi.

⁴² Jesu akawaeti; akawatela ati: Nyu mbeyaka nyati: Wane wakanawo dia mbulela wedja, watuwahamelaka la ngala; ndu antu awo a waki watuwaulelaka.

⁴³ Keli le nyu, aha osoku! One lalanga ndjala wuki lʼatei anyu, ayali ukambi anyu.

⁴⁴ One lalanga ndjala la ntundu Kanyu, ayali fumbi kanyu tshe.

⁴⁵ Ne dia Onʼa untu kundja dia antu mbukambela ulimu, akayi dia ndjukambela antu akina ulimu, la dia nkimo lumu landi, dia ntshungula antu efula.

Jesu Ambokonoya Baratimayo Kanga Tshungu

⁴⁶ Vo wakakumi la Jeriko. Lamʼakamo Jesu la ambeki andi ndu ului a wuki wʼantu uma leko, kanga tshungu omotshi olombi, lukumbu landi Baratimayo, onʼa Timeyo, akadjashi lʼumafnu a mbuka.

⁴⁷ Ndi akuki ati: Jesu yʼusi Nazareta oso. Ndi akatatela mpangohango ati: Jesu, we kanula ya Davidi, umbuki ketshi.

⁴⁸ Antu efula wakuhangwela vati: Lembohala! Keli ndi akaleki mpangohango ati: We kanula ya Davidi, umbuki ketshi!

⁴⁹ Jesu akemala, akati ati: Nyuweti. Vo waketi kanga tshungu wawutela vati: Ongenengene, unela; ndi kaketa.

⁵⁰ Ndi akakadja dihondo diandi, akakhunguso la luwangu, akayi le Jesu.

⁵¹ Jesu akawumbula ati: Alangaye dimi nkutshela na? Kanga tshungu akûkaluya diui ati: Khumadiondjo, ashu ami wasene.

⁵² Jesu akawutela ati: Utshu, mbetawo kaye kambukokonoya. Kʼetena kako, ndi akasene, ku ndi akuyeli lu mbuka.